От старчества о келейном правиле, и о молитве,
юже предаде ангел Господень великому Пахомию.

Брат вопроси старца, глаголя: молюся тебе, отче, рцы ми, како должен есмь быти в келлии? И отвеща старец: аз убо держу правило свое сице: Четыре часы сплю от нощи, и четыре часы стою на пении, и делаю четыре часы: и во дни паки делаю до шестаго часа, и от шестаго прочитаю даже до девятаго, от девятаго же пекуся о пищи, и яже имать келлиа поделия.

И паки брат: молитв же колико должен есмь творити? И старец отвещав, рече: Аз по завещанию ангелову держу, еже завеща святому Пахомию с писанием. Ты же якоже можеши.

И брату рекшу: како есть завещание ангелово, отче? И рече старец: писано есть во ангелове написанном завещании, яко да творят, иже под властию святаго Пахомиа монаси, во дни молитв 12, и в нощи 12, и в девятый час три молитвы, и коеяждо молитвы прежде пети псалом.

И сия убо рече сице, вообразих мало, яко да и малии доспевают в правило, и не скорбят. Совершеннии же законоположения не требуют, слышаще глаголющаго: непрестанно молитеся.

Правило еже даде ангел Господень великому Пахомию:

Начало сице: Трисвятое, И по Отче наш: Господи, помилуй, 12. Слава, и ныне: Приидите, поклонимся, трижды. Псалом 50: Помилуй мя, Боже: Верую во единаго Бога: Сто молитв: Господи, Иисусе Христе сыне Божий, помилуй мя грешнаго. И посем, Достойно есть: И отпуст. И сие едина молитва. Сих совершати повеле дванадесять в день, и в нощь дванадесять.