Устав святых отец,

Богом преданный всем хотящим пети Псалтирь, в молчании живущим монахом,
и всем Богобоязнивым православным Христианом.

Богоноснии, и Преподобнии, и преблаженнии отцы наши, всему миру светила, землении ангели, Небеснии человецы, исперва от святаго Духа предания иночествовати навыкше, и Благодатию Божиею отнюд просвещени быша, Христа вселивше в прекрасныя их души, чистаго ради жития их, и победу показаша на диавола, аще и многими от него искушении разжизаеми: но одолевше его, яснее злата искушена сияют, и паче снега убелишася, и невещественна злата крила вперивше мысленная, на Небеса возлетеша, яко Небопарнии орли, нам оставиша устав, Богом преданнаго пения их, и умиленныя молитвы, имиже Бога милостива себе сотвориша. ови бо их часы с междочасием пояху, составивше избранныя Псалмы, с тропари и с молитвами, и нарекоша сия часословец: Друзии един Псалтирь пояху: инии же, подвижнейшии суще, по всякой кафисме, трисвятое с поклоны, и с тропари покаянны, и с молитвами Псалтирь пояху.

Устав о Псалтири,
како должно есть глаголати во все лето.

От недели антипасхи, яже есть фомина, и до отдания воздвижения честнаго и животворящаго Креста Господня, начинаем стихологисати Псалтирь сице:

В субботу светлыя недели вечера, глаголем 1-ю кафисму, Блажен муж:

В неделю на утрени, кафисма 2-я, 3-я, а 17-ю кафисму в сию неделю не глаголем, занеже поется полиелей.

В прочия же воскресныя дни, егда не поется полиелей, на утрени глаголем кафисму 17-ю с тропари ея.

[зри] Аще же прилучится в неделю праздник Господский, или Богородицы, или празднуемаго святаго, по дву кафисмах полиелей, и по величании не певше Слава, и ныне, и Аллилуиа, поем тропари: Ангельский собор: и по ектении седальны праздника, или святаго.

В неделю вечера, во весь год никогдаже глаголется Псалтирь.

Аще ли же прилучится празднество, тогда поем, Блажен муж: 1-й антифон.

В понедельник на утрени, кафисма 4-я, 5-я. На вечерни, кафисма 6-я.

Во вторник на утрени, кафисма 7-я, 8-я. На вечерни, кафисма 9-я.

В среду на утрени, кафисма 10-я, 11-я. На вечерни, кафисма 12-я.

В четверток на утрени, кафисма 13-я, 14-я. На Вечерни, кафисма 15-я.

В пяток на утрени, кафисма 19-я, 20-я. На вечерни, кафисма 18-я.

В субботу на утрени, кафисма 16-я, 17-я.

На полунощнице же в понедельник, во вторник, в среду, в четверток, в пяток, во весь год глаголем кафисму 17-ю: Блажени непорочнии: В субботу же на полунощнице всегда глаголем кафисму 9-ю: Тебе подобает:

По отдании же воздвижения честнаго Креста, от 22-го дне месяца септемвриа, до 20-го дне месяца декемвриа, начинаем Псалтирь глаголати сице:

В субботу на вечерни, кафисма 1-я, Блажен муж:

В неделю на утрени, кафисма 2-я, 3-я: прилагаем же и полиелей, сиречь многомилостиво, Псалом 134: Хвалите имя Господне: и 135: Исповедайтеся Господеви: И абие тропари: Ангельский собор: и впакои гласа.

Аще же будет Господский праздник, или Богородицы, или некий святый празднуемый в неделю, тогда по Псалмех: Хвалите имя Господне: и Исповедайтеся Господеви: празднику величание, и Псалом избранный, и тропари, Ангельский собор: и седальны праздника.

В понедельник по воздвижении, на утрени, кафисма 4-я, 5-я, 6-я: а на вечерни во всю седмицу глаголем кафисму 18-ю.

Во вторник на утрени, кафисма 7-я, 8-я, 9-я.

В среду на утрени, кафисма 10-я, 11-я, 12-я.

В четверток, на утрени, кафисма 13-я, 14-я, 15-я.

В пяток, на утрени, кафисма 19-я, 20-я.

В субботу, на утрени, кафисма 16-я, 17-я.

Егда же прилучится в те дни празднество, в нихже глаголется на утрени по 3 кафисмы, и тогда глаголем на утрени две кафисмы, а 3-ю рядовую на вечерни. Яко во всем общем уставе, от 22-го дне септемвриа месяца, повелевает начинати на утрени кафисмы три: зде же от недели, яже по воздвижении, еже и мнит ми ся, и поприлежнее яко да от недели начало вземлет Псалтирь. Аще ли убо прежде 20-го или по 20-м дни будет неделя: всяко и всегда от понедельника начинаем три кафисмы.

От 20-го же дне декемвриа месяца, до 14-го ианнуариа месяца, дондеже отдастся праздник святаго Богоявления.

Стихологисуем паки Псалтирь, якоже и в неделю антипасхи, яже есть фомина, по две кафисмы на утрени: а на вечерни 3-ю рядовую.

От пятаго же надесять дне ианнуариа месяца, до субботы, яже есть пред неделею о блудном сыне, стихологисуем паки на утрени, по 3 кафисмы, а на вечерни 18-ю кафисму: Ко Господу внегда скорбети ми:

В две же недели, в мясопустную и сырную, стихологисуем на утрени по две кафисмы, а на вечерни 3-ю рядовую, малаго ради покоя братии.

В неделю же блуднаго, и в мясопустную, и в сырную, на утрени, по Псалмех, Хвалите имя Господне: и Исповедайтеся Господеви: припеваем и третий Псалом 136: На реках вавилонских, со аллилуиею красною. Таже тропари: Ангельский собор: и впакои гласа.

Подобает ведати, яко от сея сырныя недели даже до воздвижения честнаго Креста упраждняется полиелей, поется же токмо во бдениих Владычних праздников.

По отдании же воздвижения честнаго и животворящаго Креста Господня, и до недели сыропустныя, кроме предпразднства, и попразднства Рождества Христова и Богоявления, в соборней велицей Церкви, и в прочиих соборных Церквах, в воскресныя дни на утрени поется полиелей, якоже и в великих пречестных обителех.

 

Устав о Псалтири, како должно есть глаголати во святый великий пост:

В неделю 1-ю, 2-ю, 3-ю, 4-ю, 6-ю, яко да прочтутся вся кафисмы по своему времени, а не останется ни едина кафисма.

В субботу на вечерни, кафисма 1-я, Блажен муж: В неделю на утрени, кафисма 2-я, 3-я, 17-я.

В понедельник на утрени, кафисма 4-я, 5-я, 6-я. На 1-м часе кафисмы несть. На часех кафисма 7-я, 8-я, 9-я. На вечерни по вся дни в сих пяти днех глаголется кафисма 18-я: Ко Господу внегда скорбети ми:

Во вторник на утрени, кафисма 10-я, 11-я, 12-я. На 1-м часе кафисма 13-я. На часех кафисма 14-я, 15-я, 16-я.

В среду на утрени, кафисма 19-я, 20-я, 1-я. На 1-м часе, кафисма 2-я. На часех, кафисма 3-я, 4-я, 5-я.

В четверток на утрени, кафисма 6-я, 7-я, 8-я. На 1-м часе кафисма 9-я. На часех, кафисма 10-я, 11-я, 12-я.

В пяток на утрени, кафисма 13-я, 14-я, 15-я. На 1-м часе несть кафисмы. На часех, кафисма 19-я, 20-я. На 9-м часе несть кафисмы.

В субботу на утрени, кафисма 16-я, 17-я.

И тако исполнится устав Псалтири.

 

Указ о кафисмах пятыя недели святаго великаго поста, како глаголати.

В субботу на вечерни, кафисма 1-я. В неделю на утрени, кафисма 2-я, 3-я, 17-я, а на вечерни кафисмы несть.

В понедельник на утрени, кафисма 4-я, 5-я, 6-я. На 1-м часе кафисмы несть. На часех, кафисма 7-я, 8-я, 9-я. На вечерни кафисма 10-я.

Во вторник на утрени, кафисма 11-я, 12-я, 13-я. На первом часе кафисма 14-я. На часех, кафисма 15-я, 16-я, 18-я. На вечерни, кафисма 19-я.

В среду на утрени, кафисма 20-я, 1-я, 2-я. На 1-м часе кафисма 3-я. На часех, кафисма 4-я, 5-я, 6-я. На вечерни кафисма 7-я.

В четверток на утрени, кафисма 8-я. На 1-м часе кафисмы несть. На часех, кафисма 9-я, 10-я, 11-я. На вечерни кафисма 12-я.

В пяток на утрени, кафисма 13-я, 14-я, 15-я. На первом часе кафисмы несть. На часех, кафисма 19-я, 20-я. На 9-м часе кафисмы несть. На вечерни кафисма 18-я.

И тако исполнится устав Псалтири.

 

Подобает ведати, како глаголати Псалтирь во святую великую седмицу страстныя недели.

Известно же да будет, яко во святую великую седмицу сию, единою совершаем Псалтирь в Церкви. Стихологисует же ся сице:

В субботу лазареву на вечерни, кафисма 1-я.

В неделю цветную на утрени, кафисма 2-я, 3-я.

В понедельник на утрени, кафисма 4-я, 5-я, 6-я. На первом часе кафисмы несть. На часех, кафисма 7-я, 8-я. На 9-м часе кафисмы несть. На вечерни кафисма 18-я.

Во вторник на утрени, кафисма 9-я, 10-я, 11-я. На первом часе кафисмы несть. На часех, кафисма 12-я, 13-я. На 9-м часе кафисмы несть. На вечерни кафисма 18-я.

В среду великую на утрени кафисма 14-я, 15-я, 16-я. На первом часе кафисмы несть. На часех, кафисма 19-я, 20-я. В туже среду на вечерни кафисма 18-я, без поклонов.

И тако отлагается Псалтирь и до субботы фомины. Токмо поем в субботу великую на утрени кафисму 17-ю, с припевы, на три статии.