Прежде солнечнаго захождения дне субботнаго, приходит параекклисиарх [сиречь кандиловжигатель] к предстоятелю, и творит поклонение ему, знаменуя пришествием своим время клепания. И взем благословение, изшед клеплет в малый кампан. И собравшимся братиям в притвор, творит священник начало: благословен Бог наш: И учиненный чтец глаголет: Слава тебе Боже наш, слава тебе. Таже, царю небесный: Трисвятое: И по Отче наш: Возглас от священника, и чтет чтец 9-й час по обычаю. Таже, по конце того и по отпусте входим в храм: и станет кийждо на своем месте. Аще же 9-й час глаголется в храме, тогда отпуст 9-го часа не бывает, но абие иерей начинает, глаголя: благословен Бог наш: И чтец глаголет: Приидите поклонимся: трижды, и вечерний псалом: благослови душе моя Господа: тихо и кротким гласом. По псалме же, Слава, и ныне, аллилуиа. трижды. иерей же ектении не глаголет, но чтец глаголет: Господи помилуй, трижды. Слава, и ныне: И абие, Господи воззвах: И ставим стихи 4. И поем стихиры воскресны гласа, три, повторяюще 1. Слава, и ныне, богородичен. Таже, Свете тихий: Прокимен, Господь воцарися: Стих: облечеся Господь в силу и препоясася. И паки, Господь воцарися: Таже, Сподоби Господи в вечер сей: И абие поем стиховны стихиру едину воскресну. И другия стихиры Богородицы, подобны 3, с припевы их. Слава, и ныне, богородичен их. Таже, Ныне отпущаеши: Трисвятое, и по Отче наш: Тропарь воскресн. Слава, и ныне, богородичен его. Посем глаголет иерей ектению малую: Помилуй нас Боже, по велицей милости твоей, молим ти ся услыши и помилуй. Лик: Господи помилуй, трижды. еще молимся о благочестивейшем, самодержавнейшем, великом господре нашем императоре николае александровиче, всея россии: о супруге его благочестивейшей господрне, императрице александре феодоровне: о матери его благочестивейшей господрне императрице марии феодоровне: о наследнике его, благоверном господре, цесаревиче и великом князе, алексии николаевиче, и о всем царствующем доме. Лик: Господи помилуй, трижды. еще молимся о святейшем правительствующем синоде: Лик: Господи помилуй, трижды. еще молимся за всю братию и за вся христианы. Лик: Господи помилуй, трижды. Возглас: яко милостив и человеколюбец Бог еси, и тебе славу возсылаем отцу и сыну, и святому духу, ныне и присно, и во веки веков. Таже, Слава тебе Христе Боже: [Зри] И отпуст малый, и многолетие. И вшедше в трапезу, глаголем: ядят убозии и насытятся, и восхвалят Господа взыскающии его: жива будут сердца их в век века. Слава, и ныне: Господи помилуй, трижды. благослови. И благословляет священник трапезу. И вкушаем представленная нам полегку. да не отягчимся на бдение. По ядении же, Слава, и ныне: Бысть чрево твое святая трапеза, имущая небеснаго хлеба, Христа бога нашего, от негоже всяк ядый не умирает, якоже рече всех богородительнице питатель. И посем, честнейшую херувим: Таже, Возвеселил ны еси Господи в творениих твоих, и в делех руку твоею возрадуемся: знаменася на нас свет лица твоего Господи, дал еси веселие в сердце моем, от плода пшеницы, вина и елеа своего умножишася. в мире вкупе усну, и почию, яко ты Господи единаго на уповании вселил мя еси. Слава, и ныне: Господи помилуй, трижды. благослови. священник: С нами бог, своею благодатию и человеколюбием, всегда, ныне и присно, и во веки веков, аминь.
По еже заити солнцу мало, отходит кандиловжигатель, и творит поклон предстоятелю. Таже восходя ударяет в великий кампан не скоро, поя непорочны, или глаголя псалом 50, тихо 12-ю. И потом вшед и вжигает лампады, и уготовляет кадильницу. И тако паки изшед клеплет во вся кампаны. И возвращься в церковь, и вжег свещу в насвещнице, поставляет прямо царских врат. Таже творит поклонение иерею, егоже есть чреда. иерей же востав творит поклон предстоятелю: И отшед творит поклоны 3, пред святыми дверьми, и на оба лика: братиям же всем седящим. И вшед во святый олтарь, возлагает на ся епитрахилий, целовав крест верху его и приим кадильницу, и став пред святою трапезою, влагает фимиам: и глаголет молитву кадила тайно. И тако кадит святую трапезу крестовидно окрест, и весь жертвенник: и отворив святыя двери исходит. Кандиловжигатель же прием свещник стоящий среди церкве, возгласит велиим гласом: Востаните! держа свещник в руце со свещею возжженною, всем же воставшим. И изшед священник святыми дверьми, и творит крест кадилом пред святыми дверьми, возводя праве и преки: и идет и кадит поряду святыя иконы, яже на десней стране, таже на левей, посем предстоятеля, и оба лика по чину их: параекклисиарху же предходящу ему со свещником. егда же иерей сотворит крест кадилом, покланяяся мало, покланяется с ним и параекклисиарх. Исходит же и в притвор, и кадит по чину и тамо сущую братию: и паки возвращься в церковь, и став посреди обою лику знаменует кадилом крест, зря к востоком, и возглашает велегласно: Господи благослови. И абие кадит образ спаса Христа, и Богородицы, и предстоятеля на месте его: и вшед во святый олтарь, и став пред святою трапезою, знаменует кадилом крест, трижды. И потом возглашает сице: Слава святей, и единосущней, и животворящей и нераздельней Троице, всегда, ныне и присно, и во веки веков. И начинает предстоятель, или екклисиарх: Аминь. Приидите поклонимся цареви нашему Богу. низким и тихим гласом. Таже второе мало повышше: Приидите поклонимся и припадем христу, цареви нашему Богу. Паки третие вышшим гласом, сице: Приидите поклонимся и припадем самому христу цареви и Богу нашему. Таже особне: Приидите, поклонимся, и припадем ему. И абие начинает вышшим гласом предстоятель, или екклисиарх, на глас осмый: благослови душе моя Господа: не скоро, и со сладкопением, споющей и прочей братии. И припев: благословен еси Господи. Таже вторый певец праваго лика: Господи Боже мой, возвеличился еси зело: благословен еси Господи: легко со гласом соглашающим и прочим братиям с ними. иерей же с параекклисиархом, изшед из святаго олтаря, и сотворше поклоны три пред святыми дверьми, и обращшеся творят поклон предстоятелю: Таже на оба лика по единому: И идут и станут на своих им местех.
В соборных же и приходских храмех действует священник сия в фелоне, диакон же в стихаре.
егда же начнут пети: Вся премудростию сотворил еси: и, Слава ти Господи, сотворившему вся. Тогда иерей приходит пред царския двери во епитрахилии, и откровенною главою стоя, глаголет молитвы светильничныя. Скончавшуся же псалму, глаголет ектению великую: Миром господу помолимся. И по ектении возглас: яко подобает тебе: Таже стихологисуем псалтир на глас 8, первую кафисму: блажен муж, первый антифон: вторый же и третий антифон поем на глас дне. По всяком же антифоне, ектениа малая, и возглас. По первом антифоне, яко твоя держава: По втором, яко благ и человеколюбец: Певаему же третиему антифону, отходит диакон, и положив поклон предстоятелю, входит во святый олтарь, входит же с ним и чредный священник. Взем же диакон стихарий свой и орарий, емлет от священника благословение, и целовав десницу его, облачится в стихарь обычно, и глаголет последнюю ектению, и возглас от священника: яко ты еси Бог наш: По скончании же обычныя стихологии, творит канонарх метание, и возгласит глас октоиха, или минеи. Мы же поем: Господи воззвах в прилучившийся глас октоиха. священник же стоит на обычном месте. егда же начнут пети, Господи воззвах: Тогда кадит иерей или диакон, яко обычай есть, творя поклонение предстоятелю. Мы же ставим стихов десять: от Изведи из темницы душу мою: И поем стихиры воскресны гласа, три: И анатолиевы 4: И минеи святаго, три: Слава, святаго, аще имать. Аще ли ни, Слава, и ныне, богородичен гласа, настоящий. И егда речем стих: яко утвердися милость его на нас: поюще оба лика вкупе. Тогда иерей сотворь поклон предстоятелю: И вшед во святый олтарь, облачится в фелонь, нам же Славу рекшим, И абие творят вход, отверзаемым святым дверем: Предыдущим подсвещником двема со свещами. Диакону же кадильницу держащу, и по нем иерею просту, опущен имущу фелонь. священник же стоит прямо святых дверей: Стоит же и диакон одесную священника мало откосвенно, и приник держя и орарь свой треми персты десныя руки, глаголет тайно, елико токмо слышати священнику: господу помолимся. священник же глаголет тайно молитву: Вечер и утро и полудне: И по молитве восклонився, и глаголет диакон ко священнику, показуя вкупе к востоку со орарем, держя и треми персты десныя руки: благослови владыко святый вход. И священник благословляет к востоку, глаголя: благословен вход святых твоих Господи: Таже диакон отходит и кадит святую икону, сущую на месте предстоятеля, и самаго предстоятеля: и паки стоит на немже месте прежде стояше, ожидаяй исполнения стиха. Исполншуся же стиху входит диакон посреде, и начертав крест с кадильницею, возглашает: Премудрость, прости. И мы поем: Свете тихий святыя славы: Чтецы же вземше лампады, предходят даже до святых дверей: Диакон же вшед внутрь святаго олтаря, кадит святую трапезу. священник же поклонився пред святыми дверьми, и целовав я входит, и затворяются святыя двери. По конце же, Свете тихий: глаголет диакон: Вонмем. иерей, Мир всем. И паки диакон: Премудрость, вонмем. Канонарх же поклонение сотворь к настоятелю, сказует прокимен, и стихи. Клирицы же поют, Прокимен дне, на глас 6-й: Господь воцарися, в лепоту облечеся. Стих: облечеся Господь в силу и препоясася. Стих: Ибо утверди вселенную, юже не подвижится. Стих: Дому твоему подобает святыня Господи, в долготу дний. И паки, Господь воцарися, в лепоту облечеся. Чтец же согбенне руце имея при персех, среди храма стоя, ожидает конца прокимена: и сотворив поклонение, отходит на свое место. Посем изшед глаголет диакон ектению: Рцем вси: И возглас от священника. И по возгласе глаголет настоятель, или учиненный чтец: Сподоби Господи в вечер сей: И паки диакон: Исполним вечернюю молитву нашу господеви. И возглас от иереа: яко благ и человеколюбец: Таже, Мир всем. И диакон: Главы наша господеви приклоним. И глаголет иерей молитву тайно. Таже возглашает: Буди держава царствия твоего: И тако исходит иерей со диаконом, северными дверьми, предыдущим им двема светильникома, диакону же с кадильницею, нам же последующим. И поем стихиру храма, и исходим в притвор. И тамо кадит диакон святыя иконы, и настоятеля, и лики по чину: и станет на своем месте, и по совершении стихир, Слава, и ныне, богородичен. И посем возглашает диакон во услышание всем молитву сию: спаси Боже люди твоя, и благослови достояние твое, посети мир твой милостию и щедротами: Даже до конца. Лик: Господи помилуй, 40. Диакон: еще молимся о благочестивейшем, самодержавнейшем, великом господре нашем, императоре николае александровиче всея россии, о державе, победе, и прочая. еще молимся о супруге его, благочестивейшей господрне, императрице александре феодоровне. еще молимся о матери его благочестивейшей господрне императрице марии феодоровне. еще молимся о наследнике его, благоверном господре, цесаревиче и великом князе алексии николаевиче: и о всем царствующем доме. Лик: Господи помилуй, 30. Диакон: еще молимся о святейшем правительствующем синоде, [таже, о епискпе нашем, имярек, аще есть.] Аще ли обитель, и о архимандрите нашем имярек. Лик: Господи помилуй, 50. еще молимся, о еже сохранитися граду сему, и святей обители сей, и всякому граду, и стране: Лик: Господи помилуй, трижды. еще молимся и о еже услышати господу Богу глас моления нас грешных и помиловати нас. Лик: Господи помилуй, трижды. Посем возглашает иерей: услыши ны Боже спасителю наш: Лик: Аминь. Таже глаголет: Мир всем. Диакон глаголет: Главы наша господеви приклоним. И всем главы приклоньшим, иерей молится велегласно: владыко многомилостиве, Господи Иисусе Христе Боже наш: И по исполнении ея, мы: Аминь. Таже восклоньшеся поем стихиру воскресну. И входим в храм предходящим свещником, поюще и прочия стихиры воскресны, яже суть по алфавиту: Глаголем же припевы сия, 1: Господь воцарися, в лепоту облечеся. 2: Ибо утверди вселенную, яже не подвижится. 3: Дому твоему подобает святыня Господи в долготу дний. Слава, и ныне, богородичен. И свещники убо поставляются от обою страну, предукрасившуся четвероножцу, на немже лежит со пшеницею и пятию хлебы блюдо, еже имамы обычай приносити в церковь. От обою же страну два сосуда исполнена, ов убо вина, ов же елеа. Стоит же вино убо ошуюю, елей же одесную. Таже глаголет настоятель: Ныне отпущаеши: И чтец, Трисвятое: по Отче наш: Возглас: яко твое есть царство: И мы поем отпустительный тропарь Богородицы, глас 4: Богородице Дево радуйся: трижды. Тогда диакон взем благословение от священника, кадит окрест стола. Таже предстоятеля токмо, на месте его, и иереа. И паки хлебы спреди токмо. И глаголет молитву настоятель, или иерей велегласно: Господи Иисусе Христе Боже наш, благословивый пять хлебов, и пять тысящ насытивый: И подъем един хлеб знаменует с ним прочия хлебы: и егда речет, Сам благослови: И указует десницею на хлебы: Хлебы сия: Такожде на пшеницу, и вино и елей, Пшеницу, Вино, и елей: И по скончании молитвы, и по Амине поем: Буди имя господне благословено от ныне и до века, трижды, на глас 4-й. Таже псалом 33, благословлю Господа на всякое время: И глаголем его до Не лишатся всякаго блага. иерей же шед станет пред царскими враты, зря к западом. И по скончании псалма, глаголет: благословение господне на вас: И чтец, аминь. И глаголет начало чтения. И священник: молитвами святых отец наших: И извлачаются священник и диакон священных одежд, и исходят. И тако сядут вси кождо на своих местех. Келарь же взем от хлеб благословенных, и раздробив на блюде, раздает братии, и почерпает по единой чаши вина всем равно, от настоятеля и до последних, иже во обители суть. [Ныне же сей чин весьма в церквах упразднися]. И полагается чтение в деяниих святых апостол.
[Зри] Ведомо же буди: яко от недели святыя пасхи, даже до недели всех святых, по благословении хлебов, чтутся деяния святых апостол. В прочия же недели всего лета чтутся седмь соборная послания апостольская, и четыренадесять посланий святаго апостола павла, и откровение святаго апостола Иоанна богослова. егда же раздаст келарь братии хлебы, и по единой чаши вина, труда ради бденнаго, якоже из начала прияхом от святых отец, и шед творит обычный поклон, со служившими с ним по два в ряд, пред святыми дверьми, и на оба лика по единому, и исходят. В вечер же, по приятии хлеба и вина по черпании, от того часа, да никтоже уже дерзнет вкусити потом что, причащения ради святых пречистых христовых таин.
Сицево же раздробление хлебов творим, и почерпание.
От перваго дне месяца септемвриа, до 25 дне марта. А яже во бдениих летних, благословенныя хлебы, раздаваем я на трапезе, и прежде вкушения снедаем их.
[Зри] благословенныя же имут хлебы дарования различна:
Рекше, уставляют огневицу пиющим с водою, и трясавицу отгонят, и всяк недуг и всяку болезнь исцелевают: к сим же и мыши от жит отгонят и ина пакостящая прогоняют.
По чтении же великом деяний святых апостол, исходит параекклисиарх, и клеплет в великий, и в прочия кампаны.
Воставшу же предстоятелю, и всем братиям, начинает: аминь. Слава в вышних Богу, и на земли мир в человецех благоволение, трижды. Таже глаголет: Господи устне мои отверзеши, и уста моя возвестят хвалу твою, дважды. И глаголет шестопсалмие кротким и тихим гласом. По триех же псалмех, Слава, и ныне, аллилуиа, трижды. Господи помилуй, трижды. Слава, и ныне: Господи Боже спасения моего: Тогда иерей во епитрахилии, инде же и в фелони, глаголет молитвы утренния пред святыми дверьми стоя откровен. По скончании же шестопсалмия, по Слава, и ныне: глаголет великую ектению: Миром господу помолимся. И по возгласе отшед стоит на своем месте. учиненный же канонарх, иже прокимены на вечерни сказует, сотворив поклон предстоятелю, и возглашает: Бог господь: со стихи его, в настоящий глас. И поем тропарь воскресный, дважды: Слава, святаго, того дне: И ныне, богородичен, по гласу тропаря святаго, аще имать. Аще ли ни: Слава, и ныне, богородичен настоящаго гласа. И абие лик глаголет: Господи помилуй, трижды. Слава отцу, и сыну, и святому духу. Чтец же, И ныне: И стихологисует кафисму псалтира: Исповемся тебе Господи всем сердцем моим. По исполнении же коеяждо стихологии, отшед священник пред святыя двери, глаголет малую ектению: И возглас, яко обычай. И поем седален воскресн прежде просто. Таже припев: воскресни Господи Боже мой, да вознесется рука твоя, не забуди убогих твоих до конца, и 2 седален: Слава, и ныне, богородичен. И посем полагается чтение во евангелии толковом. Таже кафисма, и седален 2-й. Припев: Исповемся тебе Господи всем сердцем моим, повем вся чудеса твоя. Слава, и ныне, богородичен его. И чтение. и поем поем непорочны, на глас 5: в нихже кадит иерей. Таже тропари, Ангельский собор: впакои гласа и чтение. Таже степенны гласа, в нихже исходит кандиловжигатель, и ударяет в кампаны. иерей же и диакон, вшедше во святилище облачатся по обычаю. И глаголет: Вонмем, премудрость. Канонарх же сказует: Прокимен, псалом давидов, гласа. По совершении же прокимена, диакон: господу помолимся. иерей: яко свят еси Боже наш: Лик: Аминь. И канонарх: Всякое дыхание да хвалит Господа. Стих: Хвалите бога во святых его: хвалите его во утвержении силы его. Диакон же глаголет: И о сподобитися нам слышанию святаго евангелиа, Господа бога молим. Лик: Господи помилуй, трижды. Диакон: Премудрость, прости услышим святаго евангелиа. иерей: Мир всем. Лик: И духови твоему. Посем иерей именует евангелиста, от негоже евангелие. Лик: Слава тебе Господи, слава тебе. Диакон, Вонмем. И чтет иерей евангелие воскресно рядовое. По чтении лик паки: Слава тебе Господи, слава тебе. Посем глаголем: воскресение христово: и псалом 50. Сему же глаголему, исходит священник святыми дверьми со евангелием, держя е при персех своих, предыдущема же его от обою страну двема подсвещникома со свещами: имеяй же и фелонь отпущен долу, стоит посреде храма, держя святое евангелие при персех своих, подсвещники же от обою страну. И приходит предстоятель един, и творит поклоны два, таже целует евангелие, и паки творит поклон един: [не до земли творит поклоны, но малыя, приклоняя главу, дондеже рукою достигнет до земли. В неделю бо и владычний праздник, и в пятьдесятницу всю, колена не приклоняют.] По внегда же поклонится евангелию предстоятель, творит и к левому лику образ поклона, и к десному подобно, отходя на место свое. Таже и братия вси идут два два по чину, творят и тии подобне прежде два поклонения, и целуют святое евангелие: и паки едино поклонение, и к настоятелю поклон. Исполншуся же целованию, и 50-му псалму, Поем, Слава: молитвами апостолов: И ныне, молитвами Богородицы: Таже, Помилуй мя Боже, по велицей милости твоей: Посем стихира воскресна, глас 6: воскрес Иисус от гроба, якоже прорече: По целовании же святаго евангелиа, [осеняет иерей братию со евангелием,] и входит во святый олтарь. Диакон же глаголет на обычном месте молитву: спаси Боже люди твоя: Мы же, Господи помилуй, 12. иерей же возглас: милостию и щедротами: и по амине начинаем ирмос канона воскресна. И поем канон воскресн со ирмосом на 4: и крестовоскресен на 3: и Богородицы на 3: и минеи на 4. К 1-му же тропарю припев: Слава Господи святому воскреснию твоему. Таже припевы песней воскресных, [писаны во ирмологии.] И по иснолнении 3-я песни, диакон глаголет ектению малую: и возглас от священника внутрь олтаря: яко ты еси Бог наш: И изоблачаются священных одежд, изшедше же стоят на обычных местех. Таже кондак, и седален минеи святаго. И чтение. По 6-й же песни священник глаголет ектению малую пред святыми дверьми, и возглас: Ты бо еси царь мира: Таже кондак воскресн: И икос. И чтем пролог.
[Зри] Ведомо же буди и сие: яко всегда по конце 8-я песни, егда хощем начати 9-ю песнь, творим вси метание единоравно глаголюще: Хвалим, благословим, покланяемся господеви: Таже ирмос 8-я песни, катавасиа. иерей же и диакон облачатся обычно. И по скончании 8-я песни покадив святую трапезу, возглашает диакон: богородицу и матерь света песньми возвеличим. И мы стихословим 9-ю песнь, поюще велегласно: Величит душа моя Господа: и честнейшую херувим. Творим же и поклоны малыя. иерей же, или диакон, кадит святый олтарь, и всю церковь, и братию. По 9-й песни возвращься, и отдав кадило, глаголет ектению малую: И возглас от священника: яко тя хвалят вся силы небесныя: Таже возглашает диакон: свят Господь Бог наш, в настоящий глас. Стих 1: яко свят Господь Бог наш. Стих 2-й: Над всеми людьми Бог наш. священник стоит на обычном месте. И посем светилен воскресн. Таже Слава, святаго, аще имать. И ныне, богородичен воскресн. На хвалитех: Всякое дыхание, на глас дне. Поставим же стихов, 8: и поем стихиры октоиха воскресны, 4: и анатолиевы, 4. На всякое же дыхание, совокупльшимся обоим ликом, припеваем и припевы сия: 1: воскресни Господи Боже мой, да вознесется рука твоя, не забуди убогих твоих до конца. 2: Исповемся тебе Господи всем сердцем моим, повем вся чудеса твоя. Слава, стихира евангельская, ряд. И ныне, богородичен, глас 2: Преблагословенна еси Богородице: Славословие великое. Таже тропарь воскресн, един от обою, гласа 1-го: Днесь спасение миру бысть: Или гласа 2-го: воскрес от гроба: Таже ектению глаголет иерей, или диакон: Помилуй нас Боже: И возглас: яко милостив и человеколюбец: Посем: Исполним утреннюю молитву: Возглас: яко Бог милости и щедрот: иерей: Мир всем. Лик: И духови твоему. Диакон: Главы наша господеви приклоним. иерей молитву тайно. Таже, возглас: Твое бо есть еже миловати: Посем, Премудрость. Лик: благослови. иерей: Сый благословен Христос Бог наш: И лик: Аминь: утверди Боже: Посем иерей: Пресвятая Богородице: Лик, честнейшую: И прочее обычное, и отпуст. И многолетствуем императора. Таже творим исхождение в притвор, поюще стихиру самогласну, яко обычай, и оглашение студитово. По чтении же тропарь святаго феодора, глас 8: Православия наставниче: И час 1. На 1-м часе тропарь воскресн. Слава, святаго, аще имать: аще же ни: И ныне, богородичен часов. По Отче наш: кондак воскресн. И совершенный отпуст. На Литургии: блаженна осмогласника на 8. По входе тропарь воскресн: Таже храма, и святаго дневнаго, аще имать. Кондак воскресн, и храма: Слава, святаго, аще имать: И ныне, храма Богородицы. Аще же ни, И ныне, кондак: Предстательство христиан: Христова же храма тропаря и кондака в неделю На Литургии не глаголем во весь год: понеже предваряет воскресн. Прокимен, апостол, аллилуиа, и евангелие гласа, и святаго, аще имать. Причастен: Хвалите Господа с небес: Таже святаго, аще имать.
[Зри] На Бдении Всенощнаго Пения. егда бывает полиелей, и поют псалом: Хвалите имя господне: и Исповедайтеся господеви: тогда поставляется аналогий среди церкве, и на нем полагается праздничная икона господскаго дне, или Богородицына, или святаго, и святыя: и облачаются настоятель во святилищи и вси священнослужители в фелони по обычаю, и изшедше из олтаря во отверзенная царская врата, станут по дву странам около аналогиа. И раздает настоятель сослужителем, и стоящему во храме святем народу свещи. По раздаянии же взем кадило, емуже предходит диакон со свещею горящею, кадит первее на аналогии икону окрест, и идет во олтарь, и тамо святую трапезу, и олтарь весь кадит, и во храме святыя местныя иконы вся, таже священнопредстоятелей по обоим странам, и правый лик певцев, и левый. Посем кадит преходя стоящий народ весь, и паки святыя двери, и две точию иконы, христову и Богородицыну, и на аналогии. В тоже время поют величание, со избранными стихи от псалмов давидовых. По сем обычном пении ектениа от диакона малая глаголется, и седальны поются, и входят вси священнослужители во святый олтарь, и изоблачаются священных одежд, точию держай чреду иерей остает во облачении, к прочитанию евангелиа. Но и в неделю на Утрени, егда кроме полиелеа поется кафисма: блажени непорочнии: и по ней тропари: Ангельский собор: и во иныя дни кому поется величание кроме бдения, и тогда иерей с диаконом точию облачатся во священныя одежды, и вземлют, диакон светильник со свещею горящею, иерей же кадило, и покадив окрест святую трапезу и олтарь весь, исходят северными враты, и кадит царския двери, и по странам святыя иконы, и на аналогии, таже настоятеля и лики, и стоящий народ, якоже обычай, и паки входят во врата южныя страны.
Чин о панагии, бываемый во обителех по вся дни.
По отпусте божественныя литургии, исходит настоятель, и братии последующим по нем два, два. и глаголют псалом 144: Вознесу тя Боже мой, царю мой: весь до конца. Достигше же в трапезу, и кончану бывшу псалму, глаголем молитву трапезы: Отче наш: Слава, и ныне: Господи помилуй, трижды. благослови: Настоятель, или священник держай чреду глаголет: Христе Боже, благослови ястие и питие рабом твоим: И часть или просфора имущая возношена быти, влагается в панагиар, и стоит на устроенном месте. И по вкушении творяй служение, глаголет стих: молитвами святых отец наших, Господи Иисусе Христе Боже наш, помилуй нас. И мы: Аминь. И воставше глаголем: благословен Бог милуяй, и питаяй нас от юности нашея: Слава тебе Господи, слава тебе святый, слава тебе царю. Слава, и ныне: Господи помилуй, трижды. благослови. И положив поклон хотяй возвысити пресвятую, глаголет сице: благословите отцы святии, простите ми грешному. И мы: Бог простит ти, и помилует тя. И прием часть крайними персты рук, возвышает ю мало над образом святыя троицы, глаголя велегласно: Велико имя: Настоятель или иерей чредный: святыя троицы. И пренося над образ Богородицы крестовидно знаменует, глаголя: Пресвятая Богородице, помогай нам. И мы: Тоя молитвами Боже помилуй, и спаси нас. И глаголем: блажим тя вси роди Богородице Дево: Таже поем: Достойно есть яко воистинну: И по еже причаститися всем, глаголет настоятель или священник: Во многия молитвы пречистыя владычицы нашея Богородицы, и приснодевы марии. Мы же: Тоя молитвами Боже помилуй, и спаси нас. милостив и щедр господь, пищу даде боящимся его, и правда его пребывает в век века. Таже псалом: Возвеселихся о рекших мне, в дом господень пойдем. Трисвятое, Пресвятая Троице: По Отче наш: благодарим тя Христе Боже наш, яко насытил еси нас земных твоих благ: И аще убо есть владычний праздник, глаголется, Слава и ныне, кондак празднику: аще ни, глаголем сия: Слава, Боже отец наших, творяй присно с нами: И ныне, молитвами Господи всех святых: Господи помилуй, трижды. благослови. священник глаголет: благословен Бог милуяй, и питаяй нас от своих богатых даров, своею благодатию и человеколюбием, всегда, ныне и присно, и во веки веков, аминь.
В субботу вечера, На Велицей Вечерни предначинательный псалом, с припевы его. По обычной стихологии, На Господи воззвах, поставим стихов 8: и поем стихиры воскресны гласа, три: и анатолиев един: и святаго 6. Слава, святаго: И ныне, богородичен первый, гласа. Вход, прокимен, и чтения святаго 3. На литии стихира храма, и святаго стихиры: Слава, святаго: И ныне, богородичен, в тойже глас, от стиховных поемых в неделю. На стиховне стихиры воскресны: Слава, святаго: И ныне, богородичен в тойже глас. На благословении хлебов тропарь, Богородице Дево, дважды: И святаго, единожды: и чтение. На Утрени, на Бог господь, тропарь воскресн, дважды. Слава, святаго: И ныне, богородичен первый, по гласу тропаря святаго. По кафисмах, седальны воскресны, с припевы, и богородичны их, настоящаго гласа. И чтение во евангелии. По полиелеи, тропари: Ангельский собор: Таже впакои гласа, и седальны оба святаго. Слава, полиелейный седален: И ныне, богородичен его: И чтение святаго. Степенна гласа, и прокимен: Всякое дыхание: евангелие воскресно. воскресение христово: и псалом 50, и целование евангелиа по обычаю. Слава, молитвами апостол: И ныне, молитвами Богородицы: И стихира воскресна, и прочее. Канон воскресн со ирмосом на 4: и Богородицы на 2: и святаго на 8. Катавасиа, якоже имать устав. По 3-й песни кондак и икос святаго, и седален его дважды: Слава, и ныне богородичен, и чтение. По 6-й песни кондак воскресн, и икос. И чтем пролог. На 9-й песни поем честнейшую: Светилен воскресн: Слава, святаго: И ныне, богородичен воскресн. На хвалитех стихиры воскресны, 4: и святаго, со Славным 4: с припевы их вечерними. Слава, стихира евангельская: И ныне, Преблагословенна еси Богородице Дево: Славословие великое. По трисвятом тропарь воскресн точию, ектении, и отпуст. И исхождение обычное в притвор. И поем стихиру святаго. егда же елеепомазание бывает, глаголется и молитва: владыко многомилостиве: яко предписася на Велицей Вечерни. И оглашение студитово, и час 1-й. На часех тропарь воскресн: Слава, святаго: И ныне, богородичен часов. По Отче наш: кондак святаго. На прочих же пременяюще глаголем. На Литургии, блаженна гласа, на 6: и святаго песнь 3-я, на 4. По входе тропарь воскресн и храма Богородицы, идеже храм ея: и святаго. Кондак воскресн: Слава, святаго: И ныне, Богородицы храма. Аще ли ни: И ныне, Предстательство христиан: [Тропари же и кондаки храмом святых в сия дни не глаголются] Прокимен, апостол, аллилуиа, евангелие и причастен, прежде воскресн, таже святаго.
Чин благословения колива, сиесть кутии или вареныя пшеницы с медом смешенныя, и различными сладкими овощьми украшенныя, в честь и память господских праздников, или святых Божиих в церковь приносимыя.
Принесену бывшу коливу в церковь: Аще на вечерни, по Ныне отпущаеши: Трисвятое. По Отче наш: тропарь. Слава, и ныне, богородичен, по гласу тропаря святаго. Аще же На Литургии, по заамвонней молитве поется тропарь и кондак святаго. Диакон покадив глаголет: господу помолимся. Лик, Господи помилуй. священник став над коливом глаголет молитву сию: Вся совершивый словом твоим Господи: зри в служебнике. Лик, Аминь. И аще на вечерни, диакон: Премудрость. Лик, благослови. священник: Сый благословен: И прочее до отпуста. Аще же На Литургии, поет лик: Буди имя господне, трижды. и псалом: благословлю Господа: Раздав же антидор, творит обычный отпуст литургии.
На Велицей Вечерни, по кафисме, На Господи воззвах стихиры воскресны 3, и анатолиев 1: и святаго, 6: Слава, святаго, И ныне, богородичен 1-й гласа. Вход. Прокимен дне: И чтения святаго, 3. На литии стихира храма, и святаго аще имать. Слава святаго: И ныне, богородичен 1-й, по гласу святаго. На стиховне стихиры воскресны гласа. Слава, святаго: И ныне богородичен, по гласу святаго. На благословении хлебов, тропарь: Богородице Дево: трижды. На Утрени, на Бог господь: тропарь воскресн, дважды. Слава, святаго: И ныне, богородичен воскресн, по гласу тропаря святаго По. кафисмех седальны воскресны, и с богородичны их, и чтение во евангелии толковом. Полиелей святаго, впакои, и седальны святаго, по единожды. Слава, седален святаго полиелейный: И ныне, богородичен, и чтение святаго. Степенна гласа: и прокимен. евангелие воскресно. воскресение христово: псалом 50: стихира воскресна. Канон воскресн со ирмосом на 4: и крестовоскресн на два: и Богородицы на два: и святаго на 6. Аще святаго два канона: оба канона на 8, а крестовоскресн оставляем. По 3-й песни кондак и икос, и седален святаго, дважды: Слава, и ныне, богородичен его, и чтение. По 6-й песни кондак воскресн, и икос: И чтем пролог. На 9-й песни поем честнейшую: Светилен воскресн. Слава, святаго: И ныне, богородичен воскресн гласа. На хвалитех стихиры воскресны гласа, на 4: и святаго на 4, и со Славным, с припевы его вечерними. Слава, стихира евангельская. И ныне, Преблагословенна еси Богородице Дево: Славословие великое. Тропарь воскресн точию. ектении: И отпуст. И исхождение, и оглашение, и час 1 в притворе. На 1-м часе тропарь воскресн: Слава, святаго: И ныне, богородичен часов. По Отче наш, кондак святаго. На прочих же, кондак воскресн, и святаго, пременяюще глаголем. На Литургии блаженна гласа, на 6: И святаго, песнь 3, на 4. По входе тропарь, и кондак, якоже предписася во главе 3: прилагаем же тропарь и кондак, и храма святаго.
В субботу вечера, на Велицей Вечерни, по кафисме: На Господи воззвах, стихиры воскресны, 3: и анатолиевы, 3: и святаго, 4. Слава, святаго: И ныне, богородичен первый гласа. Вход. Прокимен дне, и ектениа, Рцем вси: На литии стихира храма: Слава, святаго, аще имать. Аще же ни, Слава, и ныне, богородичен. [Аще же имать святый славословие, поем стиховну его в литию.] И обычныя молитвы литии. На стиховне стихиры воскресны. Слава, святаго: И ныне, богородичен воскресн, по гласу святаго. И прочее бдения по обычаю. На Утрени, на Бог господь, тропарь воскресн, дважды. Слава, святаго: И ныне, богородичен первый, по гласу тропаря святаго, и прочее и до канона воскресно. Канон воскресн со ирмосом на 4: и крестовоскресн на два: и Богородицы на два: и святаго на 6. Катавасиа по уставу. По 3-й песни кондак и икос, и седален святаго, дважды, и богородичен его. И чтение святаго. По 6-й песни кондак воскресн, и икос: и чтем пролог. На 9-й песни поем: честнейшую: Светилен воскресн: Слава, святаго: И ныне, богородичен воскресн гласа. На хвалитех стихиры воскресны 4, и святаго со Славным, 4. Аще ли не имать святый на хвалитех стихир, поем стихиры воскресны по обычаю. Слава, стихира евангельская: И ныне, Преблагословенна еси Богородице Дево: Славословие великое, тропарь воскресн точию. ектении обе, и отпуст, и оглашение: и час 1-й в притворе. На 1-м часе тропарь воскресн: Слава, святаго: И ныне, богородичен часов. По трисвятом кондак воскресн, и прочее. [Аще имать святый славословие, по трисвятом кондак святаго: На прочих же часех, кондак воскресн и святаго пременяюще глаголем,] и отпуст. На Литургии блаженна гласа, на 6: и святаго песнь 3-я, на 4. По входе тропарь воскресн, и храма Богородицы, идеже храм ея: таже храма святаго: посем рядоваго святаго. Аще ли есть другий святый, и тропарь ему прилучится, глаголем тропарь и другаго святаго. Таже кондак воскресн и храма: Слава, кондак дневнаго святаго, И ныне, Богородицы храма. Аще ли храма Богородицы несть: Слава, кондак рядоваго святаго: И ныне, Предстательство христиан: Прокимен, апостол, аллилуиа, евангелие, и причастен, прежде воскресн, и потом святаго.
[Зри] Подобает ведати: яко стихологиа, сиречь кафисма, в неделю вечера никогдаже бывает. Такожде и на господския праздники, и великих святых, или в храме святаго, или святыя: яве яко в нихже бывают бдения. егда же прилучится бдение, кроме субботы вечера, стихологисуем: блажен муж 1-й антифон. В субботу же вечера стихологисуем всю кафисму: блажен муж.
Подобает ведати: яко всего лета суть седмиц 52, в нихже творим на куюждо неделю бдение, яко да изочтенным бывшим всем воскресным бдениям всего лета, обретаются 52. Бывают же убо и во владычних праздниках, на кийждо месяц бдения. Вкупе же убо и со инеми бывают всего лета бдений 68. Суть же и ина бдения, яже укажутся по именом, во уставе на ряду своем, где кое писано есть, ихже аще предстоятель произволит, аще зрит своя церковники бодростне о спасениих своих тщащихся. есть же и ино бдение к сим святаго храма, во обители, еже должно есть бывати, и никакоже оставлятися в память его.
Вестно же буди, яко в малых обителех и соборных и приходских храмех, во дни недельныя, идеже всенощныя не бывают, или настоятель не изволит, поется вечерня великая, такожде и утреня во свое время сице:
В субботу вечера, по отпусте 9-го часа, входит в церковь предстоятель и чредный священник, и вси: емляй же священник благословение от предстоятеля, отходит пред царская врата, и творит поклонения три. Взем же и епитрахилий, и благословив и, и целовав верх, идеже есть крест начертан: и возложив на выю свою глаголет: благословен Бог наш: отверзаяй и внутреннюю завесу сущую тафтою, или иным видом устроеную. Предстоятель же глаголет: Приидите поклонимся: и предначинательный псалом. Аще же предстоятеля не случится тамо, глаголет ин от старейших священников: священник же чредный стоит пред царскими вратами, глаголя тайно молитвы светильничныя, стоя непокровен. Глаголет же и ектению, и возглас подобне, и прочее вечерни все поем, якоже предписася во бдении великия вечерни: точию зде по ектении: Исполним вечернюю молитву нашу: поем на стиховне стихиры воскресны, и по исполнении их глаголет предстоятель: Ныне отпущаеши: Чтец глаголет: Трисвятое с прочими. священник, возглас: яко твое есть царство: внутрь святаго олтаря. И чтец, отпустительныя тропари по обычаю. Диакон же, от вне стоя пред образом спаса Христа, возглашает: Премудрость. Лик: благослови. священник, от внутрь глаголет: Сый благословен Христос Бог наш, всегда, ныне и присно, и во веки веков: Лик: Аминь. утверди Боже, благочестивейшаго, самодержавнейшаго, великаго господря нашего императора николая александровича, и святую православную веру: и прочая. И священник глаголет тихим гласом: Пресвятая Богородице, спаси нас. Лик: честнейшую: И паки священник: Слава тебе Христе Боже, упование наше, слава тебе. И глаголет лик: Слава, и ныне: Господи помилуй, трижды. благослови. священник же отверз святыя двери, и опустив фелонь, стоящу диакону от вне одесную, и орарь держащу обычно, глаголет иерей отпуст по дню. [Зри] Посем многолетие. И по еже вечеряти братиям, емлет паки благословение церковник от предстоятеля, аще есть: аще же ни от чреднаго священника. И клеплет в малый кампан, или в ручное клепало, по обычаю. И собравшимся братиям в притвор, творит начало чредный священник, и поем повечерие, яко обычай с каноном. И по обычном отпусте предстоятель глаголет: молитвами святых отец наших, Господи Иисусе Христе Боже наш, помилуй нас. Братия же исходяще, два, два, по чину, творят поклон пред предстоятелем, и емлют от него благословение и прощение: Таже предстоятель, сотворив образ поклона, просит и сам прощения от них.
Во утрии же: Клеплет параекклисиарх в кампан, яко обычай, и в било, и собираются братия в притворе, творит же священник начало: благословен Бог наш: И абие чтец глаголет: Слава тебе Боже наш, слава тебе. царю небесный: Трисвятое, и по Отче наш: Господи помилуй, 12. Приидите поклонимся: трижды: и псалом 50. Таже поется троичный канон, со благоговением и умилением. По каноне же поют троичное величание, сиесть: Достойно есть яко воистинну, славити тя бога слова: И прочия тропари. Таже трисвятое, и Отче наш: и впакои гласа: Господи помилуй, 40. Слава, и ныне, честнейшую херувим: И возглас от священника: Боже ущедри ны: И молитва глаголется от иереа: Всемогущая и животворящая: И отпуст, и прощение обычное. Таже иерей глаголет ектению: Помолимся о благочестивейшем: Мы же: Господи помилуй, кротким и тихим гласом. И по исполнении тоя глаголет предстоятель: молитвами святых отец наших, Господи Иисусе Христе Боже наш, помилуй нас. И по отпусте входим во храм. священник же вшед во святый олтарь, и возложив епитрахилий и вложив фимиам в кадильницу, предуготовлене ей от церковнаго служителя, глаголет и обычную молитву кадила, стоя пред святою трапезою начертаваяй крест с кадильницею, глаголя: благословен Бог наш всегда, ныне и присно, и во веки веков: отверзаяй прежде и тафтою устроеную завесу, сущую внутрь царских врат. Таже кадит святую трапезу окрест, и весь жертвенник: И исходит северною страною, и кадит святыя иконы, и предстоятеля, и вся яко обычай. Чтец же, по благословен Бог наш, глаголет, Аминь. Приидите поклонимся: и обычныя псалмы: услышит тя господь: и Господи силою твоею: Трисвятое, и Отче наш: [Зри] Долженствует же внимати чтец и священник, егда имать рещи: яко твое есть царство: быти ему посреде храма.] Таже тропари: спаси Господи люди твоя, и прочая. И священник кадит паки предстоятеля, и святыя иконы: и входит во святый олтарь южною страною, и стоит пред святою трапезою с кадильницею, и глаголет ектению: Помилуй нас Боже, по велицей милости твоей, и прочая. Таже возглас: яко милостив и человеколюбец Бог еси: Певцы, Аминь. Именем господним благослови, отче. Таже священник начертаваяй с кадильницею крест пред святою трапезою, глаголет возгласно: Слава святей, и единосущней, и животворящей, и нераздельней Троице, всегда, ныне и присно, и во веки веков. Предстоятель же глаголет: Слава в вышних богу: И шестопсалмие, яко обычай. священник же полагаяй кадильницу на месте, исходит из олтаря, и стоит на обычном месте своем. По внегда же рещи предстоятелю три псалмы, и начнет: Господи Боже спасения моего: отходит священник пред царския и святыя двери: И поклонився и возложив епитрахилий, глаголет тайно утренния молитвы, и ектению, яко обычай. И прочее утрени, все поем, якоже предписася во бдении утрени, на обороте, даже до конца: и час 1-й, и На Литургии.
[Зри] Ведомо же буди, яко, Верую во единаго Бога, и Отче наш, в литургии: В вечерне предначинательный псалом. Свете тихий: Сподоби Господи: Ныне отпущаеши: На Утрени, Шестопсалмие: Тебе слава подобает: Слава в вышних Богу, и на земли мир: благо есть исповедатися господеви: небесный царю: Предстоятель глаголет. Трисвятое же и Отче наш, на вечерни, по Ныне отпущаеши, и на Утрени, по благо есть исповедатися господеви, чтец глаголет.
[Зри] Подобает ведати, яко приходящему господскому празднику, или Богородицы, и оба праздника предтечева, рождество и усекновение, и святых апостол петра и павла, и Иоанна богослова, или аще будет храм: должно есть прочитати апостол, и евангелие рядовое, хотящее быти тогда в самый день праздника, за день напредь прежде праздника, под зачало. На самый же праздника день, чтем праздника единаго, якоже и вся служба.
подобает ведати, и о святей божественней службе:
Яко в субботу убо, в начале 4-го часа должно есть начинати: яко да станет трапеза в начале 5-го часа. В неделю же, в начале 3-го часа, должно есть начинати, яко да станет трапеза в начале 4-го часа. Тако же подобает бывати и в господския великия праздники, христовы, и богородичны, и предтечевы, и обоих верховных апостол, петра и павла: и в сих убо купно, яко во дни недельныя должно есть творити. В средния же праздники в начале 5-го часа, яко да станет трапеза в начале 6-го часа. В малыя же праздники, равно прочим всем дневным в начале 5-го, и отдается во свое время на кийждо день. Трапезу же подобает уготовляти во время свое, противу коемуждо дню, или постен есть, или прост: отходит яве кийждо по скончании святыя службы, и во время трапезы паки собираются. Сему же должно есть бывати, егда хотят ясти в 9-й час, или вечер. Сице же убо подобает творити и в малыя четыредесятницы. Сей предел о литургиах и трапезе писася во странах иерусалимских, и лепотственно тако быти везде в равнины весненныя и есенныя. В лете же и зиме в велицей россии зде быти знамению по разсуждению времене, в лете убо долготы ради дне лепотственно продолжити: в зиме же за малость дне упредити, разсуждением настоятеля.
о еже како подобает знаменати на всяк день. зде же указание о вечерни, и о утрени дней седмичных, и в нихже поем аллилуиа: и о 1-м часе.
Пред вечером мало, кандиловжигатель взем благословение от настоятеля, знаменует в кампан, и собравшимся братиям в притвор церковный, чредный же священник востав творит начало: благословен Бог наш: И учиненный чтец глаголет: Слава тебе Боже наш: и прочее. И чтет 9-й час с междочасием его, аще и Бог Господь будет, и по конце его знаменает в два, или 4 кампана, по уставу.
[Зри] Вестно буди, егда 9-й час глаголется в притворе, тогда творит священник 9-го часа отпуст.
По отпусте же вшед во храм, творит начало вечерни по обычаю. [Аще же глаголется 9-й час во храме, отпуст 9-го часа не бывает.] По скончании же клепания востав священник, вшед во храм творит пред царскими враты поклонения три: вземлет же и епитрахилий сущий у царских врат, благословив и, и целовав верх, идеже начертан крест, возложив на выю свою, глаголет: благословен Бог наш: отверзает же и внутреннюю дверь, сиречь завесу, тафтою, или иным видом устроену. Предстоятель же глаголет: Приидите поклонимся, трижды: И предначинательный псалом. аще есть аллилуиа, и творим 3 поклоны, стояще на местех своих рядом, уравняющим поклоны всем вкупе со опасением. [Тако убо поклоняющимся, несмущения ради церковнаго.] Сему же глаголему, чтет священник молитвы светильничныя пред святыми дверьми стоя непокровен, и по исполнении того, Слава и ныне, аллилуиа трижды, и поклоны 3. Таже священник глаголет ектению великую, и возглас. И посем кафисма обычная ряду: и по коейждо Славе, аллилуиа трижды, и поклоны три. священник же положив епитрахилий на месте его, и отшед стоит на обычном месте своем, дондеже стихословится кафисма псалтира: в конец же третияго антифона, отходит пред святыя двери, возложив на ся епитрахилий, глаголет малую ектению и возглас. Таже вшед во олтарь, вложив фимиам в кадильницу, и благословляяй е глаголет и обычную молитву кадила: и кадит по обычаю святилище, и храм весь, настоятеля и лики, и всю братию. И посем: Господи воззвах, поем во глас минеи, стихиры Богородицы: И оставим стихов 6: И поем Богородицы стихиры, подобны 3: и святаго подобны 3: Аще убо имать святый самогласну стихиру, и поем ю на Славу, купно оба лика. Аще ли ни: Слава, и ныне, богородичен: подобный стихирам минеи. Аще среда, или пяток, поем крестобогородичен. Таже, Свете тихий: глаголет предстоятель, и поем прокимен дне. [Зри] Аще есть неделя: аллилуиа бо в неделю вечера не поется, но прокимен: Се ныне благословите Господа вси раби господни. Глаголет канонарх стих: Стоящии во храме господни: Аще же кроме недели, вместо прокимена аллилуиа, на глас 6. Стихи же глаголет сия: В понедельник вечера: Господи да не яростию твоею обличиши мене: Аллилуиа. Стих: И во веки веков. Мы же высочайшим гласом поем Аллилуиа. [Сице припеваем на всяк день, егда поем Аллилуиа.] Во вторник и в четверток вечера: Возносите Господа бога нашего, и покланяйтеся подножию ногу его, яко свято есть. В среду вечера: Во всю землю изыде вещание их. И тако творит поклон ко святым дверем. и обращься творит братиям един поклон: И отшед станет на месте своем. Таже настоятель, или учиненный чтец глаголет: Сподоби Господи в вечер сей: в немже творим и метания 3. Таже обычной ектении бывшей, и возглашению ея. И совокупльшеся оба лика среди церкве по обычаю, поем на стиховне стихиры во октоихе: Слава, и ныне, богородичен. Аще ли среда, или пяток, крестобогородичен. И сотворше друг другу метание, идем на места своя. Таже предстоятель, или чтец глаголет: Ныне отпущаеши: и трисвятое, и поклоны 3. По Отче наш, возглас: яко твое есть царство: Таже тропарь, глас 4: Богородице Дево радуйся: и поклон един. Слава, крестителю христов: и поклон един. И ныне, Молите за ны: и поклон един. Под твое благоутробие прибегаем: без поклона. Господи помилуй, 40, кротким и тихим гласом, и равно вси. Таже, Слава, и ныне: честнейшую херувим: Именем господним благослови отче: И глаголет иерей: Сый благословен: Мы же: Аминь. И настоятель: небесный царю: И по конце того творим 3 поклоны великия, глаголюще в себе молитву, якоже указася во главе постной: Господи и владыко живота моего: И прочих поклонов 12, глаголюще в себе кийждо: Боже, очисти мя грешнаго. И по сих молитву вышеписанную, глаголем во едино: и поклон един великий. Таже трисвятое, и поклоны 3, и по Отче наш: Господи помилуй, 12. Аще ли в неделю вечера, по молитве, небесный царю: творим 3 поклоны великия. Прочих же поклонов 12 не творим: ниже трисвятое конечное глаголем: Но глаголет иерей: Слава тебе Христе Боже: И отпуст. И обычное исхождение в притвор. И бывает литиа о усопших. И конечный отпуст.
[Зри] Сице убо творим воследование на вечерни всего лета, егда поем аллилуиа. егда же поется Бог господь: поем прокимен дне. Таже, Сподоби Господи: и стиховна дне. По Ныне отпущаеши: трисвятое, и по Отче наш, тропарь святаго: Слава, и ныне, богородичен, и ектениа от священника: Помилуй нас Боже, по велицей милости твоей: и прочая. И по возгласе, Премудрость. И мы: благослови. священник: Сый благословен Христос Бог наш, всегда, ныне и присно, и во веки веков. И мы: Аминь. утверди Боже, благочестивейшаго, самодержавнейшаго, великаго господря нашего императора николая александровича, и святую православную веру, православных христиан во век века. И отпуст по обычаю. В неделю же вечера, поклоны начинаем, от Сподоби Господи в вечер сей: По отпусте же вечерни входим в трапезу, и ядим представленная. Таже востав параекклисиарх, прием благословение, изшед ударяет в било. И вшед в притвор, поем повечерие по чину. На нем же поем канон молебный пресвятей Богородице, во осмогласнике, и прочая по обычаю. И отпуст. В прочия же дни поем повечерие великое.
[Зри] Должно есть и сие ведати: По отпущении ея, не подобает монахом творити беседы друг со другом, но с молчанием исходити в келлии своя, и упражнятися на молитву и на чтение, и тако упокоятися: яко да со вниманием на утреннее славословие востанем бодростне. Во утрии же знаменует параекклисиарх в малый кампан, редким ударением, на мног час: и собираемся вси в притвор церковный: И став по чину кийждо на своем месте, сотворше обычныя своя три поклоны, седим мало, за еже утишитися чувством нашим. Таже востав иерей, творит начало: И по амине чтец глаголет: Слава тебе Боже наш, слава тебе. Таже, царю небесный: и трисвятое, и поклоны 3: по Отче наш: Господи помилуй, 12. Слава, и ныне: Приидите, поклонимся: трижды, и поклоны 3. Таже, псалом 50. и непорочны: На нихже, по коейждо Славе, поклоны 3. Таже, Верую во единаго бога: и трисвятое, и поклоны 3. По Отче наш: тропари: Се жених грядет: и прочая. И по честнейшую, поклоны 3 великия с молитвою: Господи и владыко живота моего: и прочих 12. И последи молитву всю вышеписанную: Господи и владыко живота моего: и поклон великий. И посем, владыко Боже отче вседержителю: Таже, Приидите, поклонимся: трижды. и поклоны три. И по псалмех, Слава, и ныне: трисвятое. И поклоны 3: по Отче наш, тропари: Помяни Господи, яко благ: Господи помилуй 12. и молитва: Помяни Господи, в надежди: Посем, Преславная: и упование мое: Таже, иерей: Слава тебе Христе Боже: И отпуст. И приимше прощение обычное, глаголет иерей ектению: Помолимся о благочестивейшем: и прочая. И мы: Господи помилуй, тихо. Кончавшися же сей, глаголет предстоятель: молитвами святых отец наших: [Сице полунощница глаголется по уставу иерусалимских обителей по вся дни, и писася во всех часословехъ]. По скончании же полунощницы, аще поем ю в притворе: вшед во храм, станем кийждо на своем месте, и творит кийждо три поклоны, прямо святаго олтаря, и на оба лика, со благоговением: И седаем вси на местех своих мало молчаще. Параекклисиарх же уготовль кадильницу, и исходит, благословився у предстоятеля: и клеплет в кампаны, ударяет же тяжким ударением редко, елико рещи, псалом 50, весь. иерей, егоже есть чреда, востав творит обычный поклон предстоятелю. Вшед во святый олтарь, и вземлет кадило, глаголя молитву кадила, стоя ожидает конца клепания. И став пред святою трапезою, и сию покадив, глаголет: благословен Бог наш: [отверзаяй прежде, и тафтою завесу сущую устроенную внутрь царских вратъ]. И кадит святую трапезу крестообразно, и весь жертвенник: и исходит северною страною, и кадит святыя иконы и предстоятеля, и вся, яко обычай. Чтец же начинает: Аще есть аллилуиа, глаголет трисвятое без поклонов. Аще же ни, Приидите, поклонимся: трижды. [Или будет аллилуиа, или Бог господь], глаголет псалом 19: услышит тя Господь в день печали: и 20: Господи, силою твоею возвеселится царь: Таже, Слава, и ныне: трисвятое без поклонов, и Отче наш: [Долженствует же внимати чтец и священник, егда имать рещи: яко твое есть царство: быти ему посреди храма] и чтец глаголет тропарь: спаси Господи люди твоя: Слава, кондак: Вознесыйся на крест: И ныне, богородичен: Предстательство страшное: священник же вшед во олтарь южною страною, глаголет ектению малую, с кадилом пред святою трапезою: Помилуй нас Боже, по велицей милости твоей: и прочая. Таже возглас: яко милостив: и певцы: Аминь. Именем господним благослови отче. Таже иерей начертаваяй с кадильницею крест, пред святою трапезою, глаголет возгласно: Слава святей и единосущней, и животворящей, и нераздельней Троице: И абие начинает предстоятель шестопсалмие: Слава в вышних Богу, и на земли мир: трижды. Таже, Господи, устне мои отверзеши и уста моя возвестят хвалу твою, дважды. И по ряду глаголет шестопсалмие тихим гласом и легким, косно, и во услышание всех. священник же отдав кадило исходит из олтаря, и стоит на обычном своем месте. [егда же глаголется шестопсалмие, тогда подобает со вниманием слушанию прилежати: покаяния бо псалмы исполнены суть, и умиления. Глаголем же сия псалмы со благоговением и со страхом божиим, яко самому Богу невидимо беседующе, и молящеся о гресех наших.] По внегда же рещи предстоятелю 3 псалма: Слава, и ныне: аллилуиа, трижды, и Господи помилуй, трижды. Слава, и ныне, без поклонов. И начнет: Господи Боже спасения моего: отходит священник пред царския святыя двери, творя поклон, возложив на ся епитрахилий, глаголет молитвы утренния тайно, стоя непокровен. По скончании же шестопсалмиа, Слава, и ныне, аллилуиа, трижды. И глаголет ектению великую: Миром господу помолимся: Таже канонарх, глаголавый на вечерни прокимен, сотворив обычный поклон предстоятелю, и став прямо святых дверей сказует, Аллилуиа, во глас октоиха, глаголя и стихи сия: Стих 1: от нощи утреннюет дух мой к тебе Боже, зане свет повеления твоя на земли. Стих 2: Правде научитеся живущии на земли. Стих 3: Зависть приимет люди ненаказанныя. Стих 4: Приложи им зла, Господи, приложи зла славным земли. И поем троичны, в настоящий глас октоиха. Аще ли Бог господь: поем Бог господь, во глас тропаря святаго, со стихи его: И глаголем тропарь святаго, дважды. И богородичен по гласу тропаря. священник же положив епитрахилий на месте его, от страны святых дверей, отходит и стоит на своем месте. И посем лик глаголет: Господи помилуй, трижды. Слава, и ныне: И начинаем стихословити кафисмы. По 1-й кафисме поем седален во октоихе, иже на ряду: Слава, и ныне, богородичен. [По 1-м же стихословии кафисмы, и по 2-м, во вся дни ектении не глаголет священник: но токмо во бдения, и святых праздники имущих полиелей, и славословие, тогда глаголет и ектению, на всякую кафисму псалтира: во вся же дни по конце кафисмы, Аллилуиа, яко обычай. Господи помилуй, трижды. и Слава, и ныне, глаголет сам стихословляяй.] и посем чтение. По чтении же глаголют клирицы: Господи помилуй, трижды. Таже, Слава: посем чтец глаголяй 1-ю кафисму, глаголет: И ныне и присно, и во веки веков, аминь. И глаголет 2-ю кафисму. Но скончании же 1-го чтения, покланяется чтый пред святыми дверьми, трижды: посем покланяется предстоятелю: аще же ни, на оба лика. По скончании же 2-я кафисмы, поем 2-й седален во октоихе рядовый. Таже, чтение. И воставше глаголем, Господи помилуй, трижды. Слава, и ныне: псалом 50: емуже кончану бывшу, стихословим песни: господеви поем, и держим стихов, 12, кроме Слава, и ныне: И поем каноны три: Во октоихе два: 1-й со ирмосом на 6: И другий без ирмоса, на 4: И минеи святаго на 4, да будут вси на 14. Сице поем и 3-ю песнь: И последи ирмос 3-я песни минеи. По 3-й песни ектениа малая. И седален минеи: Слава, и ныне, богородичен. Аще ли среда, или пяток, крестобогородичен: и чтение. По 6-й песни ирмос, и ектениа, и кондак святаго: И икос, аще есть: аще ли ни, мученичен во глас октоиха. Таже чтется пролог. И потом поем и прочия две песни: иерей же в конец 8-я песни, входит во святый олтарь, и по внегда клириком рещи: Хвалим, благословим, покланяемся господеви: Поюще ирмос 8-я песни, и покланяются вси. иерей же возложив на ся епитрахилий, кадит святую трапезу возглашая: богородицу, и матерь света: И кадит олтарь весь, и церковь, и всю братию по чину. И мы стихологисуем 9-ю песнь, поюще велегласно: Величит душа моя Господа, и возрадовася дух мой о бозе спасе моем. Припеваем же к сему: честнейшую херувим: с поклоны. И по скончании 9-я песни, поем ирмос минеи. Таже, Достойно есть яко воистинну: оба лика вкупе: И творим поклон вкупе вси до земли. Посем ектениа малая, внутрь святаго олтаря. Таже, светилен дне: Слава, святаго, аще имать. Аще ли ни, Слава, и ныне, богородичен, или крестобогородичен. Аще ли есть аллилуиа, поем светильны троичны гласа, по обычаю. Посем учиненный чтец глаголет псалом: Хвалите Господа: и Воспойте господеви: и Хвалите бога во святых его. [Зри] И аще имать святый стихиры на хвалитех, тогда глаголем сии 3 псалмы, на лики. По Слава, и ныне, глаголет настоятель: Слава тебе показавшему нам свет.] Аще же ни: По псалмех глаголет настоятель: Тебе слава подобает Господи Боже наш, и тебе славу возсылаем, отцу, и сыну, и святому духу, ныне и присно, и во веки веков, аминь. Слава тебе показавшему нам свет. Слава в вышних Богу, и на земли мир, в человецех благоволение: и поклоны 3. Посем, Господи прибежище был еси нам: и Сподоби Господи в день сей: Таже священник глаголет ектению: Исполним утреннюю молитву: Посем стихиры на стиховне, во октоихе настоящаго гласа, совокупльшимся обоим ликом по обычаю их, поем со обычными припевы их: 1, Исполнихомся заутра милости твоея Господи: до Буди светлость. Глаголем 2, И буди светлость Господа бога нашего на нас: глаголем до конца псалма. Слава и ныне, богородичен, или крестобогородичен. Таже паки настоятель глаголет: благо есть исповедатися господеви: И трисвятое. По Отче наш: священник возглас: яко твое есть царство: [Зри] Аще несть аллилуиа, глаголем тропарь святаго: Слава, и ныне, богородичен, или крестобогородичен. Посем священник, ектению: Помилуй нас Боже: И возглас: яко милостив: И по возгласе, Лик: Аминь. иерей: Премудрость. Лик: благослови. иерей: Сый благословен: И лик: утверди Боже: Таже час 1-й]. Аще ли есть аллилуиа, то по внегда рещи священнику возглас: яко твое есть царство: И по амине глаголем тропарь: В храме стояще славы твоея: Господи помилуй, 40. Слава, и ныне, честнейшую, и Именем господним благослови отче. священник: Сый благословен Христос Бог наш, всегда, ныне и присно, и во веки веков. И мы, аминь. небесный царю: Таже творим поклоны 3 великия, с молитвою святаго ефрема: Господи и владыко живота моего: И прочия 12, глаголюще в себе кийждо: Боже очисти мя грешнаго. По сих молитву всю вышеписанную глаголем во едино, и поклон един. И посем начинает настоятель: Приидите поклонимся трижды. И поклоны 3. И глаголет чтец 3 псалмы обычныя, 1-го часа. Глаголы моя внуши Господи: и прочее. По скончании же, Слава, и ныне, аллилуиа, трижды. И поклоны три. И посем глаголет священник, или нареченный канонарх прокимен: Заутра услыши глас мой: И мы тойже, по клиросом без пения, просто: Заутра услыши глас мой: священник же, или предреченный канонарх глаголет, Стих 1: Глаголы моя внуши Господи: Лик: Заутра: Стих 2: яко к тебе помолюся Господи: Лик паки, Заутра: И поклоны 3.
Вестно же буди сие: егда канонарх глаголет стих, в то время мы колена преклоняем. егда же певцы глаголют, тогда он колена преклоняет. священник, Слава: И чтец, И ныне, богородичен: Что тя наречем: И поклоны три. Таже, Стопы моя направи: и Трисвятое: и поклоны 3. По Отче наш, священник: яко твое есть царство: И по амине, тропарь. В понедельник убо и во вторник, и четверток, глаголем настоящий богородичен: Преславную божию матерь: В среду же, и пяток, глаголи, Скоро предвари: В субботу: яко начатки естества: Господи помилуй, 40. и молитва: Иже на всякое время: Таже, Господи помилуй, трижды. Слава, и ныне, честнейшую херувим: и Именем господним благослови отче. священник, Боже, ущедри ны: И творим поклоны три великия, с молитвою святаго ефрема: Господи и владыко живота моего: и прочих, 12. Таже глаголем молитву вышеписанную святаго ефрема во едино: и поклон един до земли. [Зри] Сице же поем 3, 6 и 9 часъ. И посем начинает предстоятель, или екклисиарх последнее трисвятое, И поклоны три. По Отче наш, священник возглас: И мы, Аминь. Господи помилуй, 12. Таже молитва: Христе свете истинный: И отпуст. И бывает обычное исхождение в притвор.
[Зри] И поем литию о усопших. Взем священник кадильницу, исходит в притвор, предходящема ему лампадома: Мы же последуем, поюще стихиру самогласну святаго, егоже есть храм, исходим в притвор церковный. И священник речет: благословен Бог наш: Мы же, Аминь. Трисвятое. По Отче наш: Возглас: яко твое есть царство: И тропари сия: Со духи праведных: В покоищи твоем Господи: Слава: Ты еси бог: И ныне: едина чистая: Посем священник глаголет ектению: Помилуй нас Боже: еще молимся о упокоении душ усопших рабов Божиих : яко да Господь бог: милости божия, царства небеснаго: господу помолимся. И молитва: Боже духов: Возглас: яко ты еси воскресение: По возгласе священник: Слава тебе Христе Боже: И отпуст: воскресый из мертвых: По отпусте вся братия рекут гласом: Вечная ваша память достоблаженнии отцы, и братия наша присно поминаемии: трижды. Таже рекут помалу и полегку вси: Бог да ублажит и упокоит их, и нас помилует, яко благ и человеколюбец. И конечный отпуст.
Сей устав перваго часа бывает, егда есть аллилуиа.
Аще ли есть Бог господь: По скончании трех псалмов, глаголем на Славе тропарь святаго: И ныне, богородичен, часов: Что тя наречем: И по трисвятом кондак святаго. И прочее вся служба, якоже предуказахом. Поклонов же не творим, ниже конечное трисвятое: но все просто поем. Такожде поем 3-й, 6-й и 9-й час.
Подобает ведати, яко во святую и великую неделю пасхи начинается еже от Иоанна евангелие, и чтется до пентикостиа. Толкования же того евангелиа златоустова чтутся на утренях, в тыя дни. От недели же пентикостиа, до месяца септемвриа, чтется еже от матфеа евангелие, тогоже толкованиа златоустаго чтутся на утренях. От новаго же лета, сиречь, от недели яже по воздвижении, до недели сырныя, чтется еже от луки святаго евангелие. На утренях же чтется толкование феофилактово, метафраст логофетов, и толкования посланий святаго апостола павла, яже от златоуста. Такожде и маргарит златоустов. От первыя же недели четыредесятницы: В субботах, и неделях, чтется еже от марка евангелие. На утренях же шестодневник златоустов. В прочия же дни 40-цы, на всякую утреню прочитаются четыре чтения, два во святом ефреме, и в лавсаице два. Лествицу же чтем на часех. На трапезе же чтутся чрез все лето жития святых, и патерики.
[Зри] Ведомо же буди: яко в неделях святаго и великаго поста, и в навечериях господских праздников, рекше, Христова рождества и богоявления: Великаго василиа литургиа поется: такожде и в память его. Преждеосвященная же литургиа поется точию во святей 40-це, в среды, и пятки. в прочия же дни лета всего совершается литургиа златоустаго.
Господа како поются канони октоиха с минеею.
В понедельник на Утрени: Канон покаянен поем со ирмосом на 6: И безплотных на 4: И минеи святаго на 4. Аще ли поется святаго на 6, оставляются во октоихе оба мученична. И поем святаго на 6. Аще ли поется святаго полиелей: тогда не поется октоих: Но поем канон Богородице, или аще предпразднство, или попразднство со ирмосом на 6: ирмос по дважды, тропари на 4: И святаго на 8. Сице убо во всю седмицу поем полиелейнаго святаго канон на 8, якоже в понедельник сей явлено есть. Аще прилучатся два святых, оставляется канон безплотных: И поем канон покаянен, со ирмосом на 6: И святых по 4 стиха.
Во вторник на Утрени: Канон покаянен со ирмосом на 6: и предтечи на 4: и минеи святаго на 4. Аще ли поется святый на 6, оставляются во октоихе оба мученична: и поем святаго на 6. Полиелей же по предписанному. Такожде бывает, аще и два святых, каноны им по четыре стиха.
В среду на Утрени: Канон креста, со ирмосом на 6, и Богородицы на 4: и святаго на 4. Аще ли поется святый на 6, оставляются оба мученична во октоихе, и поется крестный канон со ирмосом на 4, и Богородицы на 4: и святаго на 6. Такожде бывает, аще будет и два святых во един день.
В четверток на Утрени: Поем канон святых апостолов, со ирмосом на 6: и святаго николаа на 4: и минеи святаго на 4. Аще ли поется святый на 6: Поем канон апостолов, со ирмосом, и с богородичным, на 5: и святаго николаа, с богородичны на 3: и минеи на 6. Аще будут два святых, и поем канон апостолов, со ирмосом на 6, и святым на 8.
В пяток поем, якоже и в среду явлено есть неизменно.
В субботу же, всегда предваряет в минеи святых: и поем святаго минеи, со ирмосом на 6. Таже храма святаго, на 4, и во октоихе мученичен канон на 4. Аще ли два святых: в минеи поем единому канон со ирмосом на 6: и другому на 4: и мученичен канон октоиха на 4: Храма же канон оставляется. Аще ли храм христов, или Богородицы: и поем прежде храма канон, со ирмосом на 6. ирмос по дважды, тропари на 4: и святаго на 4: и октоиха мученичен канон на 4. Аще ли святый на 6: И поем храма со ирмосом на 4: и святаго на 6: и октоиха на 4.
[Зри] Ведомо же буди и сие: В куюлибо субботу славословие прилучится: на Утрени канон храма, аще есть христов или Богородицы, со ирмосом на 6: ирмос по дважды, тропари на 4: и святаго на 8. Аще же храм святаго или святыя: поем канон Богородицы прешедшия недели утренний, со ирмосом на 6: и святаго на 8: Храма же канон оставляется. По 9-й песни светилен святаго дважды. Слава, и ныне, богородичен.
В пяток вечера, по обычной стихологии, на Господи воззвах, поем стихиры подобны, святаго минеи, на 6, Слава, самогласен святаго, аще имать: аще ли ни, Слава, и ныне, богородичен 1-й настоящаго гласа. На стиховне стихиры во октоихе мученичны три, гласа. Слава, святаго, аще имать: аще ли ни, Слава, и ныне, богородичен. Таже: Ныне отпущаеши: и трисвятое. по Отче наш, тропарь святаго. Слава, и ныне, богородичен, настоящаго гласа. ектении, и отпуст.
[Зри] [Подобает ведати, яко аще не прилучится апостола коего память, или от святых великих, или святаго, не имуща тропаря, Бог Господь не поем: но аллилуиа, на глас 2.]
На Утрени по шестопсалмии поем Бог господь: на глас тропаря святаго, и тропарь его дважды. Слава, и ныне, богородичен 1-й по гласу тропаря святаго. Таже стихологисуем кафисму 17: Рече Господь господеви моему: по обычаю. И по стихологии ектениа. И седальны во октоихе мученична два, 1-й и вторый. Слава, и ныне, богородичен 1-й настоящаго гласа: и чтение. Посем стихологисуем непорочны: в нихже кадит священник. По непорочных седальны мученичны два, 3-й, 4-й, и покоин. Слава, и ныне, богородичен. И паки чтение: и псалом 50: Помилуй мя Боже: И поем каноны 3: святаго минеи, со ирмосом на 6: ирмос по дважды, тропари на 4. Сей бо предваряет всегда в субботу: и по нем храма святаго, на 4. Таже во октоихе мученичен на 4: покоин бо канон поется в пяток, на повечерии. К каноном же глаголем песни: Поем господеви: По 3-й песни седален минеи святаго: Слава, и ныне, богородичен. По 6-й песни кондак и икос святаго, аще имать. И чтем пролог. По 9-й песни светилен прежде святаго, аще имать. Таже, Слава, октоиха: И ныне, богородичен. Аще же ни: Светилен октоиха: Иже мертвыми и живыми: Слава, и ныне: Мы о тебе хвалимся: На хвалитех стихиры не поем октоиха, но поем их на стиховне. [Зри] Аще ли несть святаго стихир на хвалитех, и мы глаголем: Тебе слава подобает: [Зри] Аще ли поем святаго на хвалитех стихиры, тогда: Тебе слава подобает, не глаголем: но по стихирах глаголем: Слава тебе показавшему нам свет. Слава в вышних богу: и посем ектениа: Исполним утреннюю: Таже на стиховне стихиры поем октоиха, хвалитныя, мученичны три, 1-й, 2-й, 3-й, с припевы обычными: Исполнихомся заутра: 2, И буди светлость: един же оставляем, 4-й покоин, от дамаскиновых. Слава, святаго самогласен, аще имать. Аще ли ни, Слава, и ныне, богородичен их. Стиховна же субботная оставляется: точию на тех утренях поется в субботы поста, в субботу 2-ю, 3-ю и 4-ю, или аще случится аллилуиа: И поется стиховна, со упокойными их припевы. Таже, благо есть исповедатися господеви: И трисвятое: По Отче наш, тропарь святаго: Слава, и ныне, богородичен утрени, во глас тропаря святаго: и ектении. И час 1-й, и отпуст, и многолетно. По скончании же сего обычная литиа в притворе, яко предписася.
На Литургии блаженна октоиха, на 6: аще ли имать святый на Литургии песнь, и святаго песнь 3- я, на 4: и октоиха гласа, на 4. По входе глаголем тропари сице: Прежде тропарь храма, аще христов храм, и Богородицы: Таже тропарь дне: Апостоли, мученцы и пророцы: И потом тропарь святаго рядоваго, и кондак его. Аще ли будет другий святый, имеяй тропарь и кондак, глаголи его. Аще же несть в субботу тропаря или кондака ни единому святому, и мы глаголем после дневнаго тропаря, за упокой: Помяни Господи яко благ: Аще ли где храм святаго, или святыя, и тем храмом в субботу тропарей не глаголем: занеже вси святии именовани суть в дневном тропаре. Слава, кондак: Со святыми упокой: И ныне, яко начатки.
[Зри] о томже: Аще ли храм святаго, или святыя, и тропари по входе глаголем сице: Прежде дне, Апостоли, мученцы и пророцы: Потом тропарь и кондак святаго на ряду. Аще ли несть: Помяни Господи, яко благ: Слава, Со святыми упокой: И ныне, яко начатки: Аще где и в христове храме и Богородицы, кроме предпразднства, и попразднства: покрываем темже дневным кондаком. И ныне, яко начатки: а не храмовым кондаком. В субботу бо храмовыя кондаки, христовы и Богородицы, оставляются: точию аще прилучится великий святый, тогда, И ныне, кондак храма Христова, или храма Богородицы. А идеже несть храма Христова и Богородицы, глаголем: Предстательство христиан: Прокимен, апостол, аллилуиа, евангелие и причастен, прежде святаго, таже дне: предваряет бо всегда рядоваго апостола и евангелиа, кроме господских праздников сия служба поется в субботах всегда, егда прилучится быти, Бог господь: Аще же прилучится в субботу владычний праздник, поется служба непременно вся праздника.
В пяток вечера, стихословим кафисму 18. Таже на Господи воззвах, стихиры минеи святаго, 3. И октоиха мученичны три, 2-й, 3-й, 4-й, а первый оставляется. Слава, и ныне, богородичен воскресн, настоящаго гласа. Таже, Свете тихий: Посем прокимен. Таже, Сподоби Господи в вечер сей: На стиховне мученичен 1: и мертвена два кир Иоанна дамаскина. Слава, и ныне, богородичен. Таже, Ныне отпущаеши: и трисвятое, по Отче наш: тропарь, глас 2: Апостоли, мученцы и пророцы. Слава, Помяни Господи, яко благ, души раб твоих: И ныне, богородичен: мати святая: ектениа, и отпуст. И обычная литиа за упокой в притворе.
На Утрени по обычном начале, и по шестопсалмии: Вместо Бог господь, поем Аллилуиа, на глас 2, глаголем по трижды. Таже, стих 1: блажени яже избрал, и приял еси Господи. Стих 2: Память их в род и род. Стих 3: Души их во благих водворятся. Тропарь, глас 2: Апостоли, мученцы и пророцы: дважды. Слава, Помяни Господи яко благ: И ныне, богородичен: мати святая: Таже, кафисма 17. ектениа обычная, по нейже глаголем два седальны октоиха, мученичны три, 2-й и 3-й: первый оставляется. Таже глаголем стих: Дивен Бог во святых своих: И глаголем мученичен 4-й: а богородичен 1-й оставляется. Таже стих: блажени яже избрал: И глаголем седален покоин, гласа: Слава и ныне, богородичен вторый. И чтение. По немже ничтоже глаголя, поем непорочны, с припевы: благословен еси Господи: на глас 2. Разделяем же ю на двое. На среди по 1-й статии не глаголем, Слава, и ныне, но поем по конце: яко аще бы не закон твой: трижды. И глаголет священник ектению о усопших: Паки и паки: Лик, Господи помилуй, единожды. еще молимся о упокоении душ усопших рабов Божиих , имярек: Лик, Господи помилуй, единожды. яко да Господь Бог учинит души их: Лик, Господи помилуй, единожды. милости божия, царства небеснаго: Лик, Подай Господи. Диакон, господу помолимся. священник, Боже духов, и всякия плоти: Мы же глаголем, Господи помилуй, 40. Возглас, яко ты еси воскресение: Лик, Аминь. Таже поем другую статию: Твой есмь аз: Припев, спасе спаси мя. На конец: Жива будет душа моя: трижды. Таже, благословен еси Господи: И посем тропари за упокой: святых лик обрете источник: и прочия. И по них ектению глаголет священник преждереченную за упокой: и поминает усопших. Мы же глаголем, Господи помилуй, 40. дондеже скончает священник молитву: Боже духов: и по возгласе седален, глас 5: Покой спасе наш с праведными рабы твоя: Слава, и ныне, богородичен: от девы возсиявый миру: И чтение. псалом 50, Помилуй мя Боже: Таже канон прежде минеи, со ирмосом на 6: и храма на 4: и октоиха на 4, первый. По 3 песни ектениа обычная: кондак, и седален минеи: И чтение. По 6-й песни ектениа за упокой: кондак, глас 8: Со святыми упокой: И икос, и пролог. По 9 песни светилен октоиха. На хвалитех стихиры мученичны, 4: Слава, покоин: И ныне, богородичен. На стиховне стихиры подобны, покойны кир феофана. Слава, и ныне, богородичен. Таже, Благо есть: и трисвятое. По Отче наш, тропарь, глас 2: Апостоли, мученцы и пророцы: Слава, Помяни Господи: И ныне, богородичен: мати святая: И ектениа. Таже, священник: Сый благословен Христос Бог наш: И мы, утверди Боже: и час 1-й, и отпуст. На часех тропари: Апостоли, мученцы и пророцы: Слава, Помяни Господи яко благ: И ныне, богородичен часов. И по Отче наш: кондак, Со святыми упокой: И отпуст.
На Литургии блаженна октоиха, на 6. По входе, тропарь: Апостоли, мученцы и пророцы: и Помяни Господи, яко благ: Слава, кондак, Со святыми упокой: И ныне богородичен: Тебе и стену и пристанище: Прокимен, глас 8. Веселитеся о господе: Стих, блажени ихже оставишася беззакония: За упокой, прокимен: Души их во благих водворятся. Апостол субботы ряд: И другий за упокой. Аллилуиа, глас 8: Воззваша праведнии. Стих: блажени яже избрал, и приял еси Господи. евангелие субботы ряд: И другое за упокой. Причастен: Радуйтеся праведнии о господе: Другий за упокой: блажени яже избрал и приял еси Господи, и память их в род и род.
В пяток вечера, по отпущении вечерни, облекшуся священнику в фелонь, диакону же в стихарь, и приемшу кадильницу и фимиам, исходит в притвор, предыдущу ему параекклисиарху со свещником, последуем же по них и мы. И егда приити ему в притвор, предуготовлене же бывшей кутии, диакон глаголет: благослови владыко. священник же, благословен Бог наш: кадя над кутиею крестообразно. Мы же глаголем псалом 90: Живый в помощи: [Во ино же время кроме вечерни, или утрени, бывает начало по обычаю, глаголем: Трисвятое, и по Отче наш: иерей возглас: яко твое есть царство: Таже, Господи помилуй, 12: Слава, и ныне: Приидите поклонимся, трижды: и псалом 90.] И по конце его: Слава, и ныне, Аллилуиа трижды. и бывает ектениа покойна: Миром господу помолимся. иерей возглас: яко ты еси воскресение, и живот: Таже, Аллилуиа, трижды, на глас 8. Глаголем же стихи сия, 11: блажени яже избрал, и приял еси Господи. 2, Память их в род и род. 3, души их во благих водворятся. Таже тропарь, глас 8: Глубиною мудрости человеколюбно: дважды. Слава, и ныне, богородичен: Тебе и стену и пристанище имамы: Посем кафисма, блажени непорочнии, поем на глас 2. Припев: Помяни Господи души раб твоих. Другий же лик вторый стих. И по ряду прочия стихи, оба лика. Разделяем же на две статии. По первой же статии не глаголем, Слава, и ныне: но абие сей стих: яко аще бы не закон твой поучение мое был: трижды. Таже иерей или диакон глаголет ектению: Паки и паки миром господу помолимся. Лик, Господи помилуй. И прочая. иерей же молитву втай глаголет: Боже духов, и всякия плоти: Лик: Господи помилуй, 40, тихогласно. Таже начинает вторый лик: Твой есмь аз: Припев, упокой Господи души раб твоих: И по ряду оба лика: И прочия стихи. На конце же глаголем стих: Жива будет душа моя: до конца, трижды. Таже тропари за упокой, поем на глас 5. Припев: благословен еси Господи: святых лик обрете источник жизни, и дверь райскую: и прочая. Посем Аллилуиа, трижды. Таже, ектениа. [Зри] И поминает священник усопших по ряду. Аще ли же не поем непорочных: по Аллилуии, глаголем тропарь: Глубиною мудрости: и богородичен его. И абие, благословен еси Господи: Посем тропарь, святых лик обрете: И прочая. Таже поминает священник усопших, якоже прежде указася: И глаголем седален покоин, глас 5: Покой спасе наш с праведными рабы твоя: Слава и ныне, богородичен: от девы возсиявый миру Христе Боже: Таже, псалом 50. Канон октоиха усопших, по гласу, на 4. По 3 песни ирмос и ектениа: И поминает прежде усопших по ряду, якоже предречеся, посреди непорочных. Возглас, яко ты еси воскресение и живот: Таже седален, глас 6: Воистинну суета всяческая: Слава и ныне, богородичен: Всесвятая Богородице: По 6 песни ирмос, и ектениа. И поминаются усопшии, якоже прежде указася. Возглас: яко ты еси воскресение и живот: Таже кондак, глас 8: Со святыми упокой: и икос, Сам един еси безсмертный: По 9 песни глаголет иерей: богородицу и матерь света: Людие, Дуси и души праведных восхвалят тя Господи: И поем ирмос 9-я песни. Таже, трисвятое: и по Отче наш, глаголем тропари сия, глас 4: Со духи праведных скончавшихся: и прочая. Таже иерей или диакон глаголет ектению: Помилуй нас Боже: и прочая. иерей, Боже духов: И поминает яже от века умершия отцы и братию нашу, зде лежащия, и повсюду православныя христианы. Таже возглас: яко ты еси воскресение и живот: Глаголет иерей, или диакон: Премудрость. Мы же, честнейшую херувим: иерей: Слава тебе Христе Боже: Мы же, Слава, и ныне: Господи помилуй, трижды. благослови. иерей, отпуст: воскресый из мертвых Христос истинный Бог наш: и прочая. И по отпусте глашает диакон сице: Во блаженном успении вечный покой подаждь Господи, успшим рабом твоим, имярек: и сотвори им вечную память. Певцы же поют: Вечная память, трижды. А идеже несть диакона, поют певцы: Рабом божиим имярек, успшим вечная память.
В пяток вечера, поем блажен муж, 1-й антифон. На Господи воззвах, стихиры святаго, на 6: Слава, самогласен святаго, И ныне, богородичен 1-й настоящаго гласа.
[Зри] Аще ли имать святый великий бдение, и восхощет настоятель
На Велицей Вечерни, по предначинательном псалме, поем блажен муж, 1 антифон. На Господи воззвах, стихиры святаго, на 8: Слава, святаго: И ныне, богородичен 1-й, настоящаго гласа. Аще предпразднство: или попразднство, на Господи воззвах, стихиры праздника, 3: и святаго, 5. Слава, святаго: И ныне, богородичен настоящаго гласа. Вход. Прокимен дне: И чтения святаго, 3. На литии стихира храма, и святаго: Слава, святаго: И ныне богородичен, по гласу святаго, или праздника. На стиховне стихиры святаго: Слава, святаго: И ныне, богородичен, во глас святаго, или праздника. На благословении хлебов тропарь святаго, дважды: и Богородице Дево, единожды. Буди имя господне: трижды, с пением, псалом, 33: благословлю Господа на всякое время: до Не лишатся всякаго блага. И чтем от жития святаго.
На Утрени, на Бог господь, тропарь святаго, дважды: Слава, и ныне, богородичен 1-й, настоящаго гласа. Аще ли предпразднство, или попразднство: Тропарь праздника, дважды: Слава, святаго: И ныне, праздника. Таже, кафисма 17: ектениа, и седален святаго, дважды: Слава, и ныне, богородичен. И чтение. И посем кафисма 17, непорочны. На нейже иерей не кадит, но на полиелеи кадит. Таже седален святаго, дважды: Слава, и ныне, богородичен. И чтение. Посем полиелей святаго: и седален, дважды: Слава, и ныне, богородичен. И чтение. Степенна 4-го гласа, антифон 1. Прокимен святаго: и Всякое дыхание: евангелие, и псалом 50. По 50-м псалме, стихира святаго. Таже, спаси Боже люди твоя: Посем иерей, милостию и щедротами: Лик, Аминь. И поем канон Богородицы, со ирмосом на 6: ирмос по дважды: тропари на 4. Аще ли храм христов, или Богородицы, или аще предпразднство, или попразднство, поем подобне канон со ирмосом на 6: И святаго на 8: Катавасиа, по уставу. По 3 песни кондак предпразднства, или праздника. Таже седален святаго, дважды: Слава, и ныне, богородичен, или праздника. По 6-й песни кондак святаго, и икос: И чтем пролог. По 9-й песни светилен святаго, дважды: Слава, и ныне, богородичен, или праздника. На хвалитех стихиры святаго, на 4: Аще ли в попразднство: На хвалитех 6: праздника три, яже суть на стиховне того дне, и святаго 3: Слава, святаго самогласен: И ныне, богородичен, по гласу святаго, или праздника. И славословие великое. Таже тропарь святаго: Слава, и ныне, богородичен воскресн, гласа настоящаго, или праздника. ектении, и отпуст, и час 1-й. На 1-м часе, тропарь святаго. Аще ли предпразднство, или попразднство, тропарь праздника: Слава, святаго: И ныне, богородичен часов. По Отче наш, кондак святаго. Аще ли предпразднство, или попразднство, кондак праздника и святаго, глаголем пременяюще: И совершенный отпуст.
На Литургии блажена святаго, песнь 3-я, и 6-я. Аще ли попразднство, песнь праздника, рядовая, и святаго песнь 6. По входе тропарь храма Христова и Богородицы: Таже, святаго настоящаго, Слава, кондак его: И ныне, храма Богородицы. А идеже несть храма Богородицы, И ныне, Предстательство христиан: А в предпразднства, или попразднства коего праздника: И ныне, кондак глаголем предпразднства, или праздника. Аще ли предпразднства, или попразднства господскаго праздника, а храм христов, и тропаря и кондака храма не глаголем, но предпразднства или праздника тропарь и кондак: Богородицы же храма в предпразднства и попразднства господских праздников, не глаголется. Прокимен святаго: апостол, аллилуиа, евангелие, и причастен святаго, емуже бдение. Аще же полиелей, присовокупляем и дне, прокимен, апостол, евангелие, и причастен.
По 9-й песни, после достойна, како глаголются в седмице, кроме недели.
Светилен октоиха, Слава, и ныне, богородичен его. Аще ли будет в минеи светилен святаго, рцы его на Славу, после дневнаго светильна: И ныне, богородичен его. Аще ли будет в минеи два святых, и светильна два: И глаголем первый октоиха, таже святаго: Слава, другаго святаго. И ныне, богородичен его. Аще ли среда, и пяток. И ныне, крестобогородичен октоиха. В субботу же аще имать рядовый святый, по 9-й песни светилен глаголем святаго прежде минеи: Таже, Слава, октоиха: И ныне, богородичен его. Сице глаголются светильны, егда октоих с минеею поется.
како должно есть глаголати во все лето. От недели антипасхи, яже есть фомина, и до отдания воздвижения честнаго и животворящаго креста господня. начинаем стихологисати псалтирь сице: В субботу светлыя недели вечера, глаголем 1-ю кафисму, блажен муж: В неделю на Утрени, кафисма 2-я, 3-я: а 17 кафисмы в сию неделю не глаголем, занеже поется полиелей. В прочия же воскресныя дни, егда не поется полиелей, на Утрени глаголем кафисму 17 с тропари ея. [Зри] Аще же прилучится в неделю праздник господский, или Богородицы, или празднуемаго святаго, по дву кафисмах, полиелей, и по величании, не певше Слава, и ныне, и аллилуиа, поем тропари, Ангельский собор: И по ектении, седальны праздника, или святаго. В неделю вечера, во весь год никогдаже глаголется псалтирь. Аще же прилучится празднество, тогда поем: блажен муж, первый антифон.
В понедельник на Утрени, кафисма 4-я, 5-я. На вечерни, кафисма 6-я.
Во вторник на Утрени, кафисма 7-я, 8-я. На вечерни, кафисма 9-я.
В среду на Утрени, кафисма 10-я, 11-я. На вечерни, кафисма 12.
В четверток на Утрени, кафисма 13, 14. На вечерни, кафисма 15.
В пяток на Утрени, кафисма 19-я, 20-я. На вечерни кафисма 18.
В субботу на Утрени, кафисма 16, 17.
На полунощнице же в понедельник, во вторник, в среду, в четверток, в пяток, во весь год глаголем кафисму 17: блажени непорочнии: В субботу же на полунощнице, всегда глаголем кафисму 9-ю: Тебе подобает: По отдании же воздвижения честнаго креста, от 22 дне месяца септемвриа, до 20 дне месяца декемвриа, начинаем псалтирь глаголати сице: В субботу на вечерни, кафисма 1-я, блажен муж: В неделю на Утрени, кафисма 2-я, 3-я: Прилагаем же и полиелей, сиречь многомилостиво: псалом 134: Хвалите имя господне: и 135: Исповедайтеся господеви: И абие тропари, Ангельский собор: И впакои гласа. Аще ли будет господский праздник, или Богородицы, или некий святый празднуемый в неделю, тогда по псалмех, Хвалите имя господне: и Исповедайтеся господеви: Праздника величание, и псалом избранный, и тропари, Ангельский собор: и седальны праздника.
В понедельник по воздвижении на Утрени, кафисма 4-я, 5-я, 6-я, а на вечерни во всю седмицу глаголем кафисму, 18.
Во вторник на Утрени, кафисма 6-я, 8-я, 9-я.
В среду на Утрени, кафисма 10-я, 11, 12.
В четверток на Утрени, кафисма 13, 14, 15.
В пяток на Утрени кафисма 19, 20-я.
В субботу на Утрени, кафисма 16, 17.
егда же прилучится в те дни празднество, в нихже глаголется на Утрени по 3 кафисмы, и тогда глаголем на Утрени две кафисмы, а 3-ю рядовую на вечерни. яко во всем общем уставе, от 22-го дне септемвриа месяца, повелевает начинати на Утрени три кафисмы: зде же от недели, яже по воздвижении, еже и мнит ми ся и поприлежнейшее, яко да от недели начало вземлет псалтирь. Аще ли убо прежде 20-го, или по 20-м дни будет неделя, всяко и всегда от понедельника начинаем 3 кафисмы.
от 20-го же дне декемвриа месяца, до 14 ианнуариа месяца, дондеже отдастся праздник святаго богоявления: Стихологисуем паки псалтирь, якоже и в неделю антипасхи, еже есть фомина, по две кафисмы на Утрени: а на вечерни, 3-ю рядовую.
от пятаго же надесять дне ианнуариа месяца, до субботы, еже есть пред неделею о блуднем сыне,
Стихологисуем паки на Утрени, по 3 кафисмы, а на вечерни 18 кафисму: Ко господу внегда скорбети ми: В две же недели в мясопустную и сырную, стихологисуем на Утрени по 2 кафисмы, а на вечерни 3-ю рядовую, малаго ради покоя братии. В неделю же блуднаго, и в мясопустную, и в сырную, на Утрени но псалмех: Хвалите имя господне: и Исповедайтеся господеви: Припеваем и третий псалом, 136: На реках вавилонских: со аллилуиею красною. Таже тропари, Ангельский собор: И впакои гласа.
Подобает ведати: яко от сея сырныя недели, даже до воздвижения честнаго креста, упраждняется полиелей, поется же токмо во бдениих владычних праздников. По отдании же воздвижения честнаго креста господня, и до недели сыропустныя, кроме предпразднства, и попразднства рождества Христова, и богоявления, в соборней велицей церкви, и в прочих соборных церквах, в воскресныя дни на Утрени, поется полиелей, якоже и в великих пречестных обителех.
[Зри] устав о псалтире, како должно есть глаголати во святый великий пост. В седмицу 1-ю, 2- ю, 3-ю, 4-ю и 6-ю.
В субботу сыропустную, на вечерни кафисма 1-я, блажен муж: В неделю на Утрени кафисма 2-я, 3- я: в прочия же недели глаголем кафисму 17.
В понедельник на Утрени, кафисма 4-я, 5-я, 6- я. На первом часе кафисмы нет. На часех кафисма 7-я, 8-я, 9-я. На вечерни по вся дни в сих пяти днех глаголется кафисма 18: Ко господу внегда скорбети ми: Во вторник на Утрени, кафисма 10-я, 11, 12: На 1-м часе кафисма 13. На часех кафисма 14, 15, 16.
В среду на Утрени, кафисма 19-я, 20-я, 1-я. На 1-м часе кафисма 2-я. На часех кафисма 3-я, 4-я, 5-я.
В четверток на Утрени, кафисма 6-я, 7-я, 8-я. На 1-м часе кафисма 9-я. На часех кафисма 10-я, 11-я, 12-я.
В пяток на Утрени, кафисма 13, 14, 15. На 1-м часе кафисмы несть. На часех кафисма 19-я, 20-я. На 9-м часе кафисмы несть.
В субботу на Утрени, кафисма 16, 17. И тако исполнится устав псалтири.
[Зри] указ о кафисмах пятыя недели святаго великаго поста, како глаголати.
В субботу на вечерни, кафисма 1-я.
В неделю на Утрени, кафисма 2-я, 3-я, 17-я: а на вечерни кафисмы несть.
В понедельник на Утрени, кафисма 4-я, 5-я, 6- я. На 1-м часе кафисмы несть. На часех кафисма 7-я, 8-я, 9-я. На вечерни кафисма, 10-я.
Во вторник на Утрени кафисма, 11, 12, 13. На 1-м часе кафисма 14. На часех кафисма 15, 16, 18. На вечерни кафисма 19.
В среду на Утрени, кафисма 20-я, 1-я, 2-я. На 1- м часе, кафисма 3-я. На часех кафисма 4-я, 5- я, 6-я. На вечерни кафисма 7-я.
В четверток на Утрени кафисма, 8-я. На 1-м часе кафисмы несть. На часех кафисма 9-я, 10-я, 11-я. На вечерни кафисма 12.
В пяток на Утрени кафисма, 13, 14, 15. На 1-м часе кафисмы несть. На часех кафисма 19, 20. На 9-м часе кафисмы несть. На вечерни кафисма 18.
[Зри] егда же случится праздник благовещения пресвятыя Богородицы в четверток сея 5 недели, и тогда великий канон прелагается на вторник. псалтирь же глаголется сице:
В понедельник на Утрени, кафисма 4-я, 5-я, 6- я. На 1-м часе, кафисма 7-я. На часех кафисма 8- я, 9-я, 10-я. На вечерни, кафисма 11.
Во вторник на Утрени, кафисма 12-я. На часех кафисма 13, 14, 15-я. На вечерни кафисма 16.
В среду на Утрени, кафисма 19-я, 20-я, 1-я. На 1-м часе кафисма 2-я. На часех кафисма 3-я, 4-я, 5-я.
В четверток на Утрени, кафисма 6-я, 7-я, 8-я. На 1-м часе кафисма 9-я. На часех кафисма 10-я, 11-я, 12-я.
В пяток на Утрени, кафисма 13, 14, 15-я. На часех кафисма 19, 20-я. На вечерни кафисма 18- я.
В субботу на Утрени, кафисма 16, 17-я. И тако исполнится устав псалтири.
[Зри] Подобает ведати, како глаголати псалтирь во святую великую седмицу страстныя недели. Известно же да будет, яко во святую великую седмицу сию единою совершаем псалтирь в церкви. Стихологисуется же сице:
В субботу лазареву на вечерни, кафисма 1-я.
В неделю цветную на Утрени, кафисма 2-я, 3- я.
В понедельник на Утрени, кафисма 4-я, 5-я, 6-я. На 1-м часе кафисмы несть. На часех кафисма 7-я, 8-я. На 9-м часе кафисмы несть. На вечерни кафисма 18-я.
Во вторник на Утрени, кафисма 9-я, 10-я, 11- я. На 1-м часе кафисмы несть. На часех кафисма 12, 13-я. На 9-м часе кафисмы несть. На вечерни кафисма 18.
В среду великую на Утрени, кафисма 14, 15, 16. На 1-м часе кафисмы несть. На часех, кафисма 19, 20-я. В туже среду на вечерни, кафисма 18-я, без поклонов. И тако отлагается псалтирь до субботы фомины. Токмо поем в субботу великую на Утрени кафисму 17-ю, с припевы на три статии, писано в триоди.
Поем господеви: стихословим во вся недели, и во владычни и богородичны праздники, и в предпразднства и попразднства их, и в праздник святаго имущаго полиелей, или славословие великое, и во всю пятьдесятницу. господеви же поем, стихословим аще несть неделя, ниже владычний, ни богородичный праздник, ни предпразднство или попразднство их, или празднуемаго святаго имущаго славословие великое.
Поемой в господския владычни и богородичны праздники, и в воскресныя дни, и нарочитых святых всего лета: начинающейся от месяца септемвриа с 1-го числа, до тогоже числа. Месяца септемвриа с 1-го, тогоже месяца до 21-го числа, до отдания праздника воздвижения честнаго креста. Катавасиа: крест начертав моисей: от 22-го септемвриа до 20-го ноемвриа: отверзу уста моя: от 21-го ноемвриа, до 31-го декемвриа, до отдания рождества Христова: Христос раждается: от 1-го ианнуариа, до 14 тогоже месяца, до отдания богоявления: Глубины открыл есть дно: от 15 тогоже месяца, до отдания сретения господня: Сушу глубородительную землю: от отдания сретения господня: кроме четыредесятницы недель и пятьдесятницы, августа до 1-го: отверзу уста моя: от 1-го августа до самаго праздника преображения, и на самый праздник: крест начертав моисей: В попразднстве преображения, и до отдания: Лицы израильтестии: от 14 до 23-го, до отдания успения: Преукрашенная божественною славою: от отдания успения, до перваго септемвриа: крест начертав: Четыредесятницы же и пятьдесятницы,
В неделю мытаря и фарисеа: во 2-ю, 4-ю, 5-ю, святых постов: отверзу уста моя: В неделю блуднаго, мясопустную, сыропустную: в 1-ю, 3-ю, святых постов, в неделю ваий, страстную неделю, катавасиа триоди. Аще случится празднуемый святый во всю четыредесятницу в седмичныя дни: отверзу уста моя: от недели святыя пасхи, и до отдания: воскресния день: В день преполовения пятьдесятницы, и на отдание: Море огустил еси: В неделю 6-ю по пасце, и на отдание пасхи: спасителю богу: На самый праздник вознесения: божественным покровен: от вознесения до отдания: спасителю богу: В неделю же 6-ю по пасце святых отец: божественным покровен: В субботу пятьдесятную триоди. От недели пятьдесятныя, и до отдания: божественным покровен: В неделю всех святых: отверзу уста моя: и до 1-го дне августа.
Подобает ведати: яко всегда поется честнейшую: в неделях всего лета и в предпразднствах, и попразднствах, и в седмичныя дни. Не поется же честнейшая во владычних и богородичных праздниках, еже есть, На рождество Богородицы, и на отдание праздника ея. На воздвижение честнаго креста, и на отдание его. На введение Богородицы, и на отдание его. На рождество христово, и на утрие, и на отдание его. На обрезание господне, и в память великаго василиа. На богоявление господне, и на утрие, и на отдание его. В память во святых отец наших, и великих иерархов, василиа великаго, григориа богослова, и Иоанна златоустаго. На сретение господне, и на отдание его. На благовещение. От субботы праведнаго лазаря, до недели фомины, во всех неделях пятьдесятницы, кроме недели святых отец. В преполовение пятьдесятницы, и на отдание его. В среду, пред вознесением. На вознесение, и на отдание его. На сошествие святаго духа, и на Утрени в понедельник, и на отдание его. На преображение, и на отдание его. На успение Богородицы, и на отдание его. Точию аще случится праздник, или отдание праздника коего в неделю: и тогда поется честнейшую.
Изобразительная глаголются во дни воскресныя во весь год, и во владычни и богородичны праздники, в нихже несть антифонов. Такожде в предпразднствах и попразднствах, и во всю пятьдесятницу. Подобне же и святых имущих бдение и полиелей, и выход, и славословие, и емуже указует песнь во уставе на Литургии. [Зри] Антифоны же глаголются септемвриа в 14 день: Декемвриа в 25 день: ианнуариа в 6 день: Августа в 6 день: В четыредесятнице: В неделю ваий: В пятьдесятнице: В неделю пасхи, и во всю светлую седмицу: В четверток вознесения господня: В неделю 8-ю: собственныя праздников. Во все же лето по вся дни, в нихже не указует святаго на блаженнах песни, глаголются антифоны повседневныя: благо есть: с прочими. Аще же и указует коему святому, прокимен, апостол, евангелие, и причастен, кроме песни, и в те дни глаголются антифоны же вседневныя.
Кадит вечер, на Господи воззвах, в стихирах и в начале утрени, и на 9-й песни. Кадит же и на непорочнах, в субботу и неделю. Кадит же и на праздники господския, в начале великия вечерни. Кадити же иерею, или диакону сице: Первее став пред святою трапезою, и творит крест кадилом. И тако от полуденныя страны став, такожде творит крест. Подобно же и от восточныя и от полунощныя, крестовидно кадит святую трапезу, и весь святый олтарь, и жертвенник: и исходит северными дверьми. И пришед пред царския двери, и тамо творит крест кадилом: И идет и кадит святыя иконы, по южней стране образ спаса Христа, и храма, и прочия тоя страны: подобне и левей, образ пресвятыя Богородицы, и прочих, таже предстоятеля. Аще ли несть настоятеля, кадит образ на месте его. И тако кадит весь правый лик братий, по дважды, воздвизая пред киимждо кадило праве и преки, творя крест. И егда покадит весь лик, и став прямо их посреде: аще поет та страна стих, ожидает дондеже другая страна свой стих начнет. Сему же лику умолчавшу, тогда творит крест кадилом на весь лик, и поклонение творит к ним благочинно, ко всем едино, и они к нему вси такожде творят поклонение: подобне и левый лик, и всю братию стоящую в церкви кадит. И исходит в притвор, и тамо кадит по чину, творит крест кадилом, пред красными враты. Таже кадит на обе страны, святыя иконы, и братию всю по чину их. Последи же возвращься к красным вратом, зря к западу, кадит крестовидно всех. И егда внити во храм из притвора, творит крест кадилом, пред царскими дверьми: и потом кадит икону спаса Христа, и на левой, Богородицы, и на аналогии, и настоятеля. И входит во святый олтарь южными дверьми, и творит крест пред святою трапезою, и отлагает кадило.
отверзается завеса в начале вечерни, и стоит отверзена даже до отпуста. На Утрени, такожде с начала и до конца. На часех же егда чтутся кроме литургии, отверзается ко чтению апостола, и стоит до отпуста отверзена. По отпусте же затворяется. В начале же литургии отверзается завеса, и стоит отверзена, даже до великаго входа. По входе же паки затворяется, дондеже иерей, или диакон возглаголет: Двери двери, премудростию вонмем. Тогда отверзается, и стоит отверзена до возглашения: святая святым. И тогда паки затворяется. По причащении же паки отверзается, и стоит отверзена до конца святыя литургии. Но отпусте же литургии совершенне затворяется. егда же молебен поется, от начала и до отпуста отверзена бывает. [Зри] Ведомо буди, яко святыя двери никогдаже отверзаются, токмо в начале великия вечерни, егда бывает бдение, и кадит священник, и во вся входы, сиречь вечерни, и литургии, и святаго евангелиа: такожде отверзаются и от появления святых таин, даже до исполнения божественныя литургии.
На велицей же вечерни, прежде каждения иереева, должно есть вжигати свещи якоже указася на малей вечерни, и пред владычним образом в тябле, аще имать святый бдение. И по 1-м антифоне кафисмы, в начале Господи воззвах, вжигати и прочия свещи: угашати же на конечном трисвятом. На Утрени, на Бог господь, подобает вжигати свещи, якоже прежде изъявися. В начале же полиелеа подобает вжигати вся свещи, и оставляти я горети до скончания 3 песни, и тогда паки погашати я. И на 8 песни вжигаем паки вся, и оставляем я горети до конца великаго славословия. На Литургии, прежде начала литургии, во олтаре вжигати свещу на жертвеннице. И егда иерей облачится в ризы, и приспевшу времени звона, прежде вжигати свещу на престоле, таже в церкви, якоже предречеся. В начале же святаго евангелиа, вжигати вся свещи, и оставляти я горети до заамвонныя молитвы.
На всякий день от начала вечерни подобает свещи вжигати прежде пред иконою спаса Христа, и егоже есть храм на десней стране, и пред образом пресвятыя Богородицы, на левей. Аще имать святый, блажен муж: вжигаем и пред аналогием, и пред образом спаса Христа в тябле, и во олтаре у престола. Аще ли не имать, вжигати по стихологии: угашати же по конечном трисвятом. На повечерии по преждеписанному, пред спасовым, и богородичным. На Утрени свещи вжигати, якоже прежде на вечерни изъявися, и на Бог господь, вжигати, и пред аналогием, и в тябле. Аще же имать святый полиелей, вжигати и вся свещи, и оставляем горети их и до 3 песни, и угашати. На 8-й же песни паки вжигати, и оставляем их горети до конца славословия. В начале святыя литургии вжигати свещи, якоже прежде изъявися в неделю. О праздницех рождества Христова, и богоявления, и прочих праздников господских и богородичных, и во всю светлую седмицу, и святых имущих бдение, вжигаются свещи, якоже прежде в неделю изъявися.
На Утрени егда глаголется шестопсалмие, и на Величит душа моя Господа, и на достойне всегда. На Литургии, на евангелии всегда, и на Херувимской песни, и в явлении святых таин.
Подобает ведати, яко должно есть канонарху по еже творити поклонение, и начати канонархати, ожидати конца стихиры, и тогда творити поклонение равно вкупе с братиями: И в другую страну отшед, и тамо творит такожде. На конечный же стих: яко утвердися милость его на нас: егда начинается стихира, собираются оба лика насреди равно, ни единому предходящу, другому же на месте стоящу, или единому поклонение творящу, другому же небрегущу: но вкупе собравшимся обема ликома по обычаю своему, и ставшим отсюду и отонуду. И канонарху посреде стоящу, творит благочинно всем поклон. Такожде и оба лика творят поклон, яко от единаго телесе изсылающе купно, равне и благочинне, не преклоняюще колена, но выю свою со благоговением, и воздвизающе повышше глас, и поюще: яко утвердися милость его на нас: Слава, и ныне, богородичен, подобен гласа стихир минеи. По скончании же, паки всем с канонархом сотворшим поклонение, и на своя места отходящим, равно и благочинно поступающе, тойже канонарх прокимен поет, и аллилуиа, откровенною главою, и должен есть ожидати, дондеже совершится прокимен, и аллилуиа: и тогда поклонение по обычаю творит. Такожде, и на стиховну подобает всем сходитися на среди, и сотворше равно поклонение, поют стиховну стихиру, ожидати же канонарху подобно, якоже и прежде. И скончавшуся богородичну, такожде творит поклонение, и на место свое отходит. Подобает же ему покровенною главою канонархати, изряднее же, егда насреди стоит, благочиния ради.
Безчинный вопль поющих в церкви, не прияти того к церковному пению. Такоже и прилагаяй к церковному пению, не приятен есть: да извергутся сана своего, и паки в церкви да не поют. Подобает бо пети благочинно, и согласно возсылати владыце всех и господу славу, яко едиными усты от сердец своих: преслушающии же сия вечней муце повинни суть, яко не повинуются святых отец преданию и правилом.
Ведомо же буди, яко На Литургии открываем главы своя на входе, и на слышании святаго евангелиа, и на херувимской песни великаго входа, и на словеса Христова, и на Достойно есть, и на Отче наш, и во явление святых таин, и на входе на вечерни.
Потребно есть ведати и сие братиям, еже не творити бесед, стоящим в лицех церковных: всяко бо и сие возбранено есть от святых отец: но ниже исходити кому, или входити, дондеже поставлено будет чтение. Не точию же, но ниже входити кому на место свое, егда поет лик, в немже стоит: Но егда начнет другий лик пети, тогда входит на место свое, творя поклон братии.
В великую четыредесятницу повелевает предстатель единому от братий возбуждати братию в церкви, иже на коеждо чтение, по еже почести мало чтущему, востает от своего места, и творит три поклоны насреди, и тако обходит братию молчя: и коегождо аще обрящет дремлюща, возбуждает его тихо: он же востав приходит в среду, и творит коленопреклонения 3, и к ликом по единому: и отшед сядет на месте своем. Сие же ныне не бывает, и во множайших уставех не обретается, мнится же ми, яко за леностное наше прилежание, и зане не терпим с любовию обличения, сего ради умолчано некиими. Тойже будильник и во все лето возбуждает братию по келлиам в церковь.
Во святую и великую четыредесятницу, 1-я недели первый день, сиесть в понедельник, отнюд ясти не подобает, такожде и во вторый. В среду же по совершении преждесвященных, трапеза поставляется, и ядим хлеб тепл, и от снедей овощных теплых, дается же и укроп с медом. Не могущии же сохранити дву дней первых, ядят хлеб, и квас по вечерни, во вторник: Подобне же и старии творят. В субботы же и недели разрешаем на елей точию, и вино. В прочих же седмицах постимся, до вечера 5 дней, и ядим сухоядение, кроме суббот и недель: рыбы же во всю святую четыредесятницу никакоже дерзнем ясти, кроме праздника благовещения пресвятыя Богородицы, и недели цветоносныя. В пяток 1-я недели, и в среду великаго канона, и в великий четверток, аще нецыи уставы и повелевают на елей разрешати, но не творится за честность дней. В навечерие же праздника благовещения, прежде субботы святаго праведнаго лазаря, разрешаем на елей и вино. И аще монах святую четыредесятницу своим лакомством разорит, еже ясти рыбу, кроме праздника благовещения, и недели цветоносныя, то не причастится святых таин и на святую пасху: по друзии две недели покается, а поклонов на день, и на нощь 300.
о причащении христовых таин.
егда хощет кто причаститися святых христовых таин, подобает ему сохранити всю седмицу, от понедельника пребыти в посте, и молитве, и трезвости совершенной всеконечно, и тогда со страхом, и велиим благоговеинством приимет пречистыя тайны.
о помывании уст братий, причащающихся пречистых христовых таин.
Потребно есть и сие ведати, о помывании в храме причащающихся братий, якоже речеся: Достоит помывати уста в служебном: сице бо божественный златоуст повеле, вины ради плюновения. Бывает же сице: По приятии святых таин емлет брат антидор, и потребив и, и приемлет теплоты [оставльшия вливаемыя в божественную чашу] во уста мало, и пласкав поглотает, и уста помывает мало, и отирает платом чистым на сие устроенным над сосудом.
Во святую и великую неделю пасхи, и во всю светлую неделю разрешаем: монаси на сыр и яица и рыбы, мирстии же на вся.
от новыя же недели понедельника, по еже пети 3- й час, и 6-й, в чину их с междочасии, к сим же и обедницу: дается благословение братии, в понедельник, среду и пяток, во всю пятьдесятницу. благословение же мерити подобает, две онгии чисты паксимады (сухари), и то снедати точию подобает, и по отпетии 9-го часа совершенне ясти. Подобне и в навечерии рождества и богоявления господня, аще случится в субботу, и неделю. В неделю же сошествия святаго духа, бывает коленопреклонение на вечерни, и неделя тая разрешена ясти рыбы, сыр, и яица, и млеко: а миряном мясо, до недели всех святых.
Подобает ведати: яко аще случится Христова рождества праздник, и святых богоявлений, в среду, или пяток, разрешаем на сыр и яица: миряне же на мясо. Аще ли случится рождество Богородицы, или сретение, или успение, в среду, и пяток, разрешаем на рыбу и вино. Праздник же преображения и введения, в кой день ни случится, разрешаем на рыбу и вино, и ядим дважды днем. благовещение же, в кой убо день будет святаго поста до недели цветоносныя, разрешаем на рыбу и вино, ядим же единою днем, кроме субботы, и недели. В великую же неделю, аще случится до великаго четвертка, разрешаем на елей и вино. В великий же пяток, на вино точию. Праздник же предтечев, рождество и святых апостол петра и павла, и возлюбленнаго Иоанна богослова, аще случится в среду и пяток, ядим рыбу, и пием вино, дващи днем. На воздвижение честнаго креста, и на усекновение предтечи не ядим рыбы, но елей и вино пием, и в вечер ядим без рыбы же, овощие от гроздия, или что Бог дарует от таковых. В дванадесятих же днех по рождестве христове, и в седмице пред мясопустом, и седмицу светлую и седмицу 8-ю, разрешают монаси на сыр и яица, мирстии же на мясо. В седмицу же сырную, разрешают монаси и мирстии на сыр и яица. В среду же и пяток, в девятый час, единою днем. В средах же и пятцех, всея пятьдесятницы, елей и вино, кроме среды преполовения, и среды отдания пасхи: В та бо два дни разрешаем на рыбу и вино. Нецыи же разрешают и в прочия.
[Зри] Подобает ведати: яко в пост святых апостол, и Христова рождества, во вторник, и четверток, рыбы не ядим, но елей и вино точию. В понедельник, в среду и пяток ни елеа вкушаем, ни вина, но постимся до 9-го часа, и ядим в тыя дни сухоядение. В субботы же и недели, ядим рыбы. Аще случится святый во вторник, или в четверток имеяй славословие, ядим рыбу: Аще в понедельник, подобне. Аще среда и пяток, разрешаем на елей и вино точию: ядим же единою днем. Аще ли святый имеяй бдение, в среду, или пяток, разрешаем на елей и вино и рыбу. Аще ли случится память святаго, егоже есть храм, в среду, или пяток, творим подобне.
о посте пресвятыя Богородицы подобает ведати:
В пост святыя владычицы нашея Богородицы успения, 15 дней кроме преображения Христова, постимся до 9-го часа дне: понедельник, среду и пяток, сухо ясти: и творим коленопреклонение, даже до причащения. Во вторник и четверток, варение без елеа. В субботу же и неделю, варение со елеем, и вино пием: рыбы же не ядим, до успения пресвятыя Богородицы: но токмо на преображение христово, ядим рыбу, дважды днем.
о взаконеных постех, яже соборная церковь предаде православным христианом, (святых апостол правило 69.)
Аще кто епискп, или пресвитер, или диакон, или чтец или певец, святыя великия 40-цы не постится, и всякия среды и пятка всего лета, кроме немощи, да извержется, людин же да отлучится.
Сказание. Зри, яко правило святых апостолов, святую четыредесятницу, и всякую среду и пяток всего лета, равно законоположи пост, якоже во святую 40- цу ядим, такожде и в среду и пяток всего лета, кроме немощи и праздника. Глаголет бо правило: яко не постяйся в сих, священник убо извергается, мирский же отлучается от причащения на время.
Вкратце и о нужнейших потребах, достоит смотряти настоятелю обители, и разсуждати неизменно предания святых и богоносных отец, и начальников общаго жития, о ястии и питии, якоже усмотрися: учими есмы от устава святыя горы, о малых праздниках, якоже глаголется тамо, пети Бог господь. О ястии же и питии, якоже прочии праздники не разрешают, ниже паки яко постныя сия отдавают. Сия же подобает, егда случится день постен, и мал праздник: владычния же сия и великия службы, рекше Христова рождества, и богоявления, и великаго четвертка, и великия субботы, ин образ службы имут.
субботы и недели, и прочих дней седмичных, и о трапезном устроении всем.
В неделю, и господския праздники, подобает ясти три ядения, вечер же два: в прочия же дни седмицы во вторник, четверток и субботу, два: вечер же едино. Достоит же убо сие ведати: яко служай в трапезе братиям, должен есть ударяти в било, или кампан, и собиратися всем в трапезу, и глаголати псалом 144: Вознесу тя Боже мой, царю мой: Сему же исполншуся, и ядению готову сущу на трапезе, глаголет иерей молитву трапезы: Отче наш: И благословляя настоятель глаголет: Христе Боже, благослови ястие и питие рабом твоим: и прочая. И седает кийждо на своем месте по чину, со благоговением и молчанием, начинати же абие чтущему предисловие чтения, егоже хощет чести. Таже настоятель, или чредный иерей благословляя глаголет: молитвами, егоже чтение есть. И тако чтет чтец. И бывает ядение с молчанием, и вниманием ту сущаго чтения. На коеждо же послужение предлагаемых, настоятель ударяет в кандию или звонец: и всем воставшим служай глаголет: Господи благослови. Настоятель: Слава тебе Христе Боже, упование наше, слава тебе. Чтый же должен есть чести, дондеже воздвигнет пресвятую служай. Зде же обычай имамы, диакону сия действовати: егда же престанет чести, тогда шед станет конец трапезы братския, зря умиленне к настоятелю, и руце согбенне имея при персех, и велегласно возопив, но не безчинно, глаголет: отцы святии, простите мя грешнаго. И пад приклонится до земли. И приим молитву и благословение, востает. Трапезе же совершившейся, настоятель ударяет в кандию, и всем воставшим, абие глаголют благодарение. И воздвизает пресвятую по обычаю, яко предписася в службе воскресной. А идеже панагии чина не бывает, воставше глаголют: благословен Бог милуяй и питаяй нас от юности нашея: Слава тебе Господи: благодарим тя Христе Боже наш: Таже, Достойно есть: Слава, и ныне: Господи помилуй, трижды: благослови. Настоятель глаголет: благословен Бог милуяй и питаяй нас от своих богатых даров: Исходящу же ему из трапезы, трапезарь со служители падает пред ним, прося прощения. И настоятель глаголет: Бог да спасет и помилует послуживших нам. И тако братия исходят из трапезы в келлии благочинно и немятежно, творяще метание настоятелю. Сей убо устав суббот, и недель, и праздников, и дней седмичных, кроме 50-цы, во все лето держати и соблюдати лепо есть. Вино же, аще прилучится, не достоит датися по уставу во ин день, но в неделю, или в господския праздники, или в другая нуждная утешения: черпати же тогда потребно есть во все лето на таковыя, по единой чаши, или по две, или множицею по три, и ино ничтоже. Две бо, или три чаши, не по уставу рекохом, но по нужди бывати. И паче аще случится, якоже рехом о триех послужениих, в неделю, или в великия праздники, елма якоже в снеди два послужения, подобаше имети устав, многажды же и едино. Сице и в вине две чаши, множицею же и едину имети, устав. Аще случится и во уреченныя дни, якоже рехом всегда, якоже и великий симеон чудотворец глаголет: яко похвала монаху, еже не пити вина. Аще ли и пиет немощи ради тела своего, мало да испивает. Подобно же и великий пимен отец наш глаголет: яко вина отнюд не подобает пити монахом. Сего ради и во ин день прост, кроме недели, немощи ради нуждныя некия, по словеси святаго симеона, мало нечто подобает пити врачевания ради: и аще и есть, не дается на всяк день, якоже божественная правила повелевают. Аще ли прилучится в сих днех сыр, или яица, или рыба, ясти достоит, а не пещися: часть же сыра мерити подобает комуждо, подаяти братиям онгия, и пол другия. Такожде и масло мерою уставленою да влагается в коеждо варение. Сему уставу подобает быти всегда, егда ядят сия обоя. Аще ли некое утешение от некоего христолюбива будет, и за еже не опечалити принесшаго, по нужди меру оставляти, и се паки, не без разсмотрения и безпечальне: но полезнейшее творити во славу божию. Аще ли не тако случится, всегда учиненныя дни, темиже мерилы и мерами, о сыре и масле, и прочими подобает питатися: и множицею аще мощно есть, сия и умалити и умножити достоит, якоже убо и великий василий во своих постных писаниях объяви, рек: яко прикасатися убо комуждо лепо есть времени некогда случившуся, елико показовати ту сущим же и зрящим, и сия убо тако. И сим убо уставом о сыре, и масле, и вине, всего лета, по мере и по правилу творитися подобает, якоже и божественнии отцы наши завещаша, глаголюще: яко вся мерою и правилом. Подобне же и святый ефрем глаголет: яко велика беда, идеже законнии правила не жительствуют. Рцем же по чину: По скончании убо святыя 50-цы, рекше, от всех святых даже до святых апостол, во вторник и четверток, едино варение достоит ясти без масла, в 9-й час: и ино сухоядение. В понедельник, среду и пяток, сухоядение ясти подобает, хлеб и воду, и сим подобная. В субботу и неделю, два ядения подобает ясти, паче же аще обретаются и рыбы. И егда варение ядят, подобает и ино ядение с ним ясти: яко да будут с ним послужения два. От святых же апостол, даже до поста пресвятыя Богородицы, во вторник и четверток, два ядения подобает, дважды днем: в среду же и пяток, в 9-й час ясти единожды, по преданию святых отец. якоже и святый чудотворец симеон вообрази, глаголя: яко да постится монах не мнее 9-го часа. Подобне же и в житии преподобнаго отца нашего пахомиа, глаголет ангел: по преданию общежительному, яко в 9-й час. И егда хощут ясти, творити молитвы три.
И о вторей же трапезе мало подобает изрещи: По востании же братии от трапезы, да будет и второе ядение, да предложится брашно, якоже и на первой трапезе, да ядят трапезарь и чтец, и прочии служители. Подобает же и сие ведати, яко ни единому достоит поне мало укруха взяти от трапезы, или иному даяти, или во свою келлию нести. Но никто от братий да просит во свою келлию хлеба, или сочива, или варива, или овоща, или ино что тамо имети: но все обще да ядят. Аще ли кто немощи ради приити в трапезу не возможет, таковому, по повелению настоятеля, дати в келлию его все. Аще ли кто послан быв коея ради потребы, и умедлит приити с братиею на трапезу, дадят и тому: но в трапезе да яст. Ни единому же, по реченному образу, буди леть в келлии ясти: се убо отнюд отрицаем. По вечерни же ударяет в било трижды, и входят братия в трапезу. Вечери же ради, ничтоже варити подобает, не студеное же его ядят, но тепло, от обеда до вечера соблюдено: Да будет углие на огнищи, и на нем сосуд глинян станет до вечера, и тако сочиво тепло будет, и без вреда и сладостно, на вечери же поставится. Вшедше же братия в трапезу, и речет келарь велегласно: Господи благослови, и помолися. Таже настоятель ударит в кандию, и глаголют: ядят убозии и насытятся, и восхвалят Господа взыскающии его, жива будут сердца их в век века. Слава, и ныне: Господи помилуй, трижды. благослови. Настоятель речет: Христе Боже, благослови ястие и питие рабом твоим: яко свят еси всегда, ныне и присно, и во веки веков. Аще есть утешение: черпают пития по две чаши, по образу, иже на обеде. По вечери же востав от трапезы, келарь речет: молитвами святых отец наших: Мы же речем: Аминь. Слава, и ныне: Господи помилуй, трижды. благослови. Таже: Бысть чрево твое святая трапеза, имущая небеснаго хлеба, Христа бога нашего, от негоже всяк ядый не умирает, якоже рече всех богородительнице питатель. Таже: честнейшую херувим: И посем: Возвеселил ны еси Господи в творениих твоих, и в делех руку твоею возрадуемся: знаменася на нас свет лица твоего Господи: дал еси веселие в сердце моем, от плода пшеницы, вина и елеа своего умножишася: в мире вкупе усну и почию: яко ты Господи единаго на уповании вселил мя еси. Слава, и ныне: Господи помилуй, трижды. благослови. Настоятель глаголет: С нами бог, своею благодатию и человеколюбием всегда, и ныне и присно, и во веки веков, аминь. И исходяще из трапезы кождо в келлии своя, творят метание настоятелю.
Многу же опасству подобает быти, еже не проглаголати никомуже на трапезе отнюд каковолибо слово, кроме стиха и чтения: егда же нужды время приключится, настоятелю должно есть проглаголати единому точию, или служащему трапезе, но со щадением и благоговением.
о сочиве же и овощии.
Сице достоит быти по уставу великих монастырей: боб, сочевица, горох, егда суть обварена, по единой полной миске коемуждо от братий, по равну. якоже убо и от одежды: ова убо суть приобретна, ова же скупейша: якоже рече и великий василий: яже удобь приобретаемая, и нужную потребу исполняющая, подобает избирати противу времене. На сухоядении же стафиды (виноград сухий), и маслицы, и ягоды винныя сухи, рекше едино коеждо на кийждо день: маслиц убо чашицу полну питию: стафид же равну: орехов 6: смоквей 8 средних: малыя убо, и великия разнствуют. Тако убо достоит и от прочих овощех подобных сим: якоже выше рехом, от пряженых сочивех. Сия же вся, и варена же и сурова, егда же суть суха, такоже подобно есть. егда же время имать зелена, и пища и мера разнствует. От зелей же якоже есть, подобно и варена и сурова, и еще же и квашена, рекомыя армеа и комбоста: фаво слано, и репа со уксусом, и прочая подобная сим уготовлена, и подобающая в постныя дни, и нужную потребу исполняющая. Сице убо окормляеми божиею благодатию, лихоимства свободимся, якоже некий от святых глаголет: яко лихоимение есть сие, еже излишнее и паче потребы. Отонудуже и апостол, яже от божия царствия нас отлучающая изсчитая, и сию страсть ко инем, глаголет: яко лихоимцы царствия божия не наследят. А еже лишше стяжевати, о всякой вещи приемлется.
Сия же вся общежительнии чини предаша. Сокоядения же и сухоядения меру всем опасно повелеша: и познавание равности, и прозябающих соблазн, и прочих вин, к хотящим со множайшими жити, сего ради убо аще и когда несть масла, и прилучится ино что творити, в потребу по нужди. Аще ли прилучаем ни сего несть, не достоит пещися о сем. В субботу, якоже и предваривше множицею рехом, в начале 5-го часа подобает поставляти трапезу, и ясти два ядения, якоже выше рехом: кроме же сих, аще послет Бог чтолибо, подобает ясти вся яже суть, во славу божию. Не достоит же пещися, якоже божественнии отцы предаша. И сам Господь глаголет: яко не пецытеся что ясте, и прочая. И апостол излишняя попечения отсецая, рече: имуще же пищу и одеяние, сими довольни будем. Такожде и в неделю, в 3-й час, рекше, на конце его лепо есть поставляти трапезу, и ясти два варения: аще ли послет Христос, и ино что не слагающееся обоему ястию, подобает ясти и третие, якоже предрекохом, по нужди. Не достоит же приимати се во устав, но по случаю аще будет: ясти же в субботу, и вечер, подобне же и в неделю, и в праздники, в нихже чтолибо забавление скораго вкушения не будет, на которыйждо яко подобно есть. такожде и о вине, якоже предрекохом, бывати должно есть. В великия же праздники, сиречь христовы, и богородичны, и предтечевы, рождество и усекновение: и еще к сим святых апостол петра и павла, в каков либо день прилучится, в понедельник, или среду, или пяток, сице творити подобает: в христовы убо и в богородичныя, яко в день недельный, кроме точию святыя 40-цы: подобне же и предтечевы, и реченных святых апостол. В средния же праздники, в 6-й час подобает поставляти трапезу и вечерю: о снеди же, якоже и в прочих днех. Аще ли случится в день постен сухо ясти достоит на обеде. Аще ли и варение подобает, без услаждения да бывает, аще угодно есть богу: или множицею и со услаждением, егда не зрится беда души. В малыя же праздники, в 9-й час подобает ясти, якоже угодно Богу да бывает, якоже и в прочия дни, единою же днем. Аще ли подобает и в малыя праздники, варение без елеа да бывает, аще угодно есть Богу, или с елеем, егда беда душевная не зрится. Сие же разсуждение снеди праздничной извествованое, по смотрению бысть всяко святых отец сия предавших: иже убо от отец воображенныя праздники, со опасством, и со страхом же и разумом божиим, в снедех проходити достоит, и в самых тех простых днех, множае же паче в постных: на многих бо местех взаконенных божественных писаниях обретаются отлучены снеди в праздниках, и пременены. но якоже и в старчествех глаголет: яко праздник не винопитием смотряй сотворяти, но обновлением ума, и душевною чистотою, объядаяйся же и опиваяйся прогневляет паче предначальствующаго торжество.
Достоит и сие ведати: зане якоже предрекохом о пении, яко по преданию убо, не подобает имети во общем житии устава, кроме общины пети псалмы особне, или ину службу, но вся посреди быти, разве аще что по праведному слову на пользу и спасение души есть, по коемуждо предписахом образу, и с настоящаго советом.
Потребно есть ведати: яко не подобает по преданию ясти кому особь, паче же настоятелю: но аще будет ради воздержания вящшаго и подвига или некия иныя благословныя вины, повелением духовне настоящаго, во спасение душ да бывает: а не по коварству бесовскому, и сие не неподобно, ниже не свидетельствовано: но и свидетельства множайша имамы в постных великаго василиа, якоже егда глаголет, яко противу месту и растворению. Сице и пища да бывает. И паки во еже о святом пахомии, пища премененна бысть от святаго, и божественнаго ангела, и нецыи же от святых в мужех же и женах, во общих житиях постишася вящшим постом и бдением, и ничтоже возбраняюще: точию о подвигах да бывает, аще и согласуется в славу божию, а не на вред души.
яко убо о пищи монахом реша божественнии отцы, добро есть простое и не излишнее избирати: по томуже образу и одеяние имети нуждно, якоже великий василий в постных своих словесех, тонкочастне некако сказует, о подобающей всяцей потребе монаху. Потребно есть и нам противу силы сим уставом последовати: лепо убо есть, единому комуждо от братий две одежды имети, едину ветху и скропану, другую же здраву, за еже пременятися, якова же противу месту рубища творима суть, и паче инех суть удобь купуема, якоже божественнии отцы повелеша. Аще ли от иныя страны обретаются, и суть малоценнейша, и проста, и немятежна, и неукрасима, и подобает удобнейшее во всем гонити. Такожде и верхняя мантиа от нищетных и простых волн имети подобает, яко да служат зиме, во внутрь же и вне: в лете бо не много на потребу суть, якоже отцы повелевают. Такожде и холевы едины, якоже бы нищетны зело, другое же одеяние на потребу зимную: и просто рещи, аще что ино на потребу есть телес. И подобает образу нашему от внутрь же и вне: обаче во всем, якоже речеся, худое же и скудное, и ко единому смотрению, точию потребу исполняющее. Сие убо угодно есть, и во всем ключаемое незазорно и шапку (подкап) должно есть имети едину, и плат имущ покров, яково же есть и одеяние, сице и то имети.
И первое подобающее врачевание, о иже по бозе врача своего приимет, яко и Господь предал есть, не приходит же отнюд во исцеление, тогда прочее да будет ти яко иноязычник и мытарь. Образ таковых, явлена показовати того, да плат камилавце отшивает настояй, и вземлет и, или весь камилав: яко да данную ему благодать окаянному, от него к себе паки возвратит, якоже рече господь: Аще несть достоин мира дом, к вам возвратится мир ваш, и прочая. И святый же кассиан, иже ныне отрицающияся, и в преспеяние не преходящя, совлачити всячески рече обительная одеяния, и во свои его мирския облачити одежды, яже носяй вниде, и тако от обители исходит.
[Зри] от горе святаго авксентиа: уведехом же о сем и нечто другое, дивно и зело изрядно, в горе святаго авксентиа, об он пол Константиня града, во обители глаголемей кир антониеве, глаголется нечто таково бывати: в дневном бо бдении, и на чтении, вси монаси седяще делают, иже от нас глаголемыя серяди, своими руками. Ово убо за еже бодрым быти, и внимати чтения: ово же и за еже благословитися сим, яко во время общаго собрания делаемым: и быти благословенным ихже пришивают на братних одеждах, якоже обычай есть монахом. И аще хощет кто монахов когда убо отити от обители, и по еже вся подобающая на нем исполнити. Аще ли не покорится и не хощет исправитися, тогда убо серядь точию от одежды его отшивше у себе удержавают: и благословение свое от него отемше, тому непричастное, злочастнаго же от обители отпущают. Сему убо образу древних отец, и евангельским последующе речением, лепо есть мало что подобающему держати, и мантию аще лепо есть взимати настоятелю, и во иное от внешних того одевати, аще есть монах. Аще ли ни, поне камилав точию взимати, и вместо того налагати ему иное нечто о внешних: или поне плат ея, еже имать покрывало: и тако того отпущати подучиненному же подобне, якоже лепо есть творити и отпущати их: а не просто тако творити, якоже он иже во отечнице настоятель, вземый весь образ братен: но со многим разумом божиим, и духовным разсуждением, и не оставляти тако идуща в мирское пребывание, дело делающа чужда таковаго образа, и вотще имя носяща. Обаче убо аще пользует во спасение души, и угодно есть о сем Богу, да будет в славу его, а не в хулу: аще ли ни, еже мнится Богу добро быти, то да бывает.
Достоит ведати яже от святых отец прияхом: о великаго же василиа, и от жития святаго отца нашего пахомиа, и от святаго кассиана римлянина, и о прочих общежительных завещаний святых отец, како подобает имети устав служащим во святей обители общаго жития, дневником быти в церковней службе параекклисиархом. И во уставе убо святаго пахомиа, ангел предаде ему по три седмицы изменятися, повару и прочим служителем. Во святаго же кассиана по седмице единой, такожде и в постных великаго василиа. Сего ради подобает комуждо от братий по единому месяцу работати поварское служение, и прочих. И паки другий служение приемля работает братии, якоже и Господь глаголет, и понуждает еже любити и работати друг другу. Аще ли увесть настоятель коего от братий довольна суща, во еже служити и пользоватися, купно и пользовати, и попущати лепо есть того в служение: ибо ниже сие есть не неподобно, но и по преданию святых отец, якоже и святый кассиан во общежительных завещаниях глаголет.
Подобает ведати: яко аще служение тяжко есть во общине, даже до 3-го часа достоит трудитися в нем: до 6-го же часа служения легкая зело, елика яве яко не имут много работы или труда, аще и обретаются: аще ли не обретаются, упразднитися подобает внутрь обители на рукоделие, или на ино что, еже приемлет. Аще ли обретаются вне обители, якоже рехом, подобает творити до 6-го часа. От 6-го часа на служения таковая да не исходят, но внутрь обители подобает упражднятися на рукоделие, и на поучения божественных писаний, и на учения, и просто комуждо подвизатися подобает, еже спастися, якоже произволение имать. и ниже виною дела, воздержание и прочее постничество да разоряется: ниже паки виною воздержания дается прекращение делу, но якоже лепо есть, сице творити подобает. Аще ли есть принужно служение, могущему лепо есть делати и множае, елико может без вреда прейти вящший труд. И паки, егда несть работы, достоит упражднятися на рукоделие, и поучения божественных писаний, и ино, еже аще подобает на потребу.
Дом же един, рекше келлиа устроена на рукоделие собрания ради, должно есть бывати, и в ней собиратися: но еже делати вкупе, елика от рукоделия подобает, по уставу общежительных завещаний. единому же от братии свидетельствовану в добродетели, подобает предстояти же и наставляти: и овогда убо чести братиям делающим, овогда же смотряти и воспрещати им, во еже умолчавати им от всякаго празднословия. но и стих начинати им: потом же и прочая, овогда же и делати с ними и просто рещи, и вне на работу, и внутрь на рукоделие, той да бывает назирая и наставляя их. Такожде и безкнижныя учити божественным писанием. Такожде егда несть ту настояй, подобает быти вместо его и в духовных, аще доволен есть. Аще же ни, поне в телесных довлеет: да есть и во обоих действуя и служя, настоящаго же законному разуму, и божественным писанием последовати, дондеже видит настоятель таковаго довольна суща к служением. егда же увесть известно, истиною и страхом божиим, того настояй, недовольна суща к служением, или не действующа, якоже благоугодно есть Богу, подобает оставляти его, и инаго в него место поставляти, аще имать. аще ли несть кто на сие доволен, да оставится служение, дондеже обрящется достоин кто к служению тому.
Подобает ведати, яко всем братиям лепо есть делати, якоже и предречеся: обаче в каковейлюбо хитрости, кийждо художне имать: и могущему убо подобает делати землю до уставленнаго времене, и потом делати в рукоделии своем. Не могущии же землю делати, таковии во иных некиих различных, и противу силы да делают, и по апостольскому слову, не делаяй бо, рече, да не яст: пребывание бо, рече и потреба братняя от них хощет строитися. Иже ли от братии или неблагоумен есть на рукоделие: или се убо несть, и по коварству же некоему и лукавству не научается, таковаго подобает на множайшее дело земное устрояти, аще есть телом здрав, и пищею крепок. Аще ли есть немощен во обоих, на иная служения подобающая да повелевает, якоже и божественнии отцы глаголют, яко да не безплоден будет, и не вина соблазну в прочиих братиях, якоже рече господь: лукавый рабе и ленивый, и прочая. якоже прежде рекохом о пищи и питии, яко ради благословны некия вины бывати особне: и абие приведохом указание благословно от божественных писаний. Темже образом по благословней вине, с настоящаго законным повелением же и понуждением, аще на пользу есть, да бывает и о неких делающих: и да будет кождо особно делая подобное ему. Аще ли несть по чрезсловесней вине: вникнув бо в житие святаго пахомиа, и се обрящеши тамо по многу, изряднее же о оном, иже две рогозине соделавшем на день в келлии своей особь, со гнилым помыслом и тщеславным усердием. Сие же и инии от отец мнози правым помыслом содеяша и научиша: опасство же многое предано бысть нам о сем от святых отец, яко да от праведных трудов и своего делания дневную пищу притяжем себе, и прочая нуждная потребная телеси. Господь и пречистая его мати, яже о нас управит.
Стяжание же чуждих трудов вносити каковолюбо, отнюд несть на пользу нам, и паче же яко страстнии, и душею немощнии приимати во обители: но яко яда смертоносна отбегати же и отгоняти, яже о таковых, от божественных писаний сочетахом, по разуму, егоже возлюбихом соглашающа и утверждающа иже по бозе таковый разум имущим, во едино собравшимся общебратство. главизны же законны, обдержны, а не смотрительны, или от части: яже бо от части, смотрительны, некоего ради слова содеянная, или глаголанная, не достоит восприимати во обдержная и законная свидетельства. сего ради яже от части, смотрительная в сих не сочетахом: но обдержная же и законная во всем списании сем сочетахом о господе, сего устава церковнаго уставления, и чина непреложнаго: в негоже вникающу настоятелю общаго братства, такожде и церкви начальнику всечастне вникающу во обдержную сию книгу: и по настоящаго разсуждению, всегда учреждается, и украшается церковное исполнение. Приложим же и сие к ведению, ибо мирское жительство, заповеди господни обещавается: иноческое же сих вящше. что же есть сие, еже умертвитися миру всему, и распятое житие восприяти, во время пострижения и повиновения своего, которыйждо монах Богу обещавается? обдержна бо заповедь и предание монашеское сие есть. и мы убо сия исповедуем и мудрствуем.
Подобает игумену тщатися больным на врачевство, или в монастыре живущим, или страннопришедшим, в тяжких недузех скораго просящим исцеления. Аще приидет кто, абие недужнаго призирати, и подавати ему здравие: аще ли нерадети начнет, велика есть беда. но врачем убо в монастыре, якоже речено есть, быти, и потщатися: устроити же ему пластырь и масло, и ино еже подобает уготовати на тех издание от хранительника подаемое, да кто в требовании тех будет. повелит же игумен хранительнику всяко потребное даровати: прежде купити, и полагати мед, и грузити зелие сушеное, вино, сливы, смоквы, елико врачеви угодно. елики же суть в монастыре монахи, или бельцы, недугом одержими будут, вся убо зелия подавати им: игумену же убо начасте приходити к ним, и промышляти о больных, по врачевской воли, и потребная да повелевает даяти. Врачеве же всею хитростию подвигшеся, крепость и здравие страждущим да подавают. Аще ли кто странен и бездомок в гостинницу приидет, недугом одержимь, иже с недужными, от игумена и от врача да получит покой во всем: и повелит пребывати в недужном храме, дондеже устрабится: и тогда потребное на путь от игумена с молитвою приим да отпущен будет. Старым же, и всякия помощи не имущим, повелевает требованных насладитися, и одры тем равночислены поставляти на покой им: от нихже старец да емлет на всяк день потребная им.