СОБОРНОЕ ИЗЛОЖЕНИЕ 1621 ГОДА О КРЕЩЕНИИ ЛАТЫНЬ

 

От божественных писании, и от святых правил собрание великаго господина смиреннаго Филарета патриарха царствующаго града Москвы и всея Русии. и сошедшихся к нему митрополитов, и архиепископов, и епископов. Макария митрополита Новгородскаго. Варлама митрополита Ростовскаго. Корнилия архиепископа Вологодскаго. Арсения архиепископа Суздальскаго. Пафнутия архиепископа Тверьскаго. Рафайла епископа Коломенскаго. о крещении латынь и о их ересех.

 

Единаго истиннаго Бога нашего. иже прежде всех и надо всеми и во всех, и паче всего. яже от нас веруемаго, и поклоняемаго, единаго в Троицы славимаго, Отца и Сына и Святаго Духа. неслиянно соединяема, и неразделно разделяема. иже всяко промышление творящаго, о нашем спасении. по недоведомым судьбам своим, и всяким устроением, и премудростию Того Духа Святаго. во все устроеную вещь вводяща достойныя и дарованныя Его силы, святительския чести. всем опасно нам приимшим, благодать чистительства. и со всяцем хранением, опасно блюдущи, святых апостол правил, и по тех бывших святых отец наших. иже вечнаго живота слово имущих. и своими пречистыми законоутвержении, аки стенами чюдными оградивших церковь Божию. в нейже камень сотвержения, во основании вложен Христос. о нейже клятся неразрушенне ей быти от неправе смыслящих. и непозыбане ей быти от самого ада. и того ради надежду к Нему имеем, за еже к нам реченное слово от Спасителя нашего. дерзайте Аз победих мира. темже убо аз Божиею милостию смиренный патриарх Филарет царствующаго града Москвы и всея Русии. уведех убо неустроение и соблазн в пастве моей сице бывающ. во второе лето паствы моея, от создания же мира, в лето, 7128-го. возвестиша убо мне, некотории два священника, Иван и Еуфимеи, от церкви Пресвятыя Владычицы нашея Богородицы и присно девы Марии, честнаго и славнаго Ея Рожества, иже в Столечниках. на Иону митрополита Сарскаго и Подонскаго, сицеву вещь. яко той Иона митрополит, тем двема священником Ивану и Еуфимию, от латыньския веры пришедших двою человек ляхов, Яна Слобоцкого, да Матвея Светицкого, не повеле крестити, но токмо святым миром помазати их. и потом повеле причастити их пречистому телу и крови Господни. принесоша же мне хартию выписану ис правил. по его митрополичью указу, еже не крестити. но токмо миром помазывати повелено им. Аз же смиренныи патриарх Филарет не презрех такова раскола, да не погибнут овца стада Христова. и испытанием писании, и правою верою исправитися в подобу явленную вещь изволих. да некако останок еллинския и июдейския злобы воистину в зрелую пшеницу вмесился будет. и искорене яко плевел да восторгнется, и чиста явится церковная нива. и того ради повелех Ионе митрополиту пред собою стати. и священницы же Иван и Еуфимеи тут же ставше с ним с очи на очи. и глаголаху тоже, что и прежде сего мне патриарху извещали. и глаголах ему от божественных писании. яко не по божественым правилом, сия новая вводит. он же непокоряшеся истине, и глаголаше, яко не подобает их крестити. Аз же смиренный глаголах ему. и где убо и которая правила не повелевают крестити их; он же глаголаше, яко в шестом вселенском соборе о сем писано есть. да и везде рече писано есть о сем, в божественом писании. Аз же смиренныи глаголах ему, от божественных правил святых апостол, и святых отец. яко еретическое крещение несть крещение, но паче осквернение. якоже святых апостол свидетельствует правило, 46, да пятдесятое, да святаго перваго вселенскаго собора правило, 19.

О извержении Игнатия патриарха.

И потом воспомянух ему о Игнатии патриархе, иже бысть во дни наша. от негоже смута о том же о крещении еретическом первое явися. егда в лето, 7114. грех ради наших, Господу Богу попустившу, и царствующии град Москву лестию и мечем прият, розстрига чернец Гришка Отрепьев. патриарх же Игнатей угожая еретиком латыньския веры, и в церковь соборную Пресвятыя Владычице нашея Богородицы и присно Девы Марии честнаго и славнаго Ея Успения, введе еретическия папежския веры Маринку. святым же крещением совершеным християнскаго закона, не крестил ю, но токмо единем святым миром помаза. и потом венчал ю с тем розстригою. и якоже Июда предатель и сей поругася Христу и обоим убо сим врагом Божиим ростриге и Маринке, подаде пречистое тело Христово ясти, и святую и честную кровь Христову пити. егоже Игнатия за таковую вину священноначальницы великия святыя церкви росийския, яко презревшаго правила святых апостол, и святых отец, от престола и от святительства по правилом святым изринуша. в лето, 7114. По извержении же сего Игнатия, бысть в то время велицей святей церкви Росийстей не наемник, но поистине истинныи пастырь Христовым овцам, отец наш великии Господень святейшии патриарх Ермоген. и советом убо всего освященнаго чина, и со всем сигклитом царския полаты, мене смиреннаго ныне Божиею милостию патриарха Филарета. а тогда еще бывшу ми митрополитом, велицей церкви града Ростова. и со мною послов послаша, в лето 7119. просити у короля Польскаго сына его королевича Владислава, на государьство Московское. и учинити бы его царем. а крестити бы его в нашу истинную в православную христианскую веру, греческаго закона. и даде ми отец наш, великии господин святейшии патриарх Ермоген, писание. избрав от правил святых апостол, и святых отец. на укрепление всем нам. и против еретиков различных многих еретических вер ответ, чесо ради крестити их; и о том и тебе Ионе самому ведомо, иная же повеле мне смиренному собирати. аз же по малей силе моей, елико благодать Святаго Духа настави мя, вседушно попекохся о сем. и правила святых апостол, и святых отец прилежно смотрях со вниманием. и истязах со испытанием того ради, да уведят вси людие Росийския земли. яко вси еретики, различных еретических вер не имут права святаго крещения. еже водою и Духом Святым. и того ради от всех еретических вер различных приходящих к православию, християнскаго закона. подобает совершено крестити, святым крещением. по преданию и содержанию святых вселенских патриарх. еже утвердиша по правилом святых апостол, и святых отец. всех же убо еретических вер, по святым правилом святых отец, сквернеиши и лютеиши есть латыняне папежницы. понеже всех древних еллинских, и жидовских и агарянских, и еретических вер ереси проклятыя в закон прияша. и со всеми с погаными языки, и с проклятыми со всеми же еретиками обще все и действуют и мудрствуют.

И с таковым убо писанием, аз смиренныи с сущими со мною доидохом до града Смоленска. и много короля Жигимонта о сем молих, дабы сына своего Владислава в православную нашу в християнскую веру дал совершенно крестити, святым крещением. он же о сем небрег. и не токмо непослуша нас, но и в дальняя грады земля своея разосла всех нас. и многия нужда и беды и напасти претерпехом. и егоже повелением по всей Русстей земли протекаше огнь и мечь. и всюду еретицы латынския веры нудяще православных християн, свет евангельскии оставити, и тме еретичества их соединитися. и многими бедами и опустением злохитрствующе над всею землею нашею, да восприят будет нами на всевеликое государьство Московское и всея Русии, государем Польскаго короля их Жигимонта сын его Владислав некрещенныи. и видев король Жигимонт, яко сына его Владислава некрещена суща всею Русскою землею не восхотеша взяти на государьство Московское. и того ради, и царствующии град сей Москву огню и мечу предати повеле. и всю землю русскую от красоты благолепия испроверже. и мнози людие нашея державы земля русския, за се душа своя положиша. И за тоже новыи исповедник явися, великии господин и отец наш святейшии Ермоген патриарх, иже многим томлением нужною смертию уморен бысть от еретиков в осаде в Москве. Мы же смирении храняще его нам наказание, и тамо в Польских градех бывше, ничтоже от повеления его не преступихом, и ни в чем нимало не сложихомся ко отвергшимся от соборныя церкви, и от вселенских патриарх. Егдаже Господь и Бог наш Исус Христос благоизволи по наказании своем и милость свою на нас излияти велию. и за всех святых ради молитв, избра по благости своей, по плотьскому рождению возлюбленеишаго сына моего, а по духовному чину сына же моего. и щедротами своими благими, постави его нам государя всей земли Росийской, и изволи помазати его миром дара Святаго Духа. и устрои его на превеликих государьствах, на престоле царствующаго града Москвы, быти государя и царя и великаго князя Михаила Феодоровича всей Росии великой самодержца.

И милостию Божиею в седмое лето царства его, из Польскаго королевства возвратихся и аз смиреныи Филарет в царствующии град Москву, в лето, 7127-го. и пресвятейшим Иеросалимским и всея великия Палестины патриархом Феофаном, поставлен бых по благодати Святаго Духа патриарх всей велицей Росии. Взыдох же на таковыи великии престол, не своею волею ни хотением, но принуждением Иеросалимскаго патриарха Феофана, и митрополитами, и архиепископы, и епископы, и всем освященным собором всея великия Росии. И азе убо смиренныи Филарет патриарх единомудрствую по святых отец правилом, и седми вселенских, и поместных соборов. и со всеми со вселенскими с благочестивыми патриархи, и с преосвященными митрополиты, и со архиепископы и епископы, и со всем освященным собором всея великия Росии, иже во области нашей суть, под паствою моею. а ты убо в сем царьствующем граде Москве, како начинаеши вводити и утвержати сопротивно святых отец правилом, и седми вселенским и поместным собором благочестивым патриархом содержания. и приходящих убо к тебе от латынския веры, почто не велиши крестити в три погружения. и не испытоваеши различия ереси их, но повелеваеши убо токмо святым миром помазовати их. и недостоиных их сущих аки псов, и ведомых врагов Божиих, а сообщаеши их причастников быти пречистому телу и святей и честней крови Христове. и повелеваеши их на руских дщерех християнских венчевати, законом християнским. а со благословенными от Бога и Спаса нашего Исуса Христа с сыновы моими с братиею своею с преосвященными митрополиты, и со архиепископы и епископы, и со всем освященным собором всея Русии, почто не хощеши быти единомысленик. и не токмо не восхотел еси о сем совету духовнаго от нас, но ни поучения не приял еси, еже от правил святых апостол, и святых отец рекохом ти. но прельстился еси умом и ищеши хвалы и чести, от отверженых от церкви Христовы. Аз же смиренныи таковую прелесть еретичества нововводимую от тебе не хощу ни слышати, зане не по божественым правилом сия новыя ереси вводиши. и глаголеши убо о тех папежницех, яко не подобает их крестити, и яко по правилом святых отец се сотворил еси. и сущих под нами всех церковник и простец сицевым образом в неумиримую брань вводиши. идеже бо аще и мало раскольство счинится, и тамо воставает вражда гнева Божия, и мечь ярости. и пребывающим в том, конец мука вечная. и сего ради аз смиренныи Филарет патриарх, по правилом апостол и святых отец запрещаю ти божественыя литургии не служити до болшаго собора. дондеже ложь тмы мимо идет, и истина правды святых правил во свет изыдет. и ныне убо сего ради созвах сыны моя, да видят со мною разсуждение святых апостол и святых отец правила. и да обличится таковыи раскол новоявльшиися тобою. и повелехом ти Ионе митрополиту пред нами на соборе стати. а священник Иван и Еуфимеи тутже стояще и глаголаху с тобою Ионою митрополитом со очей на очи тоже, что и мне патриарху прежде сего о тех иноземцах на тебя извещали. и сего ради судих аз со святым собором сим, да не будет паки зде соблазн таковыи. ни да останет последи нас чадом нашим распрение и соблазн во святей церкви велицей Росиистей. и да никтоже и от сущих под нами причетник церковных, да не дерзнет таковая нелепая творити расколы. по духовному бо изысканию нашему, и по суду разсмотрения нашего святительства, еже от тех священник двух, и от твоего Ионы митрополита самого многаго прекословия ко мне отцу твоему. и супротивства святых апостол правилом, и святых отец седми вселенских собором утвержению. и по тому твоему прельщению, и ко утвержению к тем еретиком, явно суть те иноземцы несовершены святым крещением, кроме тех иже утаил еси от нас имена. о нихже сам рекл еси предо мною, яко и много де и тех есть. ещеже и до нашего святительства шесть лет пасл еси соборную церковь. и аще будет такоже иноземцов не крестил еси, а ныне о том нам о них не известиши. и ты убо сам в последнии день, егда Господь и Бог наш Исус Христос приидет судити живым и мертвым, и тогда о тех ихже погубил еси воздаси ответ. мы же чисти есмы от сих. и се есть соблазн твой, не токмо меньшим церковником, иже суть под нами, но и нам всем начальствующим в церковных преданиих. и от лет убо приснопамятнаго, и святаго великаго князя Владимира, иже просвети всю Русию святым крещением, от грек прием. и даже и до днесь по лето, седм тысящь сто двадесять осмое, никтоже в нас не дерзнул сотворити таков соблазн еретичества, кроме Игнатия изверженнаго патриарха и тебя. и того ради бывшу ныне от нас собору на тя. и изысканым твоим соблазном церкви святей твоими усты, и выписанием развратным, и свидетелей на тя сказанием изобличися лесть таимая в сердцы твоем. и увяз еси сам во своем прекословии и супротивстве, еже не повелеваеши латынь крестити. и не изволил ты своего смущения преграду смиренным покаянием разрушити, пред Господем Богом и пред нами. А что ты митрополит Иона говорил еси предо мною до собору братии своей, что будто в шестом соборе написано, что латынь не крестити, а помазовати миром. и в шестом соборе написано, не то что ты сказал. Мы убо то правило обретше и чтохом. и в том правиле в деветь десят пятом написано. яко павликияны, иже Павла Самосадскаго суть. и евномияны, и мандониты, иже есть и манатане. и савелияны, и манихеи, и уалентияны, теже и валентини. и маркиониты, теже и маркиане. и сущая от подобных им ересей, приходящая к правоверней вере, яко еллины приемлем сия. еллины же убо, якоже и жидове и агаряне повелено есть крестити совершенным крещением в три погружения. а в латыньских ересех все те ереси суть. Да ты же митрополит указ выписав, и дал еси попом Ивану и Еуфимию, почему папежников ляхов миром помазати, а совершено в три погружения не крестити. а выписал еси ис Кирикова вопрошения, что Нифонта Новгородскаго архиепископа вопрошал. и такова указу нигде ни в которых правилех не написано, ни в апостольских, ни во вселенских седми соборех, ни в поместных, ниже во инех святых. да аще бы и было, то в древних летех, но последи того в них многия ереси учинилися. и после седми вселенских соборов, Сергий патриарх со всеми вселенскими патриархи, и со всем освященным собором, папежев римских еретиков из помяновения извергоша, и конечному проклятию предаша. Такоже как и Московское государьство учинилося, и от того времени, и по се время того не бывало в Московском государьстве, чтоб еретиков латынь, и иных различных вер еретиков не крестили, кроме изверженнаго из святительства Игнатия патриарха. И ныне убо да слыши о вещи, в нейже преткнулся еси сам, еюже смутил еси церковь Божию. внимай убо зде умныма ушима, яже отец наш великии господин святейшии Ермоген патриарх, избрав от правил святых апостол, и святых отец вселенских седми, и поместных соборов, и инех святых отец великих. и написав сия даде мне смиреному Филарету, чесо ради крестити тех латынян. иная же и аз собрах, и вкупе с тем же написах. и се есть собрание его и наше, и указ ти, от святых правил;

Ересь римская, иже прияша от мелхиседекиян, и жидов, и армен.

Сии извержении и проклятии мелхиседекияне убо и жидове и армени равну ересь в себе содержат, еже в суботу постятся. от них же кто восхощет быти в православии нашего християнскаго закона, и сих святая правила повелевают совершено крестити святым крещением. Святаго вселенскаго, 6-го, собора, 55, правило. понеже уведехом сущая в Римстем граде, во святыи пост в суботу поститися, паче преданнаго церковнаго предания. изволися святому собору, яко держати и у Римския церкви неподвижно каноны глаголющая. во святую неделю постяся или в суботу, разве единыя токмо, да отвержен будет. Толкование. Уведев се святыи собор, яко в Римстем граде преступают, 64-е. правило святых апостол. иже повелевают опроче великия суботы или в недели не поститися. повеле и в Римстей церкви недвижно таковому апостольскому правилу храниму быти. Того же собора правило, 56. армени во святыи великии пост, сыр и яица ядят по вся суботы. повеле убо собор сей от того удалятися. аще же кто преслушает се, да отлучится. ащели причетник, да извержется. И о томже Лаодикиискаго собора правило, 29. яко не подобает християном жидовски творити, в суботу праздновати, но делати в той день. неделю же прежде чтущи правило, могут праздновати, аки християне. ащели обрящутся жидовствующе, да будут прокляти от Христа. Толкование. Аще убо которыи християнин в суботу празднует и не делает, таковыи со июдеи празднует и жидовствует. сего ради подобает в суботныи день делати. не делати же и праздновати в неделю. И собора иже в Гангре правило, 17, о томже. Аще кто мнимаго ради от него воздержания, в неделю или в суботу, кроме единоя великия суботы постится, да будет проклят.

А римляне с мелхиседекияны, и с жиды и с армены равно такоже в суботу постятся. и сея ради вины подобает убо и от римския веры, и от всех от различных еретических вер приходящих, к нашей православней истинней вере греческаго закона, совершено крестити. понеже убо еретическое крещение, несть крещение, но паче осквернение;

Римская ересь, иже прияша от Мантана еретика.

Мантан убо еретик, име две блудницы. и законы брачныя повеле разоряти. и пасху превратил. от Мантана же ко благочестивой нашей християнской вере приходящих, повелевают святая правила совершенно крестити. правило Великаго Василия. 1-е. да 47-е.

Правило, 1-е. Взыскание убо о чистых, и речено есть первее, и добре возпомянул еси. яко подобает обычаю возследовати всякоя страны. зане вознести различно от крещеных приимших от тех тогда. а еже о пепузенех, ни едино ми слово мнится имети. и чюдихся како праведнаго суща Дионисия прейде тобою изволиша древле приемлюще крещение еже ничим веры преступающее. тем убо ереси нарекоша отверженыя отнюд. и по той вере отчюждены еже манихеяны и уалентияны и мартияны. От толкования. Еретицы убо суть, иже Божия веры отнюд учюжившася. яко же се, пепузини, и манихеи, и уалентияне, и маркионити, и инии мнози. пепузини убо, Мандана утешителя нарицают. и совокупльшеися две ему жене, Прискиллу и Максимилу, яко пророчицы имеют. браки же без разсужения разрушают. пасху развращают. три составы единаго Божества, воедино смешают лице. и другая некая нечестивая таковая мудрствуют. Манихеи же две начале вводят противне себе и равномощьне и глаголют, яко едино начало свет сотвори. другое же тму. и солнце и луну боги творят. и диявола глаголют, всем вещным властель. и брачное законоположение бесовско нарицают. и требующим подавание, беззаконие нарицают. и Бога нашего Исуса Христа, ничтоже человеческаго не приимша егда воплотися. рекше не прият плоти нашея от святыя Девы глаголют. и крест и смерть и воскресение, яко неистиною бывше глаголют. и тмами нечестивая повелевают.

И уалентияне же, телесем отрицают воскресение. ветхий закон отмещут. пророк почитающе, и на свою ересь тех пророчества толкующе, баснословия некая слагают. и Христа с небесе сшедшаго, плоть глаголют, яко сквозе трубу прошедша святыя Девица. и ина некая такова хулная блядут.

Маркионити же суть, месалияне же, молебницы сказуются, иже многоглаватую и многоименитую ересь имеют. сии убо вси от ереси своея обращающеся, и к непорочней вере приступльше крещаются. поне яко отвержено есть нами крещение их;

И осмое правило Лаодикиискаго собора о том же. Отвращающихся от ереси, глаголемых фруг. аще и в клиросе мними от них будут, и велии глаголются. таковии со всем прилежанием оглашати же и крещати от церковных епископ и попов. Толкование. Еретицы суть нарицаемии фруги, и тии аще покаявшеся, и от ереси их обратятся, и к непорочней приступивше вере, и вся ереси с теми и свою прокленши, да будут прияти, со всяким прилежанием. и поучени бывше, да крестятся. да аще нецыи от них и причетницы суть, рекше попове и диякони, вси да крестятся. Сии же фруги от Мондана и Прискилы научишася ереси. тойже окаянныи Мондан, Параклита себе именоваше. и две жене имяше, с нимиже блуд творяше, имя единой Прискилла друзей же Максимилла. сии две жене пророчицы именоваше. градец же некии во Фригиистей области, емуже имя попузан, Иеросалим нарицаше. мужи с женами разделятися повелеваше, и браки разрушаше. и брашен удалятися повелеваше. пасху развращаше. и три составы единосущнаго Божества, в едино смешая, совокупи лице. кровь смешати с мукою. и то в причащения место даяти научи. тогоже причастившимся, срама ради повелеваше таити.

А римляне и инии мнози латынских ересей ученицы, такоже с Мантаном и мудрствуют и действуют. и попом своим женитися не повелевают. и сим чистыя законы брачныя, и ложа нескверныя разрушают. и попы их будто для чистоты не женятся, а меншицы сии реч блудницы держат, и с ними убо тайно блуд творят, и в сем греха себе не ставят. и пасху превратиша же, при державе царя Ивана, как ис подо Пскова Стефан король отшол. и тому лет немного боле, 40. по се настоящее лето, седмь тысящь 129-е. и многажды с жиды пасха их сходится. и о сем обличает их святых апостол правило. 7-е. Аще которыи епископ, или презвитер, или диякон, святыи день пасхи прежде времене со июдеи празднует, да извержется. И о том же правило Антиохия Сирския, 1. вся дерзающая разрушати повеленная заповеди, святаго и великаго собора, иже в Никии, собравшеся пред пришествием благочестия, благочестиваго царя Констянтина, о празднице святем спасенныя пасхи, неприобщеном быти, и отверженом святыя церкве. аще пребудет любоперлив востающе на добро наученая, и се речено да будет о простых человецех. и аще кто от предстатель церкве, епископ, или поп, или диякон, по заповеди дерзнет на развращение людей и мятеж церковным особствовати, и с жидами творити пасху, того святыи собор отселе уже чюжда осуди от церкве. Толкование. О сем речено есть, и в седмем правиле святых апостол. яко аще со июдеи сотворит пасху презвитер, да извержется. тожде убо и се правило повелевает. яко аще кто мирскии человек преступает взаконеное пасхи предание, со июдеи, или о себе един во ино время творит пасху, да есть непричастен, и от церкве изриновен да будет. ащеже есть причетник таковое творя, да извержется. и да будет лишен отнюд святительския чести и имене. и причетницы еликоже их приобщаются ему по извержении, и тии да будут извержени.

По сицевой же мантанской ереси, подобает убо и римлян, и всех иже от различных еретических вер, приходящих к нашей православной истинной християнской вере греческаго закона, совершено крестити. понеже убо еретическое крещение, несть крещение, но паче осквернение.

Римская же ересь. Иже прияша от манихеян, от учеников Манента Перскаго.

Манихеяне убо окаяннии, солнце и луну боготворят. и женитвы закон, глаголют от бесовскаго изложения. и приходящих от ереси их, ко истинному православию, святая правила повелевают совершено крестити. Правило святых отец, 6-го. собора, 95. Да первое правило Великаго Василия.

Правило святаго шестаго вселенскаго собора святых отец, 95. Прилагающаяся к правоверию, и к части спасающихся, от еретик приимаем, по повеленному последованию же и обычаю. От толкования. Обаче павликияны, иже от Павла Самосадскаго суть. и евномияны, и мандониты, и савелияны, и манихеи, и уалентияны, и маркиониты, и сущая от подобных им ересей, приходящая к правоверней вере, яко еллины приемлем сия.

Правило, 1-е, великаго Василия.

Взыскание убо о чистых, и речено есть первее, и добре воспоминал еси, яко подобает обычаю воследовати всякоя страны. зане вознести различно от крещеных, приемших от тех тогда. а еже о пепузенех ни едино ми слово мнится имети. и чюдихся, как праведнаго суща Дионисия прейде тобою изволиша древле приемлюще крещение, еже ничим же веры преступающее. тем убо ереси нарекоша, еже манихеяны и уалентияны, и маркияны. От толкования. Еретицы убо суть, иже Божия веры отнюд учюжившася. якоже се, пепузини, и манихеи, и уалентияне, и маркионити, и инии мнози. пепузини убо Мондана утешителя нарицают. и совокупльшеися две ему жене, Прискиллу и Максимиллу, яко пророчицы имеют. браки же без разсуждения разрушают. пасху развращают. три составы единаго Божества, во едино смешают лице. и другая некая нечестивая таковая мудрствуют. Манихеи же две начале вводят, противне себе и равномощне. и глаголют, яко едино начало свет сотвори, другое же тму. и солнце и луну боги творят. и диявола глаголют, всем вещем властель. и брачное законоположение бесовско нарицают. и требующим подавание, беззаконие нарицают. и Господа нашего Исуса Христа, ничтоже человеческаго не приимша. егда воплотися, рекше неприят плоти нашея от святыя Девы глаголют. и крест и смерть и воскресение, яко неистинною бывше глаголют. и тмами нечестивая повелевают. И уалентияне же телесем отрицают воскресение. ветхии закон отмещут. пророк почитающе. и на свою ересь тех пророчества толкующе, баснословия некая слагают. и Христа с небесе сошедша плоть глаголют яко сквозе трубу прошедша святыя девица. и ина некая такова хульная блядут. Маркеоните же суть месалияне же молебницы сказуются. иже многоглаватую и многоименитую ересь имеют. сии убо вси от ереси своея обращающеся, и к непорочней вере приступльше крещаются, поне яко отвержено есть нами крещение их.

А римляне и иные многие еретики, солнца и луны, и прочих планит двизания волхованием разсужают, и под ними сказуют строитися человеческому рожению и смерти, и збытие временем. И учение отринуша апостольское, еже речено в деяниих сице, в первом зачале. несть ваше разумевати времена и лета, яже Отец положи своею областию. И премудраго Исуса Сирахова в третьей главе, Премудрости его глаголет. вышши себе не ищи, крепльши себе не испытуй. но яже ти повелевают, сия разумевай. несть бо ти потреба тайных;

И римляне убо по манихейскому преданию попом своим женитися не велят. и во всем согласуются и творят равну ересь, якоже и манихеи. о звездном двизании волхвующе. того ради и римлян подобает убо крестити. и от всех различных еретических вер таковех приходящих, к нашей православней истинней християнстей вере греческаго закона совершено крестити. понеже убо еретическое крещение, несть крещение, но паче осквернение.

Римская же ересь иже прияша от евномиян.

Евномияне убо вместо крещения, на главы своя возливают воду до пояса. и молитвы своя творят, собираяся в тайных местех земля. церкви же ни храмины не имут. и приходящих убо от евномиян повелевают святая правила совершено крестити святым крещением.

Правило, 8-е, святаго и вселенскаго собора втораго.

Иже единем погружением крещающеся, евномияны, и монтаниты, зде глаголемыя фруги. и савелияны сыноотечество учащая, и другая некая злая творящая. и вся иныя ереси мнози суть зде, паче иже оглаголати приходящая прилагатися к православию, яко еллины приемлем. и в первыи день сотворим я християны. Толкование. И тии еретицы суть единем погружением крещаются, а не треми, якоже правовернии. Сии же аще приступят к соборней церкви, якоже погании прияти бывают. и прежде крещения время довольно поучаются, божественых писании да послушают. и потом совершено крещаеми бывают и помазаеми. Сице же приемлем я, яко еллины. в 1, день сотворим я християны. во вторыи же творим я оглашены, да поучаются вере. в третии же заклинание им творим, и дуновение трищи, на лице и во уши. и тако поучаем их, и повелеваем время довольно сотворити им у церкви, и послушати божественых писании, и тогда крещаем. но прежде сего всего, да прокленут свою ересь с писанием, и иныя вся, якоже прежде именовании еретицы.

Подобно же сему и римляне творят во крещении своем, такоже обливают, а не погружают. и службы творят и в простых храмех, и на поле, и на путех, где ни случится, кроме церквей. а и скверныя их костелы, несть подобны церквам Божиим. и такоже во всем, якоже и евномияне еретичествуют. По сей же ереси и латынь подобает убо и всех от различных вер приходящих в нашей православней истиннеи християнстеи вере греческаго закона совершено крестити. понеже убо еретическое крещение, несть крещение, но паче осквернение;

Римская же ересь, иже прияша от ариян. от епифаниев глав, 75.

Арияне убо ученицы Ариевы, иже от Понта. не повелевают приносити приношения за умершая. поститижеся в среду и в четыредесятныи пост возбраняют. скверно ядение же, и вся пищи повелевают ясти без страха. ащели же кто хощет поститися, и той постится не во узаконеныя дни, но егда хощет. крестят же во едино погружение. и во крещении не глаголют во имя Отца и Сына и Святаго Духа, но во грядущаго по предтечи Иванне, сиречь во Христа Исуса. И о сем убо пишет, во апостольских правилех в, 46, главе. епископ или презвитер аще не похулит, ни поругается еретическому крещению, но приемлет, да извержется. И в пятидесятном правиле апостольском пишет. епископ или презвитер, аще не в три погружении крестит, да извержется. И от ариан убо приходящих ко благочестивой вере, повелевают святая правила совершено крестити.

А римляне и иные многие еретики сия вся арианския ереси хранят и действуют, обще с ними равно. за умерших памяти творити не повелевают. и всякия скверны ядят, и в том себе греха не ставят. и в среду и в пяток и в четыредесятныи пост такоже не постятся. и детем своим во весь пост повелевают ясти яица и масло и млеко и сыры невозбранно, и чернцы их свинину ядят. и не крестят, в три погружения, но обливают водою. и во всем ариянския ереси хранители и действеницы. Подобает же убо и римлян, и от всех от различных еретических вер таковех приходящих, к нашей православней истинней християнской вере греческаго закона совершено крестити. понеже убо еретическое крещение, несть крещение, но паче осквернение;

Римская же ересь, иже прияша от месалиян, и василиян.

Месалияне убо и василияне последуют Оригенову мудрованию. и приходящих, от различных грех прощают безо всякаго страха, чрез божественая правила. и неразсмотряя плодов покаяния, скоро очищати всяк грех повелевают. токмо аще кто прославленую их молитву от них научится, и ученик от тех проказы будет; И месалиян убо и василиян, приходящих быти к благочестивой нашей християнской вере, повелевают святая правила совершено крестити;

Правило, 1-е. Великаго Василия. Взыскание убо о чистых, и речено есть первее, и добре воспоминал еси. яко подобает обычаю последовати всякоя страны. зане вознести различно от крещеных приимших от тех тогда. А еже о пепузенех ни едино ми слово мнится имети. и чюдихся, како праведнаго суща Дионисия прейде, тобою изволиша древле приемлюще крещение, еже ничимже веры преступающее. тем убо ереси нарекоша, еже манихеяны и уалентияны и маркияны. От толкования. Еретицы убо суть иже Божия веры отнюд учюжившеся. яко же се, пепузини и манихеи и уалентияне, и маркионити, и инии мнози. Пепузини убо, Мандана утешителя нарицают. и совокупльшеися две ему жене, Прискиллу и Максимиллу яко пророчицы имеют. браки же без разсужения разрушают. пасху развращают. три составы единаго Божества воедино смешают лице. и другая некая нечестивая таковая мудрствуют. Манихеи же две начале вводят противне себе, и равномощне. и глаголют яко едино начало свет сотвори, другое же тму. и солнце и луну боги творят. и диявола глаголют всем вещным властель. и брачное законоположение бесовско нарицают. и требующим подание беззаконие нарицают. и Господа нашего Исуса Христа, ничтоже человеческаго не приимша, егда воплотися, рекше неприят плоти нашея от святыя Девы глаголют. И крест и смерть и воскресение, яко неистинною бывше глаголют. и тмами нечестивая повелевают. И уалентияне же телесем отрицают воскресение. ветхии закон отмещут. пророк почитающе, и на свою ересь тех пророчества толкующе. баснословия некая слагают. и Христа с небесе сшедша плоть глаголют, яко сквозе трубу прошедша святыя девица. и ина некая такова хулная блядут. Маркионитене же суть месалияне же, молебницы сказуются, иже многоглаватую и многоименитую ересь имеют. сии убо вси от ереси своея обращающеся, и к непорочней вере приступльше крещаются. поне яко отвержено есть нами крещение их;

Римляне, и вси еретики иные от всех различных еретических вер, такоже по месалиянскому мудрованию, и василиянскому, человеком грехи отпущают без опитемей, и не разсмотряя плодов покаяния. и такоже скоро от грех мнятся очищати. и равну ересь в себе с месалияны и василияны содержат. того ради убо подобает и римлян, и всех от различных еретических вер приходящих, к нашей православней истинней християнской вере греческаго закона, совершено крестити. понеже убо еретическое крещение, несть крещение, но паче осквернение;

И Кирила митрополита Русскаго со епископы, о томже свидетельство. И Макария митрополита в Стоглавнике, о томже свидетельство, еже не обливати. Да ащели кто от тех еретик речет, иже недостоит от них приходящих ко благочестию паки второе крестити. понеже глаголют, крестишася водою и Духом. И наш же сице християнский ответ, еже к еретиком хотящим восприяти истинную православную нашу християнскую веру греческаго закона. яко достоит убо святым крещением совершено крестити их. того ради, егда в лето, пять тысящь седмь сот 56-е. при Авлириане царе Римском. бысть святыи поместныи собор, на Антиохийскаго епископа на Павла Самосадскаго. и его от церкви Божии отринуша. По сих же егда бысть на еретиков первыи собор в Никии. на соборе же стареишина Селивестр папа Римскии. Митрофан патриарх Констянтина града. Александр патриарх Александреискии. Еустафии патриарх Антиохиискии. Макарии Иеросалимскии. и на сем соборе Павла Самосадскаго ереси, глаголемых павликиян, приходящих ко благочестивей вере, повелеша святии отцы совершено крестити, святым крещением. Правило перваго вселенскаго собора, 19. и тако вси возгласиша купно, еже еретическое крещение, несть крещение, но паче осквернение. и повелевают таковех крестити святым крещением паки совершено. Сия бо прияша святии отцы, от самех самовидцев слову и премудрости божественых апостол. еже еретическое крещение, не в крещение полагают. понеже божествении, в четыридесят шестом и седмом правиле своем тако утвердиша. епископ, или поп, или диякон, аще еретическо приимет крещение, или жертву, таковыи да извержется.

Да и многих ради вин довлеет от латынских и от инех различных вер приходящих ко благоверию, крестити совершено. понеже прияша в закон свой многочастных различных ересей предания, и в сих мудрствуют, и по них вся действуют. и божественым Христовым устам, и апостольским, и богоносных отец наших преданиям сопротивляются. и в символ еже есть во исповедание благочестивыя нашея християнския веры, приложиша изхождение Святаго Духа и от Сына. и сим возчетвериша Святую Троицу, отринувше предание седми собор святых отец. с ними же и Римстии папы быша на всех седми соборех, со вселенскими патриархи, Константино градским, и Александрским, и Антиохииским, и Иеросалимским, и вси вкупе единомудрено проповедаша. и в символе благочестивыя християнския веры предаша правоверным християном, исповедовати истиннаго и животворящаго Святаго Духа от Отца изходяща, и со Отцем и с Сыном споклоняема и сславима. а не тако якоже римляне глаголют, Духа Святаго от Отца и от Сына изходяща. презрев самую истину от Христовых уст. еже рече ко учеником своим, не вы бо будете глаголющеи, но Дух от Отца вашего глаголяй в вас. и аще любите Мя, и заповеди Моя соблюдете, и Аз умолю Отца, и инаго Утешителя даст вам. Егда же приидет Утешитель, Егоже Аз послю вам от Отца моего, Дух истинный, иже от Отца изходит. И паки глаголет, но Аз истину вам глаголю. уне есть вам, да Аз иду. да аще бо не иду Аз, Утешитель не приидет к вам. И се Аз послю вам обетование от Отца Моего на вы. И пророк Иоиль, от лица Божия вопиет. излию от Духа Моего на всяку плоть, и прочая. И в пятом зачале деяния апостольскаго глаголет сице. обетование же Святаго Духа прием. от Отца излиянаго. Да посылая Господь наш Исус Христос апостолов своих, повеле им крестити народы, во имя Отца и Сына и Святаго Духа, научая веровати в триипостасное единосущное Божество. И что убо горши сея злобы и вражды к Богу, еже латыни и иных многих вер еретики, Духа Святаго в два начала разделяют. не самого ли единороднаго Сына Божия и Господа нашего Исуса Христа, слово во святем евангелии глаголет. всяк иже аще речет кто слово на сына человеческаго, оставится ему. а на Святаго Духа хулившему, не оставится ему ни в сем веце ни в будущем. и убо да весть всяк, яко сие злое размышление, всем ересем глава, от негоже вся и иныя ереси прозябают. и за толикия презелныя ереси всех еретик, довлеет совершено крестити. понеже всему божественому супротивно мудрствуют, и инех учат;

Римская же ересь и инех еретик.

Мудрствуют неправо и богомерзко, о непорочней бани бытия о святом крещении. и крещают, водою обливают, а трижды не погружают. и не глаголют якоже повелеша святии апостоли, и богоноснии отцы крещати. крещается раб Божии, имярек. но они глаголют, крещаю тя, аз поп. а Божия имени не имянуют. и миром и маслом не помазывают. и вместо мира кладут соль в рот, и слинами разтворяют, и тем вместо мира помазывают. ихже обличают святая правила богоносных отец. и изрядныи в философии священныи муж великии Дионисии Ареопагит в книзе своей, во второй главе глаголет, еже о просвещении совершаемых сице. священноначалник убо погружает трижды свожденьми и возвожденьми крещаемаго. и еже треми свожденьми и возвожденьми над крещаемым, троичныи божественаго трисобства призывая состав. и паки в тойже главе глаголет, еже треми свожденьми и возвожденьми богоначальную тридневнаго погребения жизнодавца Исуса подражати смерть. о сихже свидетельствуют божествении и богоноснии отцы, растолкующе слово во святем евангелии. от поучения евангелиста Матфея, еже на Богоявление Владыки нашего Христа Бога. яко не бывает крещение лукавым обычаем и делом, но многим тщанием и вниманием. еже крещением начертавшиися образ всыновления, нескверно соблюдати должны есмы. А еже третицею в воду погружен бывает и возводим, тридневное Христово погребение и воскресение являет. крещаемжеся во имя Отца, понеже начало всем есть. в Сына, понеже зиждитель есть твари. в Духа Святаго, понеже совершитель есть всем. и святии апостоли в правилех своих, 46-м, тако утвердиша. епископ или поп или диякон, аще не похулит ни поругается еретическому крещению, но приемлет крещенаго от них, или на жертву, сиречь на службу приемлет, таковыи извержется от сана. И в, 50-м, правиле, святых апостол тако глаголет. епископ или поп, не в три погружения крещает, да извержется.

Римская же ересь.

Мудрствуют и действуют не по апостольскому и святых отец преданию, во святую литургию служат на опресноках, а не на кислом хлебе. отринувше апостольское слово, еже рече к коринфом. братия аз приях от Господа, еже и предах вам. яко Господь Исус Христос в нощь в нюже предан бываше, прием хлеб благодарив преломи и рече. приимите и ядите, се есть тело Мое. се творите в Мое воспоминание. тако и чашу прием по вечери, глаголя, сия чаша новый завет есть о Моей крови. сие творите, елижды аще пиете в Мое воспоминание. елижды бо аще ясте хлеб сей, и чашу сию пиете, смерть Господню возвещаете, дондеже убо приидет. темже убо иже аще яст хлеб сей, или пиет чашу Господню недостойне, повинен есть телу и крови Господни. да искушает же человек себе, и тако от хлеба да яст, и от чаши да пиет. И четырекраты убо воспомянув апостол, но ни единожды не рече яко опреснок, но хлеб глаголет. но и Спас убо Творец наш егда прообразуя пожрети себе за всех нас во оставление грехов. и егда ядяше пасху со ученики своими на таиней вечери, тогда своими живоносными усты глагола ко учеником своим. желанием вожделех ясти сию пасху с вами, преже даже не прииму мук. и по всякое убо лето яде законную пасху, а ни единою не рече желанием вожделех ясти пасху сию. но токмо о сей новой благодати, и вечери таиней, еже устроив в смотрение к нашему спасению. О семже и в беседе евангельской от еже к коринфом великии и чюдныи в философии Иван Златыи языком толкуя глаголет. тамо киот, зде же девица. тамо жезл, зде же крест. тамо агнец, зде же Христос. тамо опреснок, зде хлеб. И во евангелии рече Господь ко учеником своим. един от вас предаст Мя. они же возмятошася за слово се. богогласныи же Иван вопроси Его, Господи кто есть предаяй Тя; Господь же хлебом показа ему. взем убо хлеб, и омочи в солило, и даде Июде искариотскому. Сие убо яве есть, яко хлеб совершен даде, а не опреснок. разно бо есть хлеб со опресноком, якоже человек живыи с мертвецем. И Петр архиепископ Александреискии в правиле своем тако глаголет. иже причащатися опресноком, ветхия жертвы причащение есть, а не новаго завета. не опреснока Христос, но хлеб приим, благослови и рече, приимете и ядите, якоже глаголют согласно, 4, евангелисты. и великии апостол Павел, и сие убо о приношении в безкровьную службу хлебом, а не опресноком изъявление от новыя благодати;

6-го вселенскаго собора правило 11.

Ни единого же несть християном приобщения к жидом. сего ради убо аще обрящется кто тех опресноки ядыи, или врача их призывая на цельбу себе, или мыяся с ними в бани, или инако како присвояяся к ним. аще есть причетник, да извержется. аще ли мирскии человек, да отлучится;

О огни очистительном.

И тии же латыни падоша в прелесть Аригенову, иже блядяше, яко имут грешницы огнем чистителном, от грех очиститися. и престанет мука грешных. егоже со еретичеством сим прокляша на вселенских соборех, на пятом и на шестом, и на седмом;

О новом календаре.

По седми же тысящех лет, в царство государя царя и великаго князя Ивана Васильевича всея Русии, как пришол Польской король Стефан Оботур ис под Пскова. и с папою Римским, да с цысарем и со инеми державцы западных предел, переменили календар, еже о пасце християнской. но уставили закон новой себе о том. и пасха их с пятию патриархи вселенскими, и со всеми християны не согласуется, иногда напреди, иногда последи. часто же и с жиды бывает. и о том все правила свидетельствуют. иже кто празднует пасху с жиды, той есть проклят.

Из епистолии на римляны, от седьмаго собора на латыню о опресноцех. глава 81. и во апостольской епистолии тоже.

Ведыи буди, яко суть опресноцы ветхия жидовския жертвы суть, а не евангельская Христова суть. якоже четыре евангелисты и апостол святыи Павел послушествует. не опреснока бо Господь наш в тайную вечерю взем, и благодарив разломив, и даст святым своим учеником, и рече приимите и ядите, се есть тело Мое ломимое за вы во оставление грехов. сеже о сем Павел глаголет, яко един хлеб едино тело мнози есмы. вси бо от единого хлеба есмы, и приимаем. видиши ли хлеб наричет, а не опреснок. а иже опреснок приемлет, или приносит, сей жидовин есть. и на порозе жидовсте яст, а не на Христове. Христос сам егда своя ученики учаше молитися, Отче наш иже еси на небесех. не рече опреснок наш насущ, но хлеб насущ нарече, якоже рече Христос, се есть тело Мое ломимое за вы. совершено ли есть, или несовершено. но совершен человек, и совершен Бог. да свершеным подобает жрети Богу, а не несовершеном. которое бо есть совершено, хлеб ли, или опреснок; яко и слепым есть ведати, яко хлеб есть совершен. есть бо мука, аки тело. а квас, аки душа. соль же, аки ум. вода же, аки дух и живот. тако приемлет животное согреваяся хлеб. а еже опреснок, мертво и бездушно в возхождение не приимая ни согреваяся. того ради безживотен наречется опреснок, живота бо не имеет. хлеб же животныи Христос есть. да уведят же таковии еретическая и опресноки ядуще, яко пси мертву плоть ядуще, а не живу. и в ересь впадают, проклятаго Аполинария. иже бездушныи опреснок в тела место Господня приемлют. подобни суть Аполинарию, он бо безумныи бездушно опреснок прият. не имеет бо ни душа ни ума, ни кваса бо ни соли не имеет, яже суть в хлебе, яко душа и ум. и прокляти суть с древними еретики, со Уалентом, и Манентом, и Аполинарием Лаодикииским, и с Павлом Самосадским, и Евтихом, и Диоскором, и со инеми иже при шестом соборе обретошася единовольницы, Сергием и Павлом и Пиром, и иже с ними. иже в тех всех вдохну диявол, и всем зачало бе ересем. едина же есть всех ересей нечестивеиши, отметающимся совершена человечества, и по составу соединения, единаго Спаса Христа Бога нашего;

О папе Формосе.

В лето Льва царя премудраго, сына Василиева Македонянина. бысть папа в Риме Формос проклятыи, имыи в себе ересь сокровенну, онех Каруловых еретик. благочестивии же людие нарекоша его папою, неведуще в нем ереси. он же по обычаю прежде бывших пап, написа рукою своею, истинно исповедание православныя веры лестию, и посла к четырем патриархом. егда же прият престол, нача учити ересем люди Божия. и тако латыни все удобь прияша злое учение то. и от царствия греческаго, и от четырех патриарх отлучишася. по первом же ереси начальнику преже реченном Формосе. 2, бысть папа в Риме Внифантии. 3, Стефан. 4, Роман. 5, Феодор. 6, Иван. 7, Венедикт. 8, Леон. 9, Христофор. сии вси единомысленники бяху Формосу. и от седмаго вселенскаго собору до Христофора папы, 256, лет; Бывшу же Сергию патриарху в Царе граде, в лето, 6552-е. сей по совету триех патриарх, истяза папу Римскаго Христофора. иже бысть осмой по Формосе, в лета Констянтиноградскаго царя Василия Болгорогубителя. Христофор же исповеда, и яве глаголя. яко Пресвятыи Дух от Отца и Сына исхождение имать. и сего ради Сергием патриархом Царя града. и прочими патриархи от книг поминных, идеже писаны суть патриарси, извержен бысть, и проклятие наследова. по сем же Христофоре развращеном исповедание сице написаша яве латыни в Римстей церкве, яко и от Сына Дух Святыи изходит. Ведомо же буди, яко от шестаго святаго вселенскаго собора, до царьства Констянтина царя Монамаха, обличаеми бяху помалу римляне, от тогдашних святых отец и патриарх, о ересех, еже отчасти имеяху тогда прежде о опресноцех. Потом же явленно бысть, яко хулят на Дух Святыи. сего ради отсекоша доконца помяновение папино, и всех отринуша и отвергоша их, и конечным проклятием прокляша их. По многих же папах, бысть папа великаго престола Римскаго, Петр Гугнивыи. сей беззаконник отверг веру християнскую, и всю Италию возмути. и многия ереси злыя насея во всех римских странах. и попом повеле, комуждо седмь жен держати, а наложниц елико хощет. и органом и мусикиям в церкви быти повеле. и со псы в церковь ходити. и брады и лона постригати, и попу и диякону, и всякому человеку мужеску полу и женьску. и гипсы и волки ясти. и ина многа неподобная беззаконный сей устави, со единомысленники своими римляны. и сих ради отвержени и прокляти.

Указание от правил, обличителю на ереси латынския, Иоанна митрополита Рускаго, ко архиепископу Римскому о опресноцех.

Да о техже убо ересех, во изъявлении своем свидетельствует и Тимофеи Великия церкви Констянтина града. яко приходящих от ереси маркиян, и маркионитян, и от воздержниц, рекше вод предстателей, валентиян, и василидиян, николаитян, мантанян, и пепузян, манихеян, и евномиян, павликиян, и фотиян, савелиян, и маркилиян, и вионян, соторнилян, и апеллиян, и слесаит, симонян, и менандреян, и мелхиседекиян, иже и неприкосники нарицаются. сих всех еретических вер приходящих, к православней вере нашей християнстей греческаго закона, указует их по правилом святых отец совершено крестити. А которых убо еретиков ереси имена он зде выписал, и тех всех еретиков ереси в латынникох есть суть. и за то их латынников, и всех различных еретических вер, приходящих к православней вере нашей християнской, подобает совершено крестити святым крещением.

О фрянзех и о прочих латынях, и о мудрствующих с ними, иже с папою едино согласницы в сих ересех.

Папа Римскии, и елико же западныя страны християне. вне юду ионския луки, Италии, логговарди и фрянзи, иже и германи нарицаются. анфини венедицы, и прочии опроче калавранского роду, и аламанскаго языка. от сих овии убо ничимже от ветхих еллин различны суть, и нечестием, и студодеянием. колаври же християне суть, и правоверни издавна, и во обычаих апостольския церкви воспитани вси с папою, предмногим временем соборныя церкве кроме суть, и евангельских и апостольских учении, и отеческих предании чужди. варварских ради обычай, ихже держатся. от них горшии и множаишии суть сия.

(1) Святому образу веры от евангельских речей сложену сущу, и яве тако глаголющу о Святем Дусе. и в Духа Святаго Господа истиннаго и животворящаго изходящаго от Отца. тии же приложиша и от Сына, зле и блазнене.

(2) В хлеба место опресноки служат, и оклеветают апостола Петра, и святыя отцы, яко от них имуще таковое предание. и о сем обличает их святых апостол правило, 70;

(3) Епископи их во время браней, сами ополчаются, и прежде инех входяще в брань биются. и о сем обличает их святых апостол правило, 27.

(4) Постятся в суботы, и аще прилучится в суботу праздник Рожества Христова, или Прсвещения. тии не разрешают суботнаго поста празника ради. и о сем обличает их святых апостол правило, 64.

(5) В великии пост от среды, 1-я, недели, начинают поститися.

(6) Сыропустныя недели мяс не оставляют, и не знают что есть сырная неделя.

(7) Во весь великии пост не постятся, но сами убо во святыи великии четверток, яица и сыр и масло и млеко ядят. детем же своим во вся недели святаго поста, млеко и сыр и яица ясти прощают. и о сем обличает их правило святых апостол, 69.

(8) Образы святых в церквах не пишут, кроме единаго Распятия, но и то Распятие не шаровным строением пишут, но цело во едином древе, или в камени изваяно творят, рекше издолблено;

(9) В божественныя церкви входяще, ницы на земли падше, и преклоньше лице к земли шепчют. и потом крест на земли назнаменавше перстом, и целовавше востают, и в то лице молитву совершают. и о сем обличает их святых апостол правило, 65.

(10) Матере Господа нашего Исуса Христа не зовут Богородицею, но токмо Мария Святая.

(11) Во святыи жертвеник всяк хотяи внити входит. и во время службы их, которого аще будет роду, или возраста, или чину, яко и жены егда хотят седят на престолех епископьих во олтари. толико ведят разлучати посреди святых и скверных.

(12) Давленину ядят, и звероядину, и мертвечину, и кровь, и медведину, и выдры, и желвы, и еще и тех сквернейша и скареднейша. но о сем обличает их святых апостол правило, 63.

(13) Презвитери их и епископи их, святительския ризы их не отволны строят, но червлеными и червчатыми нитьми ткуще облачатся, многоразлично упещрены сия сотворяюще. и перстень носят. и руце облачат в рукавицы. на первей же рукавице пишут сице, рука яко из облака. на левей же Агнец Божии пишется.

(14) Тии же святители их водою токмо крещают. и соль вложивше во уста крещаемому, исплюют в левую руку, десною же слины размешавше, помазуюм крещаемаго. крещеных же в меру возраста дошедших, и в грехи впадших, маслом помазуют я, во оставление грехов. и дващи крещающе мнятся.

(15) Тии же святители их, и другая некая очищения творят, и по вся дни кропятся, на прогнание ихже боятся, июдейским работающе обычаем.

(16) Пятию персты странно некако благословляют, и последи пальцом лице прекрещевают.

(17) От среды первыя недели поста, даже и до пасхи, аллилуия никакоже не поют;

(18) Поставляеми презвитери и диякони и епископи, жены своя отпущают. и сущим под ними во всех странах, презвитером проповедают убо жены своя отпущати. они же о сем не токмо проповеди сих не приемлют, но и первым женам их умершим, и вторыя и третия поимают, и без боязни служат. но сем обличает их святых апостол правило, 5. да шестаго вселенскаго собора правило, 13.

(19) Епископом их умершим, на восм дней оставляют непогребены. и сущим в пределе том всем пришедшим, якоже обычай имеют. и облекше и поют над ним, и тогда погребают. руце же не крестообразно полагают ему на персех, якоже и мы, но подолгу при бедрах их простирают. и очи и уши и ноздри и уста воском залепляют. таковая же и мирским мертвецем сотворяют;

(20) Презвитери их трижды и четырежды во единой церкви служат, или идеже аще прилучится, неразсуждающе святых от скверных;

(21) Кождо их дщерь свою дав сынови некоему в жену, и оттуда паки поемлет свата своего дщерь за сына своего, или за брата, или за иного сродника;

(22) Аще кто от мнишескаго жития епископ будет, и мяса ясти без боязни повелевают. мниси же их, аще коли и мала болезнь приключится им, мяса ядят. во общине же вси и здрави суще ядят свиное сало;

(23) Великаго поста страны их и приближения языцы не равно постятся, ляцкая убо земля 9, недель. прочии овии убо 8, недель постятся, друзии вяще, инии же мнее. итали же рекше римляне, 6, недель токмо постятся.

(24) Крест Господень во иныя убо вся дни в церкви имуще, и почитают и взирают нань, и поклоняющеся ему облобызают. во святыи же и великии пост, ни поклоняются ему, ни взирают нань. но в некоем месте темне плащаницею обвивше скрывают, с нимже и аллилуия. в великую же суботу от тайнаго места открывше сего, якоже се от гроба воставша, и от олтаря людем показуют, и внезапу вси с великим воплем возглашают, алилуия. и на многи часы вопию вси, якоже мы в великую неделю пасхи, Христос воскресе.

(25) Служащем иереом их по чину, и во время возглашения святаго евангелия, или святых тайн, ту сшедшимся людем множайшим, и от них по обычаю их седят без страха, и беседуют друг ко другу.

(26) Причащения святаго общения, не якоже и мы сотворяют. но якоже реша, хотящаго причаститися, служаи презвитер целует его токмо. и целование приемлет и в причащения место.

(27) Причетником и епископом поставления не во всяко время творят святители их, но четырежды в лете во уреченныя дни. лету убо на четыре времена разделену сущу, на весну, на жатву, на есень, на зиму. первыя месяца соблюдают входа обращению, рекше март июнь сентябрь декабрь, имиже превращение четырем временем нарицаются. и первыя неделя марта месяца, или июня, или сентября, или декабря, в первую среду святители их поставляют причетники и епископы, ихже хотят;

И октября в 16 день, у великаго господина смиреннаго Филарета патриарха Московскаго и всея Русии. быша на соборе власти, Новгородской митрополит Макарей. Ростовской митрополит Варлам. Вологодской архиепископ Корнилей. Суздальской архиепископ Арсеней. Тверскии архиепископ Пафнотей. Коломеньской епископ Рафаил. Крутицкой же Иона митрополит тут же бысть на соборе.

И великии господин смиренныи Филарет патриарх Московскии и всея Русии, повеле чести на соборе дело о иноземцех тех, ихже ляхов он митрополит Иона повеле помазывати миром, а совершено крестити их не повеле. и како убо его митрополита Иону о тех иноземцех докладывая вопрошаху от пречистыя Богородици, священники из Столечников Еуфимеи да Иван, и чтоже им митрополит Иона тем священником, о тех иноземцах указа. И Крутицкой митрополит Иона став на соборе, и выслушав дела сказал, что де того он не упомнит, как от Пречистыя Богородицы священники Еуфимеи да Иван, к нему митрополиту ради докладу о иноземцах приходили ли, или несть. И мало помедлив, митрополит же Иона рекл, была де у мене таковая правилная книга, а лежала на дворе моем в подклете, у моего подъячево Яньки. и аз убо повелех ему ту книгу списати себе. и аще будет онже Янька и тем священником дал есть ис той книги выписывать мой подъячей. и аз того убо рек не упомню, егда приходяша ко мне сии священницы к докладу или несть;

И великии господин смиренныи Филарет патриарх Московскии и всея Русии, повеле пречистенских священников Еуфимия да Ивана поставити с Крутицким митрополитом с Ионою с очей на очи. и о сицевой убо вине, тех священников вопрошаше, дабы они истинну рекли по священству. Сам убо им Крутицкой митрополит Иона давал книгу, выписывать указ о латынском крещении, или им ту книгу у митрополита на дворе давал выписывать иной кто, из митрополичьих дворовых людей. И священник Еуфимей да Иван, став с Крутицким митрополитом Ионою с очей на очи. и по священству поведающе глаголаста сице, мы убо приходихом к Крутицкому митрополиту Ионе на двор, докладывати его о иноземцах папежския веры, которыя к нам приходили венчатися на дщерех русских. и как нам об них укажет, велит ли их крестити. таже и венчати со дщери русскими. и митрополит Иона сказал, есть де тому указ. и вынесл от себя из келии книгу. таже приискав, и дал есть нам тое книгу сам митрополит. и повеле нам ис тое книги выписывати указ. и в тойже выписке есть рука его митрополича казначеева сына Михаила Болтина. а той убо Михаило Болтин, в то время был у митрополита Ионы в детех боярских. и что нам тогда в книзе указ дал митрополит Иона выписывати, а тот Михаило Болтин с нами же купно писал тут же в свиток. И Крутицкой митрополит Иона против речей священнических Еуфимия и Ивана сице отвеща. того убо аз неупомню, когда вы ко мне приходили. а Михаило Болтин во дворе у меня в детех боярских был;

И великии господин смиренныи Филарет патриарх Московскии и всея Русии, к митрополиту Ионе глаголаше. сказываеш ты митрополит Иона, что того не упомниш, как тебя те священники докладывали. а егда тя митрополита Иону преже сего аз сам смиренныи патриарх о том вопрошах, и глаголах ти что сказывали мне теже причистенския священники. и те священники, с тобою тогда с очей на очи глаголаху тоже, что венчали они у себя в церкви, с рускими дщерми двух ляхов. а докладывали де они, о тех ляхах тебя митрополита Иону. и ты тем священником, тех ляхов крестити не велел. а велел еси их точию миром помазывати; И аз тебе смиренныи патриарх в тоже время сам вопросих, како убо у вас сие содеяся. и ты митрополит Иона отвеща ми тогда сице, зде у меня смиреннаго патриарха, в сей крестовой полате глаголаше. писано убо есть о том в шестом соборе, еже сицевых миром точию помазывати, а не крестити. да и много убо тогда рекл еси таковых есть. и ты скажи, кто у вас иныя ляхи таковыя быша, и кто имяны, и колико есть их, ихже вы помазывали миром, а не крестили; И Крутицкой митрополит Иона отвеща, был у меня един иноземец Микита зовомыи Маркушевскии, а сказался мне белорусец. аз же повелех его миром помазывати. а того аз не упомню, что есмь рекл, еже много таких есть;

И великии господин смиренныи Филарет патриарх Московскии и всея Русии, сице Крутицкому митрополиту Ионе рече. аз то ведаю и сам, что и Маркушевскаго ты же велел миром помазывати. но той сказался ти белорусцом. а егда аз тебя преже сего вопрошах про ляхов. о ихже поведаша мне священницы тутоже с тобою стояху с очей на очи, да Михаило Болтин казначея твоего сын, что у тебя был в детех боярских, сказал тоже, что те священницы от тебя сверху книгу снесли. и ты глаголаше мне супротивно, и прекословяше со мною о том сице. яко писано есть в шестом соборе, да и везде тоже есть писано. еже ляхов крестити не подобает, но токмо помазывати их миром. и ты скажи чесо ради ты о том тако мне глагола, ляхом ли угожая, или какия ради иныя вины глагола. еже ляхов не крестити, но помазывати их миром; И Крутицкой митрополит Иона, пред великим господином святейшим Филаретом патриархом Московским и всея Русии, и пред всем собором винился. А сказал что он в том пред ним великим господином виноват. говорил о том своею простотою без хитрости. и о том бил челом много, и прощения просил в том, что сказали на него те священники, что будто он дву ляхов велел помазывати миром. а не совершенно в три погружения крестити. а он того не упомнит, велел, или не велел. а что он говорил шестым собором, что ляхов крестити не надобет, и в том он согрешил пред Богом, и пред ним отцом своим великим господином святейшим Филаретом патриархом Московским и всея Русии. и ему отцу своему великому господину святейшему Филарету патриарху Московскому и всея Русии, и братии своей митрополитом, и архиепископом, и епископу, и всему освященному собору, вину свою принес. учинил де то он простотою своею, а не умышлением. и обещаваюся аз Иона митрополит. с тобою отцом своим великим господином святейшим Филаретом патриархом Московским и всея Русии, и с братиею своею с митрополиты, и со архиепископы, и епископом. и со всем освященным собором, единомыслен быти, и впредь такой прелести в латынском крещении не творити. и к вашему соборному избранию, от правил святых апостол, и святых отец, на латынскую ересь о крещении, хощу рукою своею приписати. и посему вашему соборному писанию хощу тако творити, как писано в сем вашем соборном писании.

И аз смиренныи Филарет патриарх Московскии и всея Русии, с сыновы своими, с митрополиты, и архиепископы, и епископом. выслушав его челобития, и видев его сокрушенное сердце, и смирение и слезы, и истинное покаяние. советовав с сыновы своими, с митрополиты, и со архиепископы, и епископом. положили есмя то на человеколюбие Божие, и на Его превиликия щедроты. и в том великом духовном запрещении, его митрополита Иону простили и разрешили. и благословили его служити божественую литургию по прежнему. А будет он Иона митрополит, о своем согрешении нам не истино исповедал, а утаил будет что от нас, и в том он своем согрешении ответ Богу сам за себя даст. а мы от того, его утаеннаго греха чисты и свободны. и к сему соборному избранию, от правил святых апостол, и святых отец, и от прочих божественых писании, о крещении латынь, и прочих еретик, своими руками приписали. и он Иона митрополит, тутже своею рукою приписал. Писано в церьствующем граде Москве, в дому Пречистыя Богородицы, честнаго и славнаго Ея Успения. и великих чюдотворцев Петра и Алексия и Ионы. и в нашем великаго господина смиреннаго Филарета патриарха Московскаго и всея Русии. лета 7129-го, декабря в 4, день.

 

Указ, как изыскивати, и о самех белорусцех, иже приходящих от Польскаго и от Литовскаго государства, в православную веру нашу греческаго закона, в державу Московскаго государства. и хотящих быти с нами вкупе християны. и коих из тех белорусцев крестити достоит, или миром помазывати. и како действовати о них, еже к просвещенным християном сочетовати их.

 

Божиею милостию аз смиренныи Филарет патриарх Московскии и всея Русии, с сыновы моими, с преосвященными митрополиты, и со архиепископы. и епископы. с митрополитом Макарием Новгородским и Великолуцким. с Варламом митрополитом Ростовским и Ярославским. и с Ионою митрополитом Сарским и Подонским. и с архиепископом Корнилием Вологодским и Великопермским. и со архиепископом Арсением Суждальским и Торусским. и со архиепископом Пафнотием Тверским и Кашинским. и со архиепископом Киприяном Сибирским и Тобольским. и со епископом Рафаилом Коломенским и Коширским. и советовал есми, и приговорили с ними вкупе на соборе, како изыскивати о самех белорусцех, иже приходят от Польскаго и от Литовскаго государьства, в православную веру нашу греческаго закона, в державу нашу Московскаго государьства и всея Великия Русии. хотяще быти с нами вкупе християне. и коих из тех белорусцев крестити ли достит, или миром помазывати. и како действовати о них, еже к нам просвещенным сочетовати их. понеже аз смиренныи Филарет патриарх Московскии и всея Русии. егда убо бых в Польском и Литовском государьстве, и многая в них виде несогласия церковная, в самех тех християнех, яже суть белорусцы в них нарицаются. и нарицаются убо християне, а правила святых апостол, и святых отец седьми вселенских, и девяти поместных соборов, и инех святых отец предания, мнози в них не соблюдают. и в едином убо дому у них у отца с детьми, и у мужа с женою, и у господина с рабы, веры три, или четыре. и ов держит в них веру християнскую. ин же папежскую. и ин люторскую. ин же калвинскую. и ин новокрещенскую. ин же сасскую. и ин ариянскую. и вкупе убо на единой трапезе ядят и пиют, и браком совокупляются. а инии вкупе и молитву творят. мнози же в них и за папу изверженаго Бога молят, во святей литургии в приношении, и во ектениях и в литиях. А в которой у них церкве, аще она и християнская есть, а молят Бога за папу. и таковая церковь у них нарицается унея, и по их разсужению толкуется, яко таковыя церкви, еже нарицаемии от них унеи, сиречь соединение. еже мируещеися и соединяющеися с папежники. и в тех их церквах, в нарицаемых в унеях, еже есть в соединяющихся с папежники. и под паствою папы Римскаго пребывающеи митрополиты, и архиепископы, и епископы, и архимариты, и игумены, и протопопы, и попы, и диякони, и инии причетницы мнози есть суть. иже древняя предания святых апостол, и святых отец не все держат. и от вселенских убо святейших четырех патриарх уже немало лет, о сем неисправляеми, и не пасоми суть. понеже бед и напастей, и гонения ради, от папежа Римскаго. и того ради, инии подкланяются под папино благословение, и в два пути ходят. ови суть светом евангелия, ови же наипаче и мнози тмою еретичества. и влаются во всяком ветре учения, противна истинней вере християнстей. инии же терпят беды и напасти правды ради нашея християнския веры. и непреклонни пребывают в папино учение. темже убо аз смиренныи Филарет патриарх Московскии и всея Русии, с сыновы моими положих, и утвердих завет и устав, грядущим по нас сыновом и братиям нашим, иже аще будут Божиим благоволением, и всем церковником сущим под нами, се не новое предание введше, но древнее укрепляюще поновихом. и последующе заповедем святых апостол, и святых отец, яко же они заповедаша, о еретицех и о раскольницех. и о тех иже аще от части приобщаются еретическому папежскому учению, и иных различных ересей учению. и како приимати, и испытовати их. И егда приидет кто от Польскаго и Литовскаго государьства, к нам в Росийскую державу Московскаго государьства. и скажет о себе, яко белорусец есть, и истинныи християнин греческаго закона веры. егоже повелеваем всем вам, нашего смирения благословения требующим. прежде его искусите с добрым вопрошанием, по божественным писанием. и по сему нашему утверждению вопросите его. како верует, и что вера его; и истинно ли крещен в три погружения, и не обливан ли. И которыя иноземцы, егда биют челом о крещении, в православную християнскую веру. и в роспросе про себя сами скажут, яко они прежде сего в своей земле крещены в християнскую веру греческаго закона. а в крещении у них обливают, а не в три погружения крестят. а миром и маслом помазуют. или аще будет кто скажет, яко не ведает помазыван ли миром, или не помазыван. Тако же и свидетели, аще будет про них скажут тоже, яко они белорусцы. и крещены в греческую веру. а в крещении у них обливают, а не в три погружения крестят. а миром и маслом помазуют. или аще будет и им неведомо о сем, или скажут, яко маслом помазывают, а миром не помазывают. и таковых подобает совершено крестити в три погружения. аще ли сыщется которыи, яко миром и маслом помазыван, и того не помазывати. аще ли будет единым маслом помазован, а миром не помазован, и того миром помазывати; А которыи белорусец скажет о себе, яко крещен он в християнскую веру. а который поп его крестил, и тот поп в божественной литургии в приношении и во ектениях, в первых поминает Римскаго папу. да и во всяком пении во ектениях и в литиях молит Бога за папу. и таковаго подобает совершено крестити в три погружения, и миром и маслом помазывати. да и латынскую ему ересь и папежев римских еретиков проклинати; А иные иноземцы сказывают про себя сами же, что они в греческую веру крещены в три погружения, и миром и маслом помазываны. или аще будет, и свидетель нет, а сам про себя сказывает, яко крещен в три погружения, и миром и маслом помазыван. и тех крестити не подобает, и миром и маслом не помазывати. но токмо велети им поститися неделю, тако же как и в Московском государьстве говеют православныя християне ко исповеданию. и велети его исповедати. и о том его допрашивати зело накрепко, правду ли он сказал про себя, что крещен в три погружения, и миром и маслом помазыван. и аще будет скажет во исповедании тоже, яже и в роспросе сказывал. и о том разсудити отцу духовному, и доложити о том, святейшаго Филарета патриарха Московскаго и всея Русии, и митрополитов, и архиепископов, и епископов, которые он святыни достоин будет, того и сподобити. и имети его християнина также, как и прочих в Московском государьстве крещеных; А которой скажет, или свидетели скажут, яко не по истинне крещен, но обливан. а про миро и про масло не ведает, или он не помнит, и таковаго подобает совершено крестити в три погружения, и миром и маслом помазывати; А которые белорусцы обливаны, и в костелех причащалися, или будет которые и не причащалися, а обливаны. и тех совершено крестити в три погружения. а имян им не перекладывати. и латынскую ересь им проклинати. а младеньческаго отрицания им не говорити;

А которой белорусец скажет, что был он выной вере. и пришол изыной веры в совершеных летех, и крестился в християнскую веру в Литве от русскаго попа. а тот поп которой его крестил, молит Бога за папу, и таковаго совершено крестити. и латынское и еретическое отрицание ему говорити. и молитвы все говорити. и младеньческое отрицание такоже что и еретику, для того, что крещен от отступника, которой молит Бога за папежа. И к сему соборнаго совета к свитку и указу, Аз смиренныи Филарет патриарх Московскии и всея Русии, и с сыновы моими с преосвященными митрополиты, и со архиепископы, и епископы, руками своими приписали.

Писано в царствующем граде Москве, в дому Пресвятыя Владычице нашея Богородицы и Присно Девы Мария, честнаго и славнаго Ея Успения. и великих чюдотворцев Петра и Алексея и Ионы. и в нашем великаго господина святейшаго Филарета патриарха Московскаго и всея Русии. в лето 7129-го. декабря в 16 день.

 

Из Большого Потребника