ПОМЯННИК,

егоже должно есть иноку или мiрянину на всяк день, по скончании своего келейного правила, со всяким умилением и усердием чести.

Помяни, Господи Иисусе Христе Боже наш, милости и щедроты Твоя от века сущыя, ихже ради и вочеловечился еси, и распятие и смерть спасения ради право в Тя верующих претерпети изволил еси: и воскрес из мертвых, вознеслся еси на Небеса, и седиши одесную Бога Отца и призираеши на смиренные мольбы всем сердцем призывающих Тя. Приклони ухо Твое и услыши смиренное моление мене, непотребнаго раба Твоего, в воню благоухания духовнаго Тебе за все люди Твоя приносящаго. И в первых помяни Церковь Твою Святую, соборную и Апостольскую, Юже снабдел еси Честною Твоею Кровию, и утверди, укрепи и разшири, умножи, умири, и непреобориму адовыми враты во веки сохрани: раздирания церквей утиши, шатания языческая угаси, и ересей востания скоро разори и искорени, и в ничтоже силою Святаго Твоего Духа обрати. [Поклон]

Спаси, Господи, и помилуй богохранимую страну нашу, власти и воинство ея: и глаголи мирная и благая в сердцах их о Церкви Твоей Святей и о всех людех Твоих, да и мы в тишине их тихое и безмолвное житие поживем во правоверии, и во всяком благочестии и честности. [Поклон]

Спаси, Господи, и помилуй великаго господина и отца нашего имярек, святейшаго патриарха Московскаго и всея Руси, и святейшия вселенския патриархи и преосвященныя митрополиты, архиепископы и епископы православныя, иереи же и диаконы и весь причет церковный, яже поставил еси пасти словесное Твое стадо: и молитвами их помилуй и спаси мя, грешнаго. [Поклон]

Спаси, Господи, и помилуй отца моего духовнаго имярек, и святыми его молитвами прости моя согрешения. [Поклон]

Спаси, Господи, и помилуй родители моя имярек, и рабы Твоя имярек и вся сродники моя по плоти, и ближния рода моего, и други и даруй им мирная Твоя и премирная благая. [Поклон]

Спаси, Господи, и помилуй во Святогорских монастырех и в Российских, и во инех местех живущия и пребывающия отцы и братию нашу, и сестры, и молитвами их помилуй и мене, грешнаго. [Поклон]

Спаси, Господи, и помилуй по множеству щедрот Твоих вся священноиноки, иноки же и инокини, и вся в девстве же, и благоговении и постничестве живущия в монастырех, в пустынях, в пещерах, горах, столпех, затворех, разселинах каменных, островех же морских, и всяком месте владычествия Твоего правоверно живущия, и благочестно служащия Ти, и молящиися Тебе: облегчи им тяготу, и утеши их скорбь, и к подвигу от Тебе силу и крепость им подаждь, и молитвами их даруй ми оставление грехов. [Поклон]

Спаси, Господи, и помилуй старцы и юныя, нищыя и сироты и вдовицы, и сущия в болезни и в печалех, в бедах же и скорбех, обстояниих и пленениих, в темницах же и заточениих, изряднее же в гонениих Тебе ради и веры Православныя, от язык, безбожных, от отступников и от еретиков, сущия рабы Твоя: и помяни я, посети, укрепи, утеши, и вскоре силою Твоею ослабу, свободу и избаву им подаждь. [Поклон]

Спаси, Господи, и помилуй благотворящия нам, милующия и питающия нас, давшыя нам милостыню и заповедавшыя нам недостойным молитися о них, и упокоевающия нас: и сотвори милость Твою с ними, даруя им вся, яже ко спасению прошения, и вечных благ восприятия. [Поклон]

Спаси, Господи, и помилуй посланныя в службу и путешествующия отцы и братию нашу и сестры, и вся православныя христианы. [Поклон]

Спаси, Господи, и помилуй ихже аз безумием моим соблазних, и от пути спасительнаго отвратих, к делом злым и неподобным приведох: Божественным Твоим промыслом к пути спасения паки возврати. [Поклон]

Спаси, Господи, и помилуй ненавидящия и обидящия мя, и творящия ми пакости, и не остави их погибнути мене ради, грешнаго. [Поклон]

Отступившия от православныя веры и погибельными ересьми ослепленныя, светом Твоего познания просвети, и святей Твоей Апостольстей соборней Церкви причти. [Поклон]

Правоверие утверди, и воздвигни рог христианский, и низпосли на нас милости Твоя богатыя. [Поклон]

Об усопших:

Помяни, Господи, от жития сего отшедшыя правоверныя цари и царицы, благоверныя князи и княгини, святейшия патриархи, преосвященныя митрополиты, архиепископы и епископы православныя, во иерейском же и в причте церковном и иночестем чине Тебе послужившыя, и блаженныя ктиторы церковныя, и в вечных Твоих селениих со святыми упокой. [Поклон]

Помяни, Господи, души усопшых рабов Твоих имярек, и всех сродников моих по плоти и ближних и знаемых: и прости их вся согрешения вольная и невольная, даруя им Царствие и причастие вечных Твоих благих, и Твоея безконечныя и блаженныя жизни наслаждение. [Поклон]

Помяни, Господи, и вся в надежди воскресения и жизни Вечныя усопшыя отцы и братию нашу, и сестры, и зде лежащия и повсюду, православныя христианы: и со святыми Твоими, идеже присещает свет лица Твоего, всели, и нас помилуй, яко Благ и Человеколюбец, аминь.

На конец же глаголем сие трижды:

Подаждь, Господи, оставление грехов всем прежде отшедшым в вере и надежди Воскресения отцем, братиям и сестрам нашым, и сотвори им вечную память.

Господи, помилуй. [трижды]